ބާސެލޯނާއަށް އަދިވެސް ކޮންޑޭ ރަޖިސްޓަރީނުކުރެވޭ
21 އޯގަސްޓު 2022 | އާދީއްތަ 16:29ކޮންޑޭ ބާސެލޯނާއަށް ގެންދިއުމުގައި ބާސެލޯނާގެ ކޯޗު ޒަވީ ހެނާންޑޭޒްގެ ދައުރު ބޮޑު
ބާސެލޯނާއާ ގުޅުމަށްފަހު ކޮންޑޭ ނޫސްވެރިންނާ ބައްދަލުކުރުން
ބާސެލޯނާއާ އަލަށް ގުޅުނު ޖޫލްސް ކޮންޑޭ އަދިވެސް އެޓީމުގައި ރަޖިސްޓަރީނުކުރެވޭކަމަށް ޓީމުގެ ކޯޗު ޒަވީ ހެނާންޑޭޒް ބުނެފިއެވެ.
ބާސެލޯނާއަށް މިހާތަނަށް ކޮންޑޭ ރަޖިސްޓަރީކުރެވިފައި ނުވަނީ ލަލީގާގެ ފައިނޭންޝިއަލް ފެއަރޕްލޭ ގަވައިދަށް ޓީމުގެ އާމްދަނީއާއި ޚަރަދުތައް ނުފެއްތޭތީއެވެ. ކޮންޑޭ ފިޔަވައި ޓީމާ އަލަށް ގުޅުނު ހުރިހާ ކުޅުންތެރިން މިހާރު ވަނީ ކްލަބަށް ރަޖިސްޓަރީކޮށްފައެވެ.
މިކަމާގުޅިގެން ކޯޗު ޒަވީ ބުނީ، ކޮންޑޭ ކްލަބަށް ރަޖިސްޓްރީ ކުރެވޭނީ ޓީމުގައި މިހާރު ތިބި ބައެއް ކުޅުންތެރިން ވިއްކާލައިގެންކަމަށެވެ. އަދި ޓީމުގެ ބައެއް ކުޅުންތެރިން ވިއްކާލުމުގެ މަސައްކަތް މިހާރު ކުރަމުން އަންނަކަން ޒަވީ ފާހަގަކުރިއެވެ. ބާސެލޯނާއިން އަންނަނީ ޕިއޭ-އެމްރިކް އޮބާމެޔަންގެ އިތުރުން މެމްފިސް ޑިޕާއި ވިއްކާލުމަށް މަސައްކަތްކުރަމުންނެވެ.
ޒަވީ ބުނީ ކޮންޑޭއަކީ ބާސެލޯނާއަށް މިވަގުތު ވަރަށް މުހިންމު ކުޅުންތެރިއެއް ކަމަށެވެ. އަދި މިހާރު ހުރި ރޫހުގައި ކޮންޑޭއަށް ތަފާތު މޮޅު ކުޅުމެއް ދެއްކިދާނެކަމަށް ގަބޫލުކުރާކަމަށްވެސް ޒަވީ ބުންޏެވެ.
ސެވިއްޔާ ދޫކޮށް ބާސެލޯނާއަށް ކޮންޑޭ ބަދަލުވީ މި ސަމަރ ޓްރާންސްފަރ މާކެޓުގައެވެ. ބާސެލޯނާއިން ކޮންޑޭ ހޯދީ ޗެލްސީން އޭނާ ހޯދުމަށް މަސައްކަތް ކުރަމުން ދަނިކޮށެވެ. ކޮންޑޭ ބާސެލޯނާއަށް ގެންދިއުމުގައި ބާސެލޯނާގެ ކޯޗު ޒަވީ ހެނާންޑޭޒްގެ ދައުރު ބޮޑެވެ.
