ޓީސީ ސްޕޯޓްސް ކްލަބުން ބޮޑު މުބާރާތެއްގެ ތަށި ހޯދި ނަމަވެސް ރާއްޖޭގައި ނަމަ އަދިވެސް އެ ކްލަބަކީ މާމޮޅު ޓީމެއް ނޫން ކަމަށާއި އެހެން ކަމުން އެޓީމުގެ ރޭންކަކީ ސީޒަނުގައި ވާދަކުރާ ޓީމުތަކުގެ ތެރެއިން ދެވަނައަށް އެންމެ ފަހަތުގައިވާ ޓީމު ކަމަށް ކޯޗު މުހައްމަދު ނިޒާމް (ނިޒާމްބެ) ބުނެފި އެވެ.
ނިޒާމްބެ ބުނީ މިދިޔަ ސީޒަނަށް ބަލާއިރު ޓީސީއަކީ ހުރިހާ ގޮތަކުން ވެސް ދެވަނަ ޓީމު ކަމަށާއި އެގޮތަށް ޓީމުގެ ކުޅުންތެރިންނަށް ވެސް ވިސްނައިދެމުން އަންނަ ކަމަށެވެ.
ފާއިތުވި ސީޒަނާއި މި ސީޒަނުގައި ޓީސީގެ ކުޅުމުގެ ފެންވަރަށް ބަލާއިރު، އެތަށް ގޮތަކުން ތަފާތުތަކެއް އައިސްފައިވާ ފާހަގަކުރަމުން ނިޒާމްބެ ބުނީ އެއް އަހަރުން އަނެއް އަހަރަށް ޓީމުތައް ތައްޔާރުވާއިރު އެތަށް ގޮތަކުން އެޓީމުތަކަށް ބަދަލުތައް އަންނަމުންދާ ކަމަށާއި އެކަން ކޮންމެ އަހަރެއްގެ ވެސް ސީޒަން ނިމި އަނެއް ސީޒަނަށް ކުރިމަތިލާއިރު ފެންނަމުން އަންނަ ކަމަށެވެ.
ނިޒާމްބެ ބުނީ ބޭރު ގައުމެއްގައި ކުރިއަށްދިޔަ މުބާރާތަކުން ކިތަންމެ ރަނގަޅު ނަތީޖާއެއް ހޯދި ނަމަވެސް ޓީސީއަކީ މާލޭގައި ލީގުގައި ވާދަކުރާ ޓީމުތަކާއި ދާދި އެއް ވަރަކަށް ޕާފޯމްކުރާ ޓީމެއް ކަމަށެވެ. އެގޮތުން ކޮންމެ ޓީމަކާ ދެކޮޅަށް ނުކުންނަން ޖެހުނަސް އެޓީމުގެ ފުލް ސްޓްރެންތް އެ މެޗެއްގައި ފެނިގެންދާނެ ކަމަށް ނިޒާމްބެ ބުންޏެވެ.
ނިޒާމްބެ ބުނީ މި ސީޒަން ފެށުމަށްޓަކައި ކޮންމެ ޓީމަކާ ދެކޮޅަށް ވެސް ކުޅޭ މެޗު ވެގެންދާނީ މުހިންމު މެޗަކަށް ކަމަށާއި އަދި އެ މެޗެއްގެ ތިން ޕޮއިންޓް ހޯދުމަކީ ވެސް މުހިންމު ކަމެއް ކަމަށެވެ.
ޓީސީ ވަނީ މާލޭ ލީގުގައި ކްލަބު ވެލެންސިޔާއާ ވާދަކޮށް 0-3 ގެ ނަތީޖާއަކުން މެޗު ކާމިޔާބުކޮށްފަ އެވެ.
ޓީސީން ދެން އެންމެ އަވަހަށް ކުޅޭ މެޗުގައި އަންގާރަ ދުވަހު ހަވީރު ބައްދަލުކުރާނީ ފާއިތުވި ސީޒަންގެ ލީގުގެ ހަތަރުވަނަ ޔުނައިޓެޑް ވިކްޓްރީއާ އެވެ.
