ރޫނީ އަދިވެސް ބޭނުންވަނީ ޔުނައިޓެޑްގައި މަޑުކުރަން

އަދިވެސް ފުޓުބޯޅަ ކުޅެން ބޭނުން ކަމަށާ، ޔުނައިޓެޑުގައި އިތުރަށް މަޑުކުރަން ބޭނުން ކަމަށް މެންޗެސްޓާ ޔުނައިޓެޑް އަދި އިނގިރޭސި ގައުމީ ޓީމުގެވެސް ކެޕްޓަން ވޭން ރޫނީ ބުނެފިއެވެ.

ރޫނީ މިހެން ބުފައިވަނީ ޔޫރޮޕާ ލީގުގެ ސެމީފައިނަލުގައި ސެލްޓާ ވީގޯ އާއި ދެކޮޅަށް ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައެވެ. ޕްރެސްގައި ވާހަކަ ދައްކަމުން ރޫނީ ބުނެފައިވަނީ، މެންޗެސްޓާ ޔުނައިޓެޑުގައި 13 އަހަރު އޭނާއަށް ހޭދަ ކުރެވިއްޖެ ކަމަށާ، އަދިވެސް އިތުރަށް ފުޓުބޯޅަ ކުޅެން ބޭނުން ވާކަމަށެވެ. އެގޮތުން އޭނާ ބުނެފައިވަނީ އޭނާ އަދިވެސް ފުޓުބޯޅަ ކުޅެން ބޭނުންވަނީ މެންޗެސްޓާ ޔުނައިޓެޑަށް ކަމަށެވެ.

ރޫނީ މިހެން ބުނެފައިވާއިރު، އަންނަ ޖޫން ޓްރާންސްފާގައި ރޫނީ އެހެން ކުލަބަކަށް ބަދަލުވެދާނެ ކަމުގެ އަޑުތަކެއްވެސް ވަނީ ފެތުރިފައެވެ. އެގޮތުން ޗައިނާގެ ސުޕަލީގަށް ރޫނީ ބަދަލުވާން އުޅޭކަމުގެ ހަބަރުތަކެއްވެސް މިއަހަރުގެ ކުރީކޮޅުގައި ވަނީ ފެތުރިފައެވެ. ބޭރުގެ ބައެށް ބޮޑެތި މީޑިއާތަކުން ރިޕޯޓް ކޮށްފައިވާގޮތުގައި ރޫނީގެ އޭޖެންޓް ވަނީ ޗައިނާގެ ކުލަބަކާ މަޝްވަރާ ކުރުމަށް ޗައިނާއަށްވެސް ގޮސްފައެވެ.

މިސީޒަނުގައި ހޯސޭ މޮރީނިއޯގެ ކޯޗުކަމުގެ ދަށުން ރޫނީއަށް މާ ގިނަ މެޗުތަކަކުން ޖާގަ ލިބިފައެއް ނުވެއެވެ. ނަމަވެސް މި ސީޒަނުގައި ޔުނައިޓެޑްގެ ކީ ޕްލެއަރެއްގެ ގޮތުގައި ބޭނުންކުރަމުން އަންނަ ޒްލަޓަން އިބްރަހިމޮވިޗްއަށް އަނިޔާވެ ސީޒަން ނިންމާލަން ޖެހިފައިވުމުން، ސީޒަނުގެ ބާކީއޮތް ބައިގައި ރޫނީއަށް ފުރަތަމަ އެގާރައިން ޖާގަ ލިބޭނެ ކަމަށްވެސް ގިނަ ފަރާތްތަކަކުން އަންނަނީ ބުނަމުންނެވެ.

ރޫނީ ބުނެފައިވަނީ، ކޮންމެ ކުޅުންތެރިއަކުވެސް މެޗުގައި ކުޅެން ބޭނުންވާނެ ކަމަށާ، މެޗުގައި ކުޅެން ލިބޭ ފުރުސަތުގައި ތަފާތު ދައްކަން ވާނެ ކަމަށެވެ. އެގޮތުން އޭނާ އަބަދުވެސް މަސައްކަތް ކުރަނީ ޓީމަށް ކާމިޔާބީ ހޯދައި ދިނުމަށް ކަމަށްވެސް ރޫނީ ބުނެފައިވެއެވެ.

އިތުރަށް ވާހަކަ ދައްކަމުން ރޫނީ ބުނެފައިވަނީ ޗެމްޕިއަންސް ލީގަށް ކޮލިފައިވުމަކީ ޔުނައިޓެޑުން މިހާރު ކުރަން ޖެހިފައިވާ ވަރަށް މުހިންމު ކަމެށް ކަމަށާ، މެޗެސްޓާ ޔުނައިޓެޑަކީ ޗެމްޕިއަންސް ލީގުގައި އޮންނަން ޖެހޭ، އެ ފެންވަރު ހުރި ޓީމެއް ކަމަށެވެ. ނަމަވެސްހަގީގަތަށް ބުނާނަމަ އިނގިރޭސި ޕްރެމިއާ ލީގުގެ ގަދަ ހަތަރެއްގައި ހިމެނިގެން ޗެމްޕިއަންސް ލީގަށް ކޮލިފައިވުމަކީ އުނދަގޫ މަސައްކަތަކަށް ވާނެ ކަމަށްވެސް އޭނާވަނީ ބުނެފައެވެ.

ސީނިއާ ފުޓުބޯޅަ ކެރިއަރުގެ ކްލަބް ލެވެލްގައި މީގެ ކުރިން އެވަޓަން އަށްވެސް ކުޅެފައިވާ ރޫނީ މިހާތަނަށް 13 އަހަރު މެނެޗެސްޓާ ޔުނައިޓެޑްގައި ހޭދަކޮށްފައިވާއިރު އޭނާވަނީ ޔުނައިޓެޑަށް 390 މެޗު ކުޅެދީ 182 ގޯލު ޖަހައިދީފައެވެ.