ނިއުގެ 16 އަހަރާއި 19 އަހަރުން ދަށުގެ ސެލެކްޝަން އަށް ބޮޑު ތަރުހީބެއް، އަދިވެސް ބައިވެރިވެވޭނެ

ނިއުރޭޑިއަންޓް ސްޕޯޓްސް ކްލަބުގެ 16 އަހަރާއި 19 އަހަރުން ދަށުގެ ޓީމު ހޮވުމަށް ބާއްވާ ސެލެކްޝަނަށް ބޮޑު ތަރުހީބެއް ލިބެމުން އަންނަ ކަމަށާއި، ސެލެކްޝަންގައި އަދިވެސް ބައިވެރިވުމުގެ ފުރުސަތު ހުޅުވާލެވިފައިވާ ކަމަށް ނިއުގެ ޖެނެރަލް ސެކެޓްރީ އަހުމަދު ނިޔާޒް މޫސާ (ޓެޑް) ވިދާޅުވެއްޖެ އެވެ.

ރާއްޖެއެމްވީ އަށް މައުލޫމާތު ދެއްވަމުން ޓެޑް ވިދާޅުވީ ސެލެކްޝަން އަށް ބޮޑު ތަރުހީބެއް ލިބެމުން އަންނަ ކަމަށާއި، އެގޮތުން ސެލެކްޝަން މަހެއްހާ ދުވަހަށް ދިގު ދެމިގެންދާނެ ކަމަށެވެ.

ނިއުގެ 16 އަހަރުން ދަށް އަދި 19 އަހަރުން ދަށުގެ ޓީމު ހޮވުމަށް ފަހު އޭގެ ތެރެއިން ދެ ކުޅުންތެރިޔަކު އިނގިރޭސި ކްލަބް ރެޑިން އެފްސީގެ އެކަޑަމީއަށް ތަމްރީން ހެދުމަށް ފޮނުވުމަށް ވަނީ ހަމަޖެހިފައެވެ.

ނިއު އާއި ރެޑިންއާ ދެމެދު ހަދާފައިވާ އެއްބަސްވުމުގެ ދަށުން ނިއުގެ ޒުވާން ދެ ކުޅުންތެރިޔަކު ރެޑިން އެފްސީގެ އެކަޑަމީން ތަމްރީން ކޮށްދޭން ވަނީ ނިންމާފައެވެ. އެގޮތުން ހަތަރު ހަފްތާގެ މި ތަމްރީން ޕްރޮގްރާމް ފުރިހަމަކޮށް އެ ދެ ކުޅުންތެރިން ފާސްވެއްޖެ ނަމަ އިތުރު ފުރުސަތުތަކެއް ރެޑިން އިން ދޭނެ ކަމަށް އެ ކްލަބުން ވަނީ ބުނެފައެވެ.

ބޮޑު ބަޖެޓަކާ އެކު މި ސީޒަނުގައި ވާދަކުރަމުން އަންނަ ނިއު އިން އަންނަނީ ފުޓުބޯޅަ ކުރިއެރުވުމަށް ތަފާތު ހަރަކާތްތައް ހިންގަމުންނެވެ. އެގޮތުން އެޓީމުން އަންނަނީ އެކި އަތޮޅުތަކުގައި ކްލަބުގެ އެކަޑަމީތައް ގާއިމުކުރުމުގެ މަސައްކަތް ވެސް ކުރަމުންނެވެ.