ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށް ރިޝްވަތު ނެގި މައްސަލައިގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ތާވަލު ކޮށްފިއެވެ.

މި އަޑުއެހުން ތާވަލު ކޮށްފައިވަނީ ބުރާސްފަތި ދުވަހުގެ ހެނދުނު 09:30 އަށެވެ. އެގޮތުން ރައީސް ޔާމީނާއި، މި މައްސަލައިގައި ރިޝްވަތު ދިނުމުގެ ކުށުގެ ދައުވާ އުފުލާފައިވާ ޔޫސުފް ނައީމްގެ ބައިވެސް ވަނީ އެގަޑިއަށް ތާވަލު ކޮށްފައެވެ.

ކްރިމިނަލް ކޯޓުގައި މި މައްސަލަ ބައްލަވަނީ އިސްގާޒީ އަހުމަދު ޝަކީލެވެ.

މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 14 މާރޗު 2022 ގައެވެ. އެ އަޑުއެހުމުގައި އޮތީ ދެފަރާތުން ހެކި ހާމަކުރުމެވެ.

އެހެންނަމަވެސް، ރައީސް ޔާމީނުގެ ފަރާތުންނާއި، ޔޫސުފް ނައީމްގެ ފަރާތުން ވަނީ ބައެއް ލިޔެކިޔުންތައް ހޯދުމާއި ދިރާސާ ކުރުމަށް އިތުރު ވަގުތު ބޭނުންވާކަން ފާހަގަކޮށް، ލިއުމުން ހެކި ހުށައެޅުމަށް މުއްދަތެއް ދެއްވުމަށް އެދިލައްވާފައެވެ. އެ ދުވަހުގެ އަޑުއެހުމުގައި ދައުލަތުން ހެކި ހާމަކުރިއެވެ.

ވުމާއެކު މައްސަލަ ބައްލަވާ ގާޒީ ވަނީ ދައުވާ ލިބޭ ދެ ފަރާތަށްވެސް ލިޔުމުން ހެކި ހުށައެޅުމަށް 5 ދުވަހުގެ މުއްދަތެއް ދެއްވާފައެވެ. އެހެންކަމުން، ބުރާސްފަތި ދުވަހުގެ އަޑުއެހުމުގައި އޮންނާނީ ދިފާއީ ހެކި ހާމަ ކުރުމެވެ.

އޭގެ އިތުރުން، މި މައްސަލައިގައި ދެން އޮންނަ އަޑުއެހުމެއްގައި ދިފާއީ ހެކި ޚުލާސާ ގޮތެއްގައި ހާމަކުރުމާއި، މަދަނީ މިންގަނޑުން ކުރިއަށް ގެންދިޔުމާމެދު ދެފަރާތުން ވާހަކަ ދެއްކުންވެސް އޮންނާނެކަމަށް މައްސަލަ ބައްލަވާ ގާޒީ އެ ދުވަހު ވިދާޅުވެފައިވެއެވެ.

ޝަރީއަތުގެ މަރުޙަލާ ފެށެންވާއިރަށް ވ.އާރަށު ހިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނާއި ޔޫސުފް ނައީމްގެ މައްޗަށް އުފުލާފައިވާ ދައުވާތަކުގެ އަޑުއެހުންތައް ލައިވް ކުރެވޭނެކަމުގެ އިޝާރާތެއްވެސް އެ އަޑުއެހުމުގައި މައްސަލަ ބައްލަވާ ގާޒީ ވަނީ ދެއްވާފައެވެ. އެގޮތުން ޝަރީއަތްތައް ލައިވް ކުރުމަށް މަގުފަހި ކޮށްދެއްވުމަށް މަސައްކަތް ކުރައްވަމުން ގެންދަވާކަން ފާހަގަ ކުރައްވައި ގާޒީ ޝަކީލު އެ ދުވަހު ވިދާޅުވީ، މިހާރު ކުރިއަށްދަނީ އިބްތިދާއީ މަރުޙަލާ ނަމަވެސް، ޝަރީއަތުގެ މަރުޙަލާތައް ފެށެންވާއިރަށްވެސް، ޝަރީއަތް ލައިވް ކުރެވޭނެކަމަށް އުއްމީދު ކުރައްވާކަމަށެވެ.