ޖީ.އެސް.ޓީގެ ގޮތުގައި މިލިއަނަށްވުރެ ގިނަ ފައިސާ ދައްކަންޖެހޭ 25 ފަރާތެއްގެ ނަން މީރާއިން ހާމަކޮށްފި
11 ނޮވެމްބަރު 2026 | ބުދަ 11:41ޖީ.އެސް.ޓީގެ ގޮތުގައި އެއް މިލިއަން ރުފިޔާއަށްވުރެ ގިނަ ފައިސާ ނުދައްކާ ހުރި 25 ފަރާތެއްގެ ނަން، މީރާގެ "ނޭމް އެންޑް ޝޭމް" ސިޔާސަތުގެ ދަށުން އާންމުކޮށްފި. މި ލިސްޓުގައި މަޝްހޫރު ކުންފުނިތަކާއި މީޑިއާއެއް ހިމެނޭއިރު، މީރާއިން ބުނީ މި ފަރާތްތަކުގެ ނަން ހާމަކުރީ ފައިސާ ދެއްކުމަށް ތަކުރާރުކޮށް އެންގުމަށްފަހު ކަމަށް
ބައިނަލްއަގުވާމީ މިންގަނޑުތަކާ އެއްގޮތަށް ޓެކްސްގެ ކަންކަން ދެފުށް ފެންނަ ގޮތަށް ކުރިއަށް ގެންދިއުމަށާއި، ޓެކްސްގެ ދާއިރާއިން ބައިނަލްއަގުވާމީ ފެންވަރުގައި އެއްބާރުލުން ދިނުމަށް ދިވެހިރާއްޖެއިން ވެފައިވާ އިގުރާރު އައުކުރުމުގެ ގޮތުން، "މަލްޓިލޭޓަރަލް ކޮމްޕީޓެންޓް އޮތޯރިޓީ އެގްރީމަންޓް އޮން އޮޓޮމެޓިކް އެކްސްޗޭންޖް އޮފް ފައިނޭންޝަލް އެކައުންޓް އިންފޮމޭޝަން" ގެ އެޑެންޑަމްގައި ކޮމިޝަނަރ ޖެނެރަލް އޮފް ޓެކްސޭޝަން ފާތިމަތު އަމީޒާ ސޮއިކުރައްވަނީ | މޯލްޑިވްސް އިންލެންޑް ރެވެނިއު އޮތޯރިޓީ (މީރާ)
މުދަލާއި ޚިދުމަތުގެ އަގުން ނަގާ ޓެކްސް (ޖީ.އެސް.ޓީ) ގެ ގޮތުގައި ދައުލަތަށް އެއް މިލިއަން ރުފިޔާއަށްވުރެ ގިނަ ފައިސާ ދައްކަންޖެހިފައިވާ 25 ފަރާތެއްގެ ނަން މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ހާމަކޮށްފި އެވެ. މި ފަރާތްތަކުން ދައުލަތަށް ނުދައްކާ ހުރި ޖުމްލަ ފައިސާގެ އަދަދު 25 މިލިއަން ރުފިޔާއަށްވުރެ އިތުރުވާއިރު، މީރާއިން އާންމުކުރި ލިސްޓުގައި ކޮންމެ ފަރާތަކުން ވަކިވަކިން ދައްކަންޖެހޭ ފައިސާގެ ތަފުސީލެއް ހިމަނާފައެއް ނުވެ އެވެ.
ނަން ހާމަކޮށްފައިވާ ފަރާތްތަކުގެ ތެރޭގައި ވަކިވަކި ފަރުދުންގެ ނަމުގައި ހިނގާ ވިޔަފާރިތަކާއި، ރާއްޖޭގެ ބައެއް ނަން މަޝްހޫރު ކުންފުނިތަކާއި، މީޑިއާ އެއް ހިމެނެ އެވެ.
މި ފައިސާއަކީ 2024 ވަނަ އަހަރުގެ ހަތަރުވަނަ ކުއާޓަރާއި، 2024 ވަނަ އަހަރުގެ ޑިސެމްބަރު މަހުން ފެށިގެން 2026 ވަނަ އަހަރުގެ ޖޫން މަހުގެ ނިޔަލަށް ހިމެނޭ ޓެކްސް ދައްކަންޖެހޭ މުއްދަތުތަކަށް ނުދައްކާ ހުރި ފައިސާ ކަމަށް މީރާ އިން ބުނެ އެވެ.
ނޮވެމްބަރު މަހުގެ 10 ވަނަ ދުވަހު "ނޭމް އެންޑް ޝޭމް 2026" ގެ ސުރުޚީގެ ދަށުން މީރާއިން ނެރުނު ބަޔާނެއްގައި ބުނެފައިވަނީ، ލިސްޓުގައި ހިމެނޭ 25 ފަރާތުގެ ނަން އާންމުކުރުމުގެ ކުރިން އެ ހުރިހާ ފަރާތްތަކަށް ފޯނުން ގުޅައި އެކަން އަންގާފައިވާނެ ކަމަށެވެ. އަދި ޓެކްސް ފައިސާ ނުދައްކައިފިނަމަ ލިބޭނެ އަދަބުތަކާއި، އެ ފަރާތްތަކާ މެދު އެޅިދާނެ ފިޔަވަޅުތަކުގެ މައުލޫމާތު ފޯނުގެ އިތުރުން އެސް.އެމް.އެސް މެދުވެރިކޮށްވެސް އަންގާފައިވާނެ ކަމަށް އެ އިދާރާއިން ބުނެފައިވެ އެވެ.
