ޝިއާއުގެ މަރު: ޝާހިލްއަށް އިއްވި 3 އަހަރުގެ ހުކުމް އަނެއްކާ ވެސް އިސްތިއުނާފު ކުރުމަށް ހުށަހެޅުމުން މިފަހަރު ވެސް ބަލައިނުގަތް
24 ޖުލައި 2026 | ހުކުރު 16:49ޝިއާއު މުހައްމަދު ސައީދު މަރާލި މައްސަލާގައި އަލީ ޝާހިލްގެ މައްޗަށް ސާބިތުވި ކުށްތަކުގެ ހުކުމް އިސްތިއުނާފު ކުރަން ހުށަހެޅި މައްސަލަ ބަލައިނުގަތުމަށް ހައިކޯޓުން ނިންމައިފި. މި މައްސަލަ ބަލައިނުގަތީ އިސްތިއުނާފު ކުރަންޖެހޭ އެކަށީގެންވާ ސަބަބެއް ބަޔާންކޮށްފައި ނުވާތީ ކަމަށްވާއިރު، އޭނާގެ މައްޗަށް އުފުލާފައިވާ ގަސްތުގައި މީހަކު މެރުމުގެ ދައުވާގެ ޝަރީއަތް އަދިވެސް ދަނީ ކުރިއަށް
ޝިއާއު މަރާލި ކަމުގެ ތުހުމަތުގައި ހައްޔަރުކޮށްފައިވާ ޝާހިލް | ފޭސްބުކް
މާލޭގެ އެޕާޓްމެންޓެއްގެ ތެރޭގައި އަނިޔާވެރި ގޮތަކަށް މަރާލާފައި އޮއްވާ ފެނުނު ޝިއާއު މުހައްމަދު ސައީދުގެ މަރުގެ ތުހުމަތުކުރެވޭ އަލީ ޝާހިލްގެ މައްޗަށް އެ މައްސަލައާ ގުޅިގެން އުފުލި ބައެއް ދައުވާތައް ސާބިތުވާކަމަށް ކުރި ހުކުމް އޭނާގެ ފަރާތުން ހައިކޯޓުގައި އިސްތިއުނާފު ކޮށްފައިވާއިރު ކްރިމިނަލް ކޯޓުން އިއްވި ޖަލު ހުކުމްގެ އިސްތިއުނާފު ބަލައިނުގަންނަން ހައި ކޯޓުން ނިންމައިފި އެވެ.
މި މައްސަލަ މީގެ ކުރިން ވެސް އޭނާ ގެ ފަރާތުން އިސްތިއުނާފު ކުރިއެވެ. ނަމަވެސް އޭރު ލިޔެކިޔުންތައް ފުރިހަމަނުވާތީ ކޯޓުން މައްސަލަ ބަލައިގެންފައެއް ނުވެއެވެ. އޭގެ ފަހުން އަނެއްކާ ވެސް އޭނާ ވަނީ މައްސަލަ އަލުން ހުށަހަޅާފަ އެވެ.
ހ. ޝީރީންވިލާގޭގެ ނުވަވަނަ ބުރީގެ އެޕާޓްމަންޓެއްގައި އަނިޔާވެރި ގޮތަކަށް މަރާލާފައި އޮއްވާ ޝިއާއު ފެނުނުއިރު، އެ ރޭ ކުށުގެ ވެށިން ހައްޔަރުކުރީ ޒުވާން ސްކޭޓަރު ޝާހިލްއެވެ. އޭނާ ގެ މައްޗަށް ފަސް ދައުވާ އެއް އުފުލާފައިވެ އެވެ.
އެއީ، ގަސްތުގައި މީހަކު މެރުމުގެ ކުށުގެ ދައުވާ އާއި އޮރިޔާން ކާޑު ގެންގުޅުން އަދި ކެނެބިސް ބޭނުންކުރުމުގެ ކުށުގެ ދައުވާއެވެ. އާއިލާއަށް އިހުތިރާމްކުރުމަށް ކަމަށް ބުނެ، ބާކީ ދެ ދައުވާގެ ތަފްސީލެއް ޕީޖީ އޮފީހުން ހާމައެއް ނުކުރެ އެވެ.
އޭނާ ގެ މައްޗަށް ސާބިތުވެފައިވަނީ އޮރިޔާން ކާޑު ގެންގުޅުން އަދި ކެނެބިސް ބޭނުންކުރުމުގެ ކުށުގެ ދައުވާ އެވެ. އެ ދައުވާތައް ސާބިތުވެ އޭނާ ގެ މައްޗަށް 3 އަހަރާއި 1 މަހާއި 6 ދުވަހުގެ ޖަލު ހުކުމެއް ވަނީ އިއްވާފަ އެވެ. އޭނާ ގެ ފަރާތުން އިސްތިއުނާފުކުރީ އެ މައްސަލަ އެވެ.
އިސްތިއުނާފު ކުރުމަށް ޝާހިލް ހުށަހެޅި ދެ މައްސަލަ ވެސް ބަލައިނުގަތުމަށް ރެޖިސްޓްރާ ނިންމެވީ ދަށު ކޯޓުގެ ނިންމުން ހައި ކޯޓުގައި އިސްތިއުނާފަށް ކުރަން ފުދޭ ހާލަތެއް ބަޔާންކޮށްފައި ނުވުމުންނެވެ.
އެހެންނަމަވެސް ގަސްތުގައި ޝިއާއު މަރާލިކަމުގެ ތުހުމަތުގައި އުފުލާފައިވާ ބޮޑު ދައުވާއާއި ބާކީ އޮތް 2 ދައުވާގައި އަދި ޙުކުމްކޮށްފައެއް ނުވެއެވެ. އެ ދައުވާތައް ވެސް މިހާރު އޮތީ ނިމުމަކާ ގާތްވެފަ އެވެ.
ޝިއާއުގެ މަރުގެ މައްސަލައަކީ ގިނަ ދުވަސްތަކެއް ވެފައިވާ މައްސަލައެކެވެ. އެ މައްސަލަ ދައުވާކުރުމަށް ފޮނުވަން ވެސް ގިނަ ދުވަސްތަކެއް ނެގިއެވެ. ފުލުހުން އޭރު ބުނީ އެ މައްސަލައިގެ ތަހުގީގު ލަސްވީ ޝިއާއު މަރާލި "މޯޓިވް" ނުހޯދިގެން ކަމަށެވެ. ޝިއާއުގެ ހަށިގަނޑުގެ ޕޯސްޓްމޯޓަމް ރިޕޯޓާ ހަވާލާދީ ފުލުހުން މީގެ ކުރިން ބުނެފައި ވަނީ، އޭނާ މަރުވެފައި ވަނީ ހަށިގަނޑަށް ގަސްތުގައި ދީފައި ހުރި އަނިޔާތަކެއްގެ ސަބަބުން ކަމަށެވެ. އަދި މަރުވި ފަހުން ވެސް ހަށިގަނޑަށް ވަރަށް ގިނަ އަނިޔާތަކެއް ދީފައިވާ ކަމަށް ވެސް ފުލުހުން އޭރު ވަނީ ބުނެފަ އެވެ.
ޝިއާއުގެ މަރަކީ މި ފަހުގެ ތާރީހެއްގައި ރާއްޖޭގައި ހިނގި އެންމެ އަނިޔާވެރި މަރެވެ. އޭނާ މަރާލާފައި އޮއްވައި ފެނުނުއިރު އޮތީ ބޮލާއި އަތާއި ފައި ވެސް ބުރިކޮށްލާފަ އެވެ.
