ކްރިމިނަލް ކޯޓުގެ ޤާޟީ ކަމުގެ މަގާމަށް ކުރިމަތިލުމުގެ ފުރުސަތު، މަހަކު 60،000 އަށްވުރެ ގިނަ ރުފިޔާ ލިބޭ!
ކްރިމިނަލް ކޯޓަށް ތިން ޤާޟީން އައްޔަންކުރުމަށް، އެ މަގާމަށް ކުރިމަތިލުމުގެ ފުރުސަތު ޖޭއެސްސީން ވަނީ ހުޅުވާލާފައި. މި މަގާމަށް ކުރިމަތިލާ ފަރާތްތަކުގެ ކިބައިގައި ޝަރީއާ ނުވަތަ ގާނޫނީ ދާއިރާއިން ފުރަތަމަ ޑިގްރީއާއެކު ތިން އަހަރުގެ ތަޖުރިބާ ހުންނަންޖެހޭއިރު، މުސާރައާއި އިނާޔަތްތަކުގެ ގޮތުގައި މަހަކު 60،000 އަށްވުރެ ގިނަ ރުފިޔާ ލިބޭނެ. ޝަރުތުހަމަވާ ފަރާތްތަކުން އަންނަ ޖުލައި މަހުގެ 16 ވަނަ ދުވަހުގެ މެންދުރު 12:00 ގެ ކުރިން ފަހިރެސް ޕޯޓަލް މެދުވެރިކޮށް ނުވަތަ ހާޑްކޮޕީ ފޯމު ހުށަހަޅަންޖެހޭ.
ކްރިމިނަލް ކޯޓުގެ ބޭރުން ނަގާފައިވާ ފޮޓޯއެއް | ރާއްޖެއެމްވީ
ކްރިމިނަލް ކޯޓުގެ ޤާޟީ ކަމުގެ މަގާމަށް ކުރިމަތިލުމުގެ ފުރުސަތު ހުޅުވާލައިފި އެވެ.
ހޯމަ ދުވަހު ޖުޑީޝަލް ސަރވިސް ކޮމިޝަން (ޖޭއެސްސީ) އިން ބުނީ، ކްރިމިނަލް ކޯޓުގެ ޤާޟީ ކަމުގެ މަގާމަށް ކުރިމަތިލުމުގެ ފުރުސަތު ހުޅުވާލާފައިވާ ކަމަށާއި، 3 ޤާޟީން ބޭނުންވާ ކަމަށެވެ.
ޖީއެސްސީން ބުނީ، މާގަމަށް ކުރިމަތިލާ މީހުން އުމުރުން 25 އަހަރުވާން ޖެހޭ ކަމަށާއި، އިސްލާމީ ޝަރީއާ ނުވަތަ ގާނޫނު ރޮނގުން ފުރަތަމަ ޑިގުރީ ހާސިލް ކޮށްފައިވާ މީހަކަށް ވާން ޖެހޭ ކަމަށެވެ. އަދި ފަނޑިޔާރު ކަމުގައި ނުވަތަ ގާނޫނީ ވަކީލުކަން ކުރުމުގައި ނުވަތަ މިދެކަމުގައި މަދުވެގެން 3 އަހަރު ދުވަހުގެ ތަޖުރިބާ ހުންނަން ޖެހޭ ކަމަށް ޖޭއެސްސީން ބުނެ އެވެ.
ޖޭއެސްސީގައި އިއުލާނުގައި ބުނެފައިވާ ގޮތުގައި، ޤާޟީ އަކަށް އަސާސީ މުސާރައަށް 37،700 ރުފިޔާ ލިބޭއިރު، ލިވިންގ އެލަވަންސްއަށް 18،000 ރުފިޔާ، ރިކްސް އެލަވަންސްއަށް 3300 ރުފިޔާ، ފޯނު އެލަވަންސްއަށް 1000 ރުފިޔާ އަދި މެޑިކަލް އިންޝުއަރެންސް ރައްޔިތުން މަޖިލީހުން ކަނޑައަޅާފައިވާ ގޮތުގެމަތިން ލިބޭނެ އެވެ.
މީގެ އިތުރުން ޖޭއެސްސީން ބުނީ، މަގާމަށް އެދި ހުށަހަޅާނީ 16 ޖުލައި 2026 ވަނަ ދުވަހުގެ 12:00 ގެ ކުރިން އެ ކޮމިޝަނުގެ ފަހިރެސް ޕޯޓަލް މެދުވެރިކޮށް ކަމަށެވެ. ނަމަވެސް އެޕްލިކޭޝަންގެ ގޮތުގައި ހާޑް ކޮޕީ ހުށަހަޅަން ބޭނުންވާ ފަރާތްތަކުން ސުންގަޑިހަމަވުމުގެ ކުރިން (16 ޖުލައި 2026 ވަނަ ދުވަހުގެ 12:00) އެ ކޮމިޝަނުގެ ކައުންޓަރަށް ހާޑްކޮޕީ ހުށަހެޅޭނެ ކަމަށް ބުނެފައިވެ އެވެ.
