ގިނަ އަދަދެއްގެ ޑްރަގާއި، މަނާ ބޭހާއި ބަނގުރަލާއެކު ހައްޔަރުކުރި މީހުންގެ ޝަރީއަތުގެ މަރުޙަލާ ފަށަނީ

މާލޭގައި ފުލުހުން ކުރިއަށްގެންދިޔަ ޑްރަގް އޮޕަރޭޝަނެއްގެ ތެރެއިން ހައްޔަރުކޮށް، ކެނެބިސް ޓްރެފިކް ކުރުމުގެ ދައުވާ އުފުލާފައިވާ ފަރާތްތަކުގެ ޝަރީއަތުގެ ކުރީގެ މަރުޙަލާތައް ނިންމައި، ޝަރީއަތް ފަށަން ތާވަލުކޮށްފިއެވެ.

މި މައްސަލައިގައި ކެނެބިސް ޓްރެފިކް ކުރުމުގެ ދައުވާ އުފުލާފައިވަނީ 4 މީހެއްގެ މައްޗަށެވެ. އެއީ ގއ.ވިލިނގިލި ޒޫމް، މުޙައްމަދު ތަޤިއްޔު، ކ.މާފުށީ ވާރޭވިލާ އަހުމަދު އަހުނަފް އަސްފާޤް، ގދ.ވާދޫ ޗިޗަންޑާގޭ ވިޝާމް މުޙައްމަދުގެ އިތުރުން ގއ.ވިލިނގިލީ ނައިންފްލާވަރ އީމާން މުޙައްމަދެވެ.

މި މައްސަލައިގައި ދައުވާ ލިބުނު އިތުރު ފަރާތެއްކަމަށްވާ އަމްޖަދު އަބްދުއްސައްތާރު ދައުވާއަށް އިއުތިރާފުވެ، އެތަކެއްޗަކީ އޭނާގެ ތަކެތިކަމަށް ވަނީ ބުނެފައެވެ. އެއާއެކު އޭނާގެ މައްޗަށް އަވަސް ނިޔާގެ ޝަރީއަތް ހިންގައި، އޭނާ އުމުރަށް ޖަލަށް ލުމާއެކު، އެއްލައްކަ ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން 2020 ވަނަ އަހަރު ވަނީ ޙުކުމް ކޮށްފައެވެ. އެއަށް ފަހު، 19 ސެޕްޓެމްބަރު 2021 ގައި އަޙްމަދު އަހުނަފް އަސްފާޤު އާއި އީމާން މުޙައްމަދު އާއި ވިޝާމް މުޙައްމަދު އާއި މުޙައްމަދު ތަޤިއްޔު ބަންދުން ދޫކޮށްލުމަށް އެކޯޓުން އަމުރުކުރުމުން ދައުލަތުން އެބައި އިސްތިއުނާފުކޮށް، އެމައްސަލަ ނިމުނީ ދައުލަތާއި އެއްކޮޅަށެވެ.

އާދިއްތަ ދުވަހުގެ އަޑުއެހުމުގައި އޮތީ ދިފާއުން ޝަރީއަތުގެ ކުރިން ހުށައަޅާފައިވާ ހުށައެޅުންތަކާއި ގުޅިގެން ގޮތެއް ނިންމުމެވެ. އެގޮތުން ދިފާއުގެ ހުށައެޅުންތަކާއި ގުޅިގެން ގާޒީ ނިންމަވާ ގޮތްތައް ވަނީ އިއުލާނު ކުރައްވާފައެވެ. ދިފާއުން ގިނަ ހުށައެޅުންތަކެއް ހުށައަޅާފައިވާއިރު، ދައުވާ ބާތިލުކަމާއި، ތަހުގީގު ފުރިހަމަ ނޫން ކަމާއި، ބައެއް ހެކިތައް ޝަރީއަތަށް ބަލައިނުގަތުމާއި ގުޅޭ ހުށައެޅުންތައް ދައުވާލިބޭ ފަރާތްތަކުން ވަނީ ހުށައަޅާފައެވެ.

މި މައްސަލައިގައި ދައުވާ ލިބޭ ފަރާތްތަކުން ހުށައަޅާފައިވާ ހުށައެޅުންތައް ބަލައިނުގަތުމަށް ގާޒީ ވަނީ ނިންމަވާފައެވެ. އެއާއެކު މި މައްސަލައިގެ ޝަރީއަތުގެ ކުރީގެ މަރުޙަލާ މިވަނީ ނިމިގެން ގޮސްފައެވެ. ދެން މި މައްސަލައިގެ އޮންނާނީ ޝަރީއަތް ފަށައި ހެކިބަސް ނެގުމެވެ. މި މައްސަލައިގެ ޝަރީއަތް ފެށުމަށް ތާވަލު ކޮށްފައިވަނީ މާރޗު 7 ގައެވެ. މި މައްސަލައިގެ ދައުވާލިބޭ ފަރާތްތަކުން ވަނީ ޝަރީއަތުގެ އަޑުއެހުންތައް ވީހާވެސް އަވަހަށް ތާވަލު ކުރުމަށް އެދިލައްވާފައެވެ.

މި މައްސަލައިގައި އެންމެ ފަހުން ބޭއްވި އަޑުއެހުމުގައި މި މައްސަލައިގައި ހިމެނޭ މުހައްމަދު ތަޤިއްޔުގެ ބޭސްފަރުވާ އާއި ގުޅިގެން ހުށައަޅާފައިވާ ކަންބޮޑުވުންތަކަށް ރިއާޔަތް ކުރައްވައި، އޭނާ ޝަރުތުތަކާއެކު ބަންދުން ދޫކޮށްލުމަށް ގާޒީ ވަނީއަމުރުކުރައްވާފައެވެ. ދެން ތިބި 3 މީހުން ބަންދުން ދޫކޮށްލާނެ ސަބަބެއް ނެތްކަމަށް ގާޒީ ވަނީ ނިންމަވާފައެވެ.

މި މައްސަލައާއި ގުޅޭގޮތުން ފުލުހުން ބުނެފައިވަނީ ކޯޓް އަމުރެއްގެ ދަށުން ހ. ވައިފިނި ހަވަނަ ފްލޯ ފާސްކުރިއިރު ގިނަ އަދަދެއްގެ މަސްތުވާތަކެތި ފެނިފައިވާ ކަމަށެވެ. އަދި މަނާ ބޭހާއި ބަނގުރާ ކަމަށް ޝައްކު ކުރެވޭ ދިޔާ އެއްޗެއްސާއި ގިނަ އަދަދެއްގެ ފައިސާވެސް ވަނީ ފެނިފައެވެ.