ޔޫތު ޗެމްޕިއަންޝިޕް ފުޓްބޯޅަ މުބާރާތުގައި ހޮނިހިރު ދުވަހުގެ ހަވީރު ކުޅުނު މެޗުގައި ބޮޑު ތަފާތަކުން ކުލަބު ގްރީން ސްޓްރީޓްސް ބަލިކޮށް މުބާރާތުގެ ސެމީ ފައިނަލުން އެންމެ ފަހުގެ ޗެމްޕިއަން ކުލަބު އީގަލްސް ފުރުސަތު ހޯދައިފިއެވެ.

ގައުމީ ފުޓްބޯޅަ ދަނޑުގައި ކުޅުނު މެޗުން އީގަލްސް މޮޅުވީ ގްރީން އަތުން 11-0 ގެ ތަފާތު ބޮޑު ނަތީޖާއަކުންނެވެ. މި މެޗުގައި އީގަލްސްގެ ތިން ކުޅުންތެރިއަކު ވަނީ ހެޓްރިކް ހަދާފައެވެ. އެގޮތުން އެ ޓީމުގެ މުޙައްމަދު ސަމާހު މޫސާ ފަތުހީ ހަތަރު ލަނޑު ޖެހިއިރު، އެ ޓީމުގެ ޒައިން ޒަފަރާއި، މުޙައްމަދު ރަޔާން މުސްއަދު މަންސޫރު ވަނީ ކޮންމެ ކުޅުންތެރިއަކު ހެޓްރިކެއް ހަދާފައެވެ.

މި މެޗުގެ ފުރަތަމަ ހާފުގައި އީގަލްސްއިން ހަ ލަނޑު ޖެހިއިރު، މެޗު ފަށައިގެން ހަތްވަނަ މިނެޓުގައި އޭރިއާ ތެރެއިން ފޮނުވާލި ހަމަލާއަކުން ހަސަން ސަހާފް ވަނީ އެ ޓީމަށް ލީޑު ނަގައިދީފައެވެ. އަދި އޭގެ ދެ މިނެޓު ފަހުން ހުސެއިން ޒައިން ހަނީފް ހުރަސްކޮށްދިން ބޯޅައަކުން ރަޔާން ވަނީ ލަނޑެއް ޖަހައި، އީގަލްސްގެ ލީޑު ފުޅާކޮށްދީފައެވެ.

މި މެޗުގެ 18 ވަނަ މިނެޓުގައި އޭރިއާ ތެރެއިން ލިބުނު ބޯޅައަކުން އީގަލްސްގެ ތިންވަނަ ލަނޑު ޖަހައިދިނީ ޒައިން ޒަފަރެވެ. އަދި އޭގެ ހަ މިނެޓު ފަހުން ސަމާހު ދިން ބޯޅައަކުން ރަޔާން ވަނީ އެ ޓީމުގެ ހަތަރުވަނަ ލަނޑު ޖަހައިދީފައެވެ. އަދި މެޗުގެ 38 ވަނަ މިނެޓުގައި ސަހާފް ނަގައިދިން ހުރަހަކުން ސަމާހު އީގަލްސްގެ ފަސްވަނަ ލަނޑު ޖަހައިދިންއިރު، ފުރަތަމަ ހާފު ނިމުމުގެ ކުރިން އެ ޓީމުގެ ހަވަނަ ލަނޑު ޖަހައިދިނީ މެޗުގައި މޮޅު ކުޅުމެއް ދެއްކި ސަމާހެވެ.

މި މެޗުގެ ދެވަނަ ހާފުގައިވެސް އީގަލްސްއިން މޮޅު ކުޅުމެއް ދެއްކިއިރު، މި ހާފު ފަށައިގެން 14 ވަނަ މިނެޓުގައި މުޙައްމަދު ފާލިލް ފާއިގް ހުރަސްކޮށްދިން ބޯޅައަކުން ސަމާހް ވަނީ ލަނޑެއް ޖަހައި، މެޗުގައި ހެޓްރިކް ހަދާފައެވެ. އަދި މެޗުގެ 75 ވަނަ މިނެޓުގައި ސަމާހު ހުރަސްކޮށްދިން ބޯޅައަކުން ޒައިން ޒަފަރު އީގަލްސްއަށް ލަނޑެއް ޖަހައިދިންއިރު، އޭގެ ދެ މިނެޓު ފަހުން ރަޔާން ވަނީ ލަނޑެއް ޖަހައި، މެޗުގައި ހެޓްރިކް ހަދާފައެވެ.

މި މެޗުގައި އީގަލްސްގެ ޒައިން ޒަފަރު ހެޓްރިކް ހަދާފައިވަނީ މެޗު ނިމެން 10 މިނެޓަށް ވެފައި ވަނިކޮށެވެ. އޭނާ މި ލަނޑު ކާމިޔާބުކުރީ ބަދަލު ކުޅުންތެރިއެއްގެ ގޮތުގައި ކުޅެން އެރި މުޙައްމަދު ޒައިން ހުރަސްކޮށްދިން ބޯޅައަކުންނެވެ. އަދި މެޗުގެ އިތުރު ވަގުތުގައި އީގަލްސްގެ ސަމާހު ވަނީ އެ ޓީމުގެ 11 ވަނަ ލަނޑު ކާމިޔާބުކޮށްދީފައެވެ.

މި މޮޅާއެކު ސެމީއަށް އީގަލްސް ދަތުރުކުރީ ގްރޫޕް އޭގެ އެއްވަނަ ޓީމުގެ ގޮތުގައެވެ. އެގޮތުން އީގަލްސްއަށް ކުޅުނު ހަތަރު މެޗުން 10 ޕޮއިންޓް ލިބުނުއިރު، ދެވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނަށް ހަތަރު މެޗުން ވަނީ ހަތް ޕޮއިންޓް ލިބިފައެވެ. ތިންވަނައިގައި އޮތް ސުޕަ ޔުނައިޓެޑް ސްޕޯޓްސް (ސަސް) އަށް ތިން މެޗުން ހަ ޕޮއިންޓް ލިބިފައިވާއިރު، ހަތަރުވަނައިގައި އޮތް ދަ ގްރާންޑޭ ސްޕޯޓްސް ކުލަބަށް ތިން މެޗުން ލިބިފައިވަނީ ތިން ޕޮއިންޓެވެ. އަދި ފުލުގައި އޮތް ގްރީން މި ފަހަރުގެ މުބާރާތް ނިންމާލީ މެޗަކުން މޮޅުނުވެއެވެ.

ގްރޫޕް އޭގެ އެއްވަނަ ޓީމުގެ ގޮތުގައި އީގަލްސް ސެމީއަށް ދަތުރުކުރިއިރު، ސެމީގައި އީގަލްސް ކުޅޭނީ ގްރޫޕް ބީގެ ދެވަނަ ހޯދި ޓީސީ ސްޕޯޓްސް ކުލަބާ އެވެ. އެ މެޗު ކުޅޭނީ އަންނަ ބުދަ ދުވަހުގެ ހަވީރެވެ.