ގްރީންގެ ކޯޗުކަމުން ނިޝްތާރު ވަކިވެއްޖެ، ކާމިޔާބީއާ މެދު ހުރީ ހިތްހަމަ ޖެހިފައި

ކުލަބު ގްރީން ސްޓްރީޓްސް އަށް އިރުޝާދު ދެމުން އައި އަލީ ނިސްތާރު މުޙައްމަދު، އެ ކުލަބު ދޫކޮށްލަން ނިންމައިފި އެވެ.

ގިނަ ދުވަސް ތަކެއް ވަންދެން ގްރީން އަށް އިރުޝާދު ދިން ނިސްތާރު އެކަން އިއުލާން ކޮށްފައި ވަނީ، އޭނާ ސޯޝަލް މީޑިއާގައި ކުރި ޕޯސްޓެއްގަ އެވެ. އެ ޕޯސްޓުގައި ނިސްތާރު ބުނެފައި ވަނީ، ގްރީންގައި ހޭދަ ކުރެވުނު މުއްދަތާއި، އެ ކުލަބާ އެކު ކުރެވުނު މަސައްކަތާ މެދު އޭނާ އުފާވާ ކަމަށެވެ.

މީގެ އިތުރުން ނިސްތާރު ވަނީ، އޭނާގެ އިރުޝާދުގެ ދަށުން ގްރީން އިން ކާމިޔާބީ ތަކެއް ހޯދާފައިވާ ކަމަށް ފާހަގަ ކޮށްފަ އެވެ. އެގޮތުން ދިވެހި ޕްރިމިއާ ލީގުގެ ތިން ވަނަ ހޯދުމުގެ އިތުރުން، ހަތަރު ވަނަ ހޯދިފައިވާކަން ނިސްތާރު ފާހަގަ ކުރި އެވެ. ހަމަ އެހެންމެ އެފްއޭ ކަޕާއި ޕެރްޒިޑެންޓްސް ކަޕްގެ ތިން ވަނަ ގްރީން އިން ހޯދާފައިވާ ކަމަށް ނިސްތާރު ބުންޏެވެ. 

އެއާ އެކު ނިސްތާރު ބުނީ، ބޮޑެތި ޓީމުތަކާ ވާދަކޮށް، އެ ޓީމުތައް ކައިރީގައި ވެސް ގްރީން އިން ގޮތް ދޫނުކޮށް ރަނގަޅަށް މަސައްކަތް ކުރި ކަމަށެވެ. ނިސްތާރު ބުނީ ގްރީން އިން ކުރިއަށް ދިޔައީ އެއް އާއިލާއެއްގެ ގޮތުގައި ކަމަށެވެ. އަދި ގްރީންގެ ކޯޗުކަން ދޫކޮށްލަން ނިންމުމަކީ އޭނާ ނިންމަން ޖެހުނު އުނދަގޫ ނިންމުމެއް ކަމަށް ވެސް ބުނެފައިވެ އެވެ. 

ގްރީންގެ ކޯޗުކަމާ ނިސްތާރު ހަވާލުވެފައި ވަނީ 2020 ވަނަ އަހަރު އެވެ. އެހެންކަމުން އޭނާ ވަނީ ފާއިތުވި ހަ އަހަރު ދުވަހު ވެސް، ގްރީން އަށް އިރުޝާދު ދީފަ އެވެ. ނިސްތާރުގެ ޕޯސްޓުގައި އޭނާ ބުނެފައި ވަނީ، ރާއްޖޭގައި މިހާ ދިގު މުއްދަތެއް ވަންދެން އެއް ކުލަބެއްގައި ހުރުމަކީ އެެހާ ފަސޭހަ ވެސް ކަމެއް ނޫން ކަމަށެވެ. އެންމެ ފަހުން ނިސްތާރުގެ އިރުޝާދުގެ ދަށުން ގްރީން އިން ނިމުނު ދިރާގު ދިވެހި ޕްރިމިއާ ލީގު ނިންމާލީ 10 ވަނައިގަ އެވެ.