ނިންމުން ބަދަލުކޮށް، ނިސްތާރު ގްރީންގައި މަޑު ކޮށްފި
ގްރީންގެ އިސްވެރިންނާ އެކު ކުރިއަށް ގެންދިޔަ މަޝްވަރާ ތަކަށް ފަހު ނިސްތާރު ވަނީ ކުލަބުގައި މަޑު ކުރަން ނިންމާފައި. އެއީ ގްރީންގެ އިސްވެރިން އެކަމަށް އެދުމުގެ ސަބަބުން. އަދި ނިސްތާރުގެ އިރުޝާދުގެ ދަށުން މިހާރު ގްރީން އިން ފަރިތަކުރުންތައް ވެސް ވަނީ ފަށާފައި.
ގްރީންގެ ކޯޗު ނިސްތާރު. | ސޯޝަލް މީޑިއާ
ކުލަބު ގްރީން ސްޓްރީޓްސްގެ ކޯޗުކަން ދޫކޮށްލަން ނިންމި ނަމަވެސް، އެ ނިންމުން ބަދަލުކޮށް ކުލަބުގައި މަޑު ކުރަން އަލީ ނިސްތާރު މުޙައްމަދު ނިންމައިފި އެވެ.
ހަ އަހަރު ދުވަސް ވަންދެން ގްރީން އަށް އިރުޝާދު ދިނުމަށް ފަހު، މިދިޔަ ހަފުތާގައި ނިސްތާރު ވަނީ އެ ކުލަބު ދޫކޮށްލަން ނިންމާފައިވާކަން ހާމަ ކޮށްފަ އެވެ. އެގޮތުން އޭނާ ވަނީ ސޯޝަލް މީޑިއާ މެދުވެރިކޮށް އެކަން ހިއްސާ ކޮށްފަ އެވެ. ގްރީން ދޫކޮށްލަން ނިސްތާރު ނިންމުމާ އެކު، އެތައް ބަޔަކު ވަނީ އޭނާގެ މަސައްކަތަށް ތައުރީފު ވެސް ކޮށްފަ އެވެ.
ގްރީންގެ ކޯޗުކަމުން ނިޝްތާރު ވަކިވެއްޖެ، ކާމިޔާބީއާ މެދު ހުރީ ހިތްހަމަ ޖެހިފައި
ނަމަވެސް، ގްރީންގެ އިސްވެރިންނާ އެކު ކުރިއަށް ގެންދިޔަ މަޝްވަރާ ތަކަށް ފަހު ނިސްތާރު ވަނީ ކުލަބުގައި މަޑު ކުރަން ނިންމައިފަ އެވެ. އެއީ ގްރީންގެ އިސްވެރިން އެކަމަށް އެދުމުގެ ސަބަބުންނެވެ. އަދި ނިސްތާރުގެ އިރުޝާދުގެ ދަށުން މިހާރު ގްރީން އިން ފަރިތަކުރުންތައް ވެސް ވަނީ ފަށައިފަ އެވެ.
މިވަގުތު ގްރީން އިން ތައްޔާރު ވަމުން އަންނަނީ ދިވެހި ޕްރިމިއާ ލީގުގެ ކޮލިފިކޭޝަންގައި ވާާދަ ކުރުމަށެވެ. ކޮލިފިކޭޝަންގައި ޖުމުލަ ހަ ޓީމެއް ވާދަ ކުރާއިރު، މިހާތަނަށް ހަތަރު ޓީމަކަށް ވަނީ ޖާގަ ޔަގީންވެފަ އެވެ. އެއީ ގްރީން އާއި ޓީސީ ސްޕޯޓްސް ކުލަބުގެ އިތުރުން، ބިސް ބުރު ސްޕޯޓްސް ކުލަބު އަދި ހއ. ދިއްދޫ އެވެ. ކޮލިފިކޭޝަންގެ ބާކީ ދެ ޖާާގަ ދެން ލިބޭނީ ސައުތު ރީޖަން ލީގުގެ ޗެމްޕިއަން ޓީމު އަދި ސެންޓްރަލް ރީޖަން ލީގުގެ ޗެމްޕިއަން ޓީމަށެެވެ.
ހަ ޓީމު ވާދަ ކުރާ ކޮލިފިކޭޝަން އިން ހަތަރު ޓީމަކަށް އަންނަ ސީޒަންގެ ދިވެހި ޕްރިމިއާ ލީގުން ޖާގަ ލިބޭނެ އެވެ. ނިސްތާރުގެ އިރުޝާދުގެ ދަށުން މީގެ ކުރިން ގްރީން އިން ވަނީ ޕްރިމިއާ ލީގުގެ ތިން ވަނަ އަދި ހަތަރު ވަނަ ހޯދައިފަ އެވެ. އަދި އެފްއޭ ކަޕް އާއި ޕްރެޒިޑެންޓްސް ކަޕްގެ ތިން ވަނަ ވެސް ހޯދާފައިވެ އެވެ.
