މާލެހިޔާ ފްލެޓްތަކުގެ ފުރަގަހުގައި ހުޅުވި ފްލޫ ކްލިނިކް ހިންގި އިމާރާތް އިންޑޯ ވޮލީއަށް ޚާއްސަކުރަނީ
29 ޖެނުއަރީ 2022 | ހޮނިހިރު 08:43ވޮލީ ކޯޓުގެ މަސައްކަތްތައް ކުރުމަށް މާލެ ސިޓީ ކައުންސިލްގެ ހުއްދައަށް ވަނީ އެދިފައި
މާލެހިޔާ ފްލެޓްތަކުގެ ފުރަގަހުގައި ހުޅުވި ފްލޫ ކްލިނިކް ހިންގި އިމާރާތް
މާލެހިޔާ ފްލެޓްތަކުގެ ފުރަގަހުގައި ހުޅުވި ފްލޫ ކްލިނިކް ހިންގި އިމާރާތުގައި އިންޑޯ ވޯލީއަށް ޚާއްސަ ކުރުމަށް ނިންމާފައިވާ ކަމަށް ޔޫތު މިނިސްޓްރީން ބުނެފިއެވެ.
ރާއްޖެއެމްވީއަށް ޔޫތު މިނިސްޓަރު އަހުމަދު މަހުލޫފް ވިދާޅުވީ އެބިން އިންޑޯ ވޮލީއަށް ޚާއްސަ ކޮށްފައިވާ ކަމަށެވެ. ވޮލީ ކޯޓުގެ މަސައްކަތްތައް ކުރުމަށް މާލެ ސިޓީ ކައުންސިލްގެ ހުއްދައަށް އެދިފައިވާ ކަމަށާއި، މިފެށޭ ހަފުތާ ތެރޭގައި ހުއްދަ ލިބޭނެ ކަމުގެ މައުލޫމާތު ލިބިފައިވާ ކަމަށް މިނިސްޓަރު ވިދާޅުވިއެވެ. އަދި ވިދާޅުވީ ހުއްދަ ލިބުނުހާ އަވަހަށް އަމަލީ މަސައްކަތް ފެށޭނެ ކަމަށެވެ.
މާލޭ ހިޔާ ފްލެޓުތަކުގެ ފުރަގަހުގައި ދަގަނޑު ހޮޅިއާއި ޓިނާއި ފިލާ ފަދަ ތަކެތި ބޭނުންކޮށްގެން ހަދާފައިވާ އެތަން އެންމެ ފުރަތަމަ ބޭނުން ކޮށްފައިވަނީ ޕީޕީއެމުން ރުމާލު 2 ޖަގަހަ ހިންގުމަށެވެ. އޭގެ ފަހުން އެޗްޕީއޭއިން އެތަނުގައި ފްލޫ ކްލިނިކެއް ހިންގި އެވެ. އޭގެފަހުން އެތަން ބަންދުކޮށްފައި ހުންނަތާ ގިނަ ދުވަސްތަކެއް ވުމާއެކު މަސްތުވާތަކެތި ބޭނުންކުރާ މީހުންގެ ޖަގަހައަށް އެތަން ވެފައިވާ ކަމަށް ބައެއް އާއްމުން ތުހުމަތު ކުރަން ފެށިއެވެ. އެމައްސަލަ ފެންމަތިވެފައިވަނިކޮށް އެ އިމާރާތުގައި ހުކުރު ދުވަހުގެ މެންދުރުފަހު 2:30 ހާއިރު އަލިފާން ރޯވެ ބޮޑެތި ގެއްލުންތަކެއް ލިބިފައިވެއެވެ.
މިއަދާ ހަމައަށް އެތަނުގައި ރަލާއި އެނޫންވެސް މަސްތުވާތަކެތި ބޭނުންކުރަމުން އައި ކަމަށާއި, އެކަމުގައި އުޅޭ މީހުން ނިދައި ދިރިއުޅެމުން އައީވެސް އެތަނުގައި ކަމަށް ބައެއް އާއްމުން ބުނެއެވެ. އެސަރަހައްދުގައި ދިރިއުޅޭ ބައެއް އާއްމުން ބުނާ ގޮތުގައި އެއިމާރާތުގެ ކުނި ވަސް މުޅި ސަރަހައްދަށް ދުވާ އެކަމުގެ އުދަނގޫ ވަރަށް ބޮޑަށް ފޯރާ ކަމަށެވެ.
ރާއްޖެއެމްވީން އެތަނަގަށް ގޮސް ބެލިއިރު އެތަނުގައި ބައެއް ޒުވާނުން ނިދާފައި ތިއްބެއެވެ. މީގެ އިތުރުން ކެއުމަށް ބޭނުންކުރާ އެކިބާވަތުގެ ކާ ތަކެތި ކުނިކޮށްފައި އެތާގައި ބަހައްޓާފައި ހުއްޓެވެ. އެއިމާރާތުގައި ފާރުތަކުގައި ވަނީ ބޭއަދަބީ ބަސްތައް ވެސް ލިޔެފައެވެ. އަދި އިމާރާތުގައި ހުރި ފާޚާނާ ވެސް ވަނީ ބޭނުން ނުކުރެވޭ މިންވަރަށް ހަލާކުކޮށްލާފައެވެ. ގިނަ އަދަދަކަށް އިމާރާތުގެ ކުނި ހުރިއިރު، މަސްތުވާތަކެތި ބޭނުންކުރާ ކަމަށް ތުހުމަތު ކުރެވޭ ޒުވާނުންތަކެއް އެތަނުގައި ދަނީ ދިރިއުޅެމުންނެވެ. ދެ ފަންގިފިލާއަށް ހަދާފައި ހުރި އެއިމާރާތުގައި ގިނަ އަދަދެއްގެ ގޮދަޑިވެސް އަޅާފައި ހުއްޓެއެވެ.
އެބިމުގެ މިލްކުވެރި ފަރާތަކާމެދު ސުވާލު ކުރުމުން މާލޭގެ މޭޔަރު ޑރ. މުހައްމަދު މުއިއްޒު ވިދާޅުވީ, އެއީ ސިޓީ ކައުންސިލާ އެއްވެސް ގުޅުމެއް އޮތް ތަނެއް ނޫން ކަމަށެވެ.
