ސަލާހުގެ ލަނޑާއެކު މިސްރު މޮޅުވިއިރު، ނައިޖީރިއާ ދެވަނަ ބުރަށް

އެފްރިކާ ކަޕް އޮފް ނޭޝަންސްގައި ހޮނިހިރު ދުވަހުގެރޭ ކުޅުނު މެޗުން ގިނީ-ބިސާއު އަތުން މިސްރު މޮޅުވިއިރު، ސޫދާން ބަލިކޮށް ނައިޖީރިއާއިން ދެވަނަ ބުރުގެ ޖާގައެއް ކަށަވަރުކޮށްފިއެވެ.

ކެމަރޫނޫގައި ކުރިއަށްދާ މި މުބާރާތުގެ ގްރޫޕް ޑީގައި ކުޅުނު މެޗުން މިސްރު މޮޅުވީ ގިނީ-ބިސާއު އަތުން 1-0 ގެ ނަތީޖާއަކުންނެވެ.

މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ ފުރަތަމަ ހާފުގައި ދެ ޓީމަށްވެސް ވަނީ ލީޑު ނަގަން ރަނގަޅު ފުރުސަތުތަކެއް ލިބި ބޭކާރުވެފައެވެ. މި މެޗުގައި ފެނިގެންދިޔަ ހަމައެކަނި ލަނޑު މިސްރުން ކާމިޔަބުކޮށްފައިވަނީ މެޗުގެ 69 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން މުހައްމަދު ސަލާހެވެ.

އޭގެ ފަހުން މެޗުގެ 81 ވަނަ މިނެޓުގައި ގިނީ-ބިސާއުގެ މާމާ ބާލްޑޭ ވަނީ ލަނޑެއް ޖަހައި، އެ ޓީމަށް ނަތީޖާ އެއްވަރުކޮށްދީފައެވެ. އެކަމަކު އޭގެ ކުރިން މިސްރުގެ އޮމާރް ކަމާލަށް ފައުލުކުރި ކަމަށް ނިންމައި، ވީޑިއޯ އެސިސްޓަންޓް ރެފުރީ (ވިއޭއާރް) ބެލުމަށްފަހު ރެފުރީ ވަނީ އެ ލަނޑު ބަލައިނުގަންނަން ނިންމާފައެވެ.

މި މެޗުން މިސްރު މޮޅުވިއިރު، މުބާރާތުގައި ކުޅުނު ފުރަތަމަ މެޗުން އެ ގައުމު ވަނީ ނައިޖީރިއާ އަތުން 1-0 ގެ ނަތީޖާއަކުން ބަލިވެފައެވެ. އެއާއެކު ދެވަނަ ބުރުގެ ޖާގައެއް ނައިޖީރިއާއިން ހޯދީ 3-1 ގެ ނަތީޖާއަކުން ސޫދާން ބަލިކުރުމަށްފަހުއެވެ.

ގްރޫޕް ޑީގައި މިހާތަނަށް ކޮންމެ ޓީމަކުންވެސް ދެ މެޗު ކުޅެފައިވާއިރު، އެއްވަނައިގައި ނައިޖީރިއާ އޮތީ ކުޅުނު ދެ މެޗުންޗެސް މޮޅުވެ ހަ ޕޮއިންޓާއެކުއެވެ. އަދި ދެވަނައިގައި މިސްރު އޮތީ ތިން ޕޮއިންޓާއެކުއެވެ. ތިންވަނައިގައި އޮތް ގިނީ-ބިސާއު އާއި ހަތަރުވަނައިގައި އޮތް ސޫދާނަށް ލިބިފައިވަނީ އެންމެ ޕޮއިންޓެކެވެ.