އިތުރު އެކައުންޓެންޓުން ތަމްރީނު ކުރުމުގެ ޕްރޮޖެކްޓެއްގެ މަސައްކަތް އިކޮނޮމިކް މިނިސްޓްރީއާއެކު ކުރިއަށް އެބަދޭ: ސީއޭ މޯލްޑިވްސް
9 ޖެނުއަރީ 2022 | އާދީއްތަ 12:19މި ޕްރޮޖެކްޓް މެދުވެރިކޮށް 500 ފުރުސަތު ހުޅުވިގެންދާނެ
އިންސްޓިޓިއުޓް ފޮރ ޗާޓާޑް އެކައުންޓެންޓްސް އޮފް ދަ މޯލްޑިވްސްގެ ވައިސް ޕްރޮޒިޑެންޓް ހަސަން މުހައްމަދު
އިތުރު އެކައުންޓެންޓުން ތަމްރީނު ކުރުމުގެ ޕްރޮޖެކްޓެއްގެ މަސައްކަތް އިކޮނޮމިކް މިނިސްޓްރީއާއެކު ކުރިއަށްދާ ކަމަށް އިންސްޓިޓިއުޓް ފޮރ ޗާޓާޑް އެކައުންޓެންޓްސް އޮފް ދަ މޯލްޑިވްސް (ސީއޭ) އިން ބުނެފިއެވެ.
ރާއްޖެޓީވީގެ "ފަސްކާފު" ޕްރޮގްރާމުގައި ވާހަކަ ދައްކަވަމުން ސީއޭ މޯލްޑިވްސްގެ ވައިސް ޕްރޮޒިޑެންޓް ހަސަން މުހައްމަދު ވިދާޅުވީ، އިކޮނޮމިކް މިނިސްޓްރީއާއެކު އިތުރު އެކައުންޓެންޓުން ތަމްރީނު ކުރުމުގެ ޕްރޮޖެކްޓެއްގެ މަސައްކަތް ކުރަމުންދާ ކަމަށެވެ. އަދި މި ޕްރޮޖެކްޓް މެދުވެރިކޮށް 500 ފުރުސަތު ހުޅުވިގެންދާނެ ކަމަށް ގަބޫލުފުޅުކުރައްވާ ކަމަށެވެ.
ހަސަން ވިދާޅުވީ ސީއޭގެ އޮފީސް ހެދުމުގެ މަސައްކަތް ވެސް ކުރިއަށްދާ ކަމަށެވެ. އަދި މިއަހަރުގެ ކުރީކޮޅުގައި އޮފީސް ނިމޭނެ ކަމަށާއި މި ދާއިރާއިން އެކައުންޓެންޓުން ތަމްރީނުކޮށް، މީހުން ބިނާކުރުމަށް ގިނަ މަސައްކަތްތަކެއް ކުރަމުންދާ ކަމަށެވެ.
ހަސަން މިހެން ވިދާޅުވެފައިވާއިރު، ޗާޓަރޑް ޕްރޮފެޝަނަލް އެކައުންޓެންޓުން ތަމްރީނު ކުރުމަށް 150 ސްކޮލަރޝިޕްގެ ފުރުސަތު ހަޔަރ އެޑިއުކޭޝަން މިނިސްޓްރީން ވަނީ ހުޅުވާލާފައެވެ. ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވީ، ސްކޮލަރޝިޕް ފުރުސަތާ ގުޅޭ ސްކީމުގެ ދަށުން 50 ފުރުސަތު ޕަބްލިކް ސެކްޓަރއަށް ޚާއްސަކޮށްފައިވާއިރު، 100 ފުރުސަތު ޚާއްސަކޮށްފައިވަނީ ޕްރައިވެޓް ސެކްޓަރއަށް ކަމަށެވެ. މިއީ އެކައުންޓިންގ ދާއިރާއިން މީހުން ބިނާކުރުމަށް ހުރި ގޮންޖެހުންތަކަށް ހައްލު ހޯދުމަށް މުހިއްމު ކަމެއްކަމަށް މިނިސްޓަރ ވިދާޅުވިއެވެ.
އެކައުންޓިންގ ދާއިރާއިން މީހުން ބިނާކުރުމަކީ މިވަގުތު ކުރަން ޖެހިފައިވާ ވަރަށް މުހިންމު މަސައްކަތެއް ކަމަށާއި، މި ޕްރޮފެޝަން ތަރައްގީ ކުރުމަށްޓަކައި، އިންސްޓިޓިއުޓް އޮފް ޗާޓަޑް އެކައުންޓެންޓްސް އޮފް ދަ މޯލްޑިވްސްއަށް ބޭނުންވާ ހުރިހާ އެހީތެރިކަމެއް ސަރުކާރުން ފޯރުކޮށްދެއްވާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވެސް ވަނީ ދާދި ފަހުން ވިދާޅުވެފައެވެ. ރައީސްގެ އެ ވާހަކަފުޅަށް އަލިއަޅުއްވާލައްވައި މިނިސްޓަރ ވަނީ، މި ފުރުސަތުތަކަކީ އެ މަގުސަދު ހާސިލު ކުރުމުގެ ގޮތުން ހުޅުވާލާ ފުރުސަތުތަކެއްކަމަށް ބަޔާން ކުރައްވާފައެވެ.
މިި ދާއިރާގައި ވެސް ދިވެހިންނަށްވުރެ ގިނަކަމަށް ފާހަގަކުރެވެނީ ބިދޭސީ އެކައުންޓެންޓުން ކަމަށް ރައީސް ވިދާޅުވިއެވެ. އަދި މިހާރުގެ ތަފާސްހިސާބުތަކަށް ބަލާއިރު، ރާއްޖޭގެ ޕްރައިވެޓް ސެކްޓަރގައި ގާތްގަނޑަކަށް 4500އަށްވުރެ ގިނަ ބިދޭސީން އެބަ މަސައްކަތް ކުރާކަމަށާއި، ރާއްޖޭގައި އިންކަމް ޓެކްސް ދައްކާ މީހުންގެ 15 އިންސައްތައަކީ އެކައުންޓިންގ ދާއިރާގެ މީހުން ކަމަށް ރައީސް ވިދާޅުވިއެވެ. ވުމާއެކު، ޕަބްލިކް ސެކްޓަރއަށާއި ޕްރައިވެޓް ސެކްޓަރއަށް އަމާޒުކޮށް ވަކިން ފުރުސަތުތަކެއް މިނިސްޓްރީން މިހާރު މިވަނީ ފަހިކޮށްދީފައެވެ.
މިއަދު ރާއްޖެ މިއޮތީ ދިވެހި އެކައުންޓެންޓުންނާއި އޮޑިޓަރުން އުފައްދައި ތަމްރީނު ކުރުމަށް، ވަރަށް ބޮޑު އިސްކަމެއް ދޭންޖެހޭ ހާލަތެއްގައި ކަމަށް ވެސް ރައީސް ވަނީ ވިދާޅުވެފައެވެ.
