2025 ވަނަ އަހަރަށް ލަފާކުރާ އޮޑިޓަރ ޖެނެރަލް އޮފީހުގެ ބަޖެޓުގެ ގޮތުގައި 114 މިލިއަން ރުފިޔާގެ ބަޖެޓެއް ފާސްކޮށްފިއެވެ.

އަންނަ އަހަރަށް ފާސްކުރި އޮޑިޓަރ ޖެނެރަލް އޮފީހުގެ ޖުމްލަ ބަޖެޓުގެ އަދަދަކީ 114،497،312 (ސަތޭކަ ސާދަ މިލިޔަން ހަތަރުލައްކަ ނުވަދިހަ ހަތް ހާސް ތިންސަތޭކަ ބާރަ) ރުފިޔާއެވެ.

ހޯމަ ދުވަހުގެ ރައްޔިތުންގެ މަޖިލީހުގެ މިއަދުގެ ޖަލްސާގައި އޮޑިޓަރޖެނެރަލް އޮފީހުގެ ބަޖެޓް ފާސްކޮށްފައި ވަނީ މަޖިލީހުގެ 75 މެމްބަރުންގެ ވޯޓާއެކުގައެވެ. އެ ބަޖެޓު ފާސްކޮށްފައި ވަނީ ކޮމިޓީން ނިންމި ގޮތަށް އެއްވެސް ބަދަލެއް ގެނައުމަކާއި ނުލައެވެ.

ހޯމަ ދުވަހުގެ ޖަލްސާގައި އޮޑިޓަރ ޖެނެރަލް އޮފީހުގެ ބަޖެޓާއި މެދު ކޮމިޓީން ނިންމި ގޮތުގެ ތަފްސީލް ހިއްސާކޮށްދެއްވީ މާމިގިލީ ދާއިރާގެ މެމްބަރު އަދި މާލިއްޔަތު ކޮމިޓީގެ މުޤައްރަރު ޤާސިމް އިބްރާހިމްއެވެ. އޮޑިޓަރ ޖެެނެރަލްގެ އޮފީހުގެ ބަޖެޓަކީ ކޮންމެ އަހަރެއްގެ ވެސް އެ އަހަރެއްގެ ބަޖެޓް ފާސްކުރުމުގެ ކުރިން މަޖިލީހަށް ހުށަހަޅާ ފާސްކުރާ ބަޖެޓަކަށް ވާއިރު، އޮޑިޓަރ ޖެނެރަލްގެ އޮފީހުގެ ބަޖެޓަށް ކޮމިޓީ މަރުހަލާގައި ބަދަލުތަކެއް ގެނެސްފައިވާނެ ކަމަށް އޭނާ ވިދާޅުވިއެވެ.

އެގޮތުން ޕަބްލިކް ސެކްޓަރ އިންވެސްޓްމެންޓް ޕްރޮގްރާމް އަށް ބަދަލު ގެނެސްފައިވާނެ ކަމަށް އޭނާ ވިދާޅުވިއެވެ. މީގެ އިތުރުން ރިކަރަންޓް އަދި ކެޕިޓަލް ހަރަދުގެ ގޮތުގައި 80.4 މިލިޔަން ރުފިޔާ ހިމަނާފައިވެއެވެ. އެތަފާތު ގެނެސްފައި ވަނީ ހުޅުމާލޭގައި ހަދާ އެ އޮފީހުގެ އައު އިމާރާތުގެ މަސައްކަތް ހިމެނުމަށް ކޮމިޓީ އަށް ފެންނާތީ ކަމަށް ޤާސިމް ވިދާޅުވިއެވެ.

އޮޑިޓް އޮފީހުން ހުޅުމާލޭގައި އަޅާ އިމާރާތަށް 19 މިލިޔަން ރުފިޔާގެ ބަޖެޓެއް ހަމަޖެއްސުމަށް މާލިއްޔަތު ކޮމިޓީ އިން ހުށަހެޅިއެވެ. އެހެންނަމަވެސް ފިނޭންސުން ވަނީ އެ އަދަދު 34 މިލިޔަނަށް ހެދުމަށް ބަދަލުކުރުމަށް ލަފާދީފައެވެ. 114 މިލިޔަން ރުފިޔާގެ ބަޖެޓެއް އޮޑިޓަރ ޖެނެރަލްގެ އޮފީހަށް ހުށަހަޅާފައިވަނީ އެގޮތުގެ މަތިންނެވެ.

އެ ބަޖެޓުގެ އިތުރު ތަފްސީލަށް ބަލާއިރު ރިކަރެންޓު ޚަރަދާއި އޮފީސް ހިންގުމުގެ ޚަރަދަށް 80،497،312 ( އަށްޑިހަ މިލިޔަން ހަތަރު ލައްކަ) ރުފިޔާ، ޕީއެސްއައިޕީ އަށް 34،000،00 (ތިރީސް ހަތަރު މިލިޔަން) ރުފިޔާ ވަނީ ހިމަނާފައެވެ.