އޮޑިޓް އޮފީސް އޮޑިޓް ކޮށްދޭނެ ބަޔަކު ހޯދަނީ
ހޯދަމުންދަނީ އެއްލައްކަ ރުފިޔާއަށްވުރެ ބޮޑުނޫން އަގެއްގައި އެކަން ކޮށްދޭނެ ފަރާތެއް
މާލިއްޔަތު ކޮމިޓީއަށް އޮޑިޓް އޮފީހުގެ ބޭފުޅުން ހާޒިރު ކުރެއްވި ދުވަހެއްގެ ތެރެއިން
އޮޑިޓަރ ޖެނެރަލްގެ އޮފީހުގެ 2023 ވަނަ އަހަރުގެ އަހަރީ އޮޑިޓް ކޮށްދޭނެ ބަޔަކު ހޯދަން އިއުލާނުކޮށްފިއެވެ.
އެކަމާ ގުޅޭގޮތުން ރައްޔިތުންގެ މަޖިލީހުގެ އިދާރާއިން އާދިއްތަ ދުވަހު ކުރި އިއުލާނެއްގައި ބުނީ، އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސްގައި ޕަބްލިކް އިންޓްރެސްޓް އެންޓިޓީ އޮޑިޓަރސްގެ ގޮތުގައި ރަޖިސްޓްރީކޮށްފައިވާ އޮޑިޓް ފަރމްއެއް ހަމަޖެއްސުމަށް، ރައްޔިތުންގެ މަޖިލީހުގެ މާލިއްޔަތު ކޮމިޓީން ބޭނުންވާކަމަށެވެ.
އަދި އޮޑިޓް ކޮށްދޭނެ ފަރާތެއް ބޭނުންވަނީ -/100,000 (އެއްލައްކަ) ރުފިޔާއަށްވުރެ ބޮޑުނޫން އަގެއްގައިކަންވެސް ފާހަގަކޮށްފައިވެއެވެ.
މި މަސައްކަތް ކޮށްދެއްވުމަށް ޝައުޤުވެރިވާ ފަރާތްތަކުން އީމެއިލް މެދުވެރިކޮށް ރަޖިސްޓްރީ ކުރެއްވުމަށްފަހުއިއުލާނާއެއްގޮތަށް އަންދާސީ ހިސާބު ހުށަހެޅުމަށް ވަނީ އެދިފައެވެ.
