ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަޤާމުގައި އޭނާ ހުންނެވި މުއްދަތުގައި ފެނަކައިން ކޮށްފައިވާ އެންމެހައި މުއާމަލާތްތައް އިންސާފުވެރިކަމާ އެކު، ދެ ފުށް ފެންނަ ގޮތެއްގެ މަތިން އަދި ސިޔާސީ ކުލައެއް ނުޖެހި ތަހުގީގު ކުރުމަށް މިނިވަން މުއައްސަސާތަކަށް ގޮވާލައްވާ ކަމަށާއި، އެކަމުގައި ފުރިހަމަ އެއްބާރުލުން ދެއްވާނެ ކަމަށް، ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު އަޙުމަދު ސައީދު މުޙައްމަދު ވިދާޅުވެއްޖެ އެވެ.

ސައީދު މިހެން ވިދާޅުވީ އޮޑިޓާ ޖެނަރަލްގެ އޮފީހުން އާންމު ކޮށްފައިވާ، ފެނަކަ ކޯޕަރޭޝަންގެ 2021 ވަނަ އަހަރުން، 2023 ވަނަ އަހަރުގެ އޮޑިޓް ރިޕޯޓާ ގުޅިގެން ނެރުނު ބަޔާނެއްގަ އެވެ.

އެ ބަޔާނުގައި ސައީދު ވިދާޅުވެފައި ވަނީ، ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަގާމުގައި ހޭދަ ކުރެއްވި މުއްދަތުގެ ތެރޭގައި، އެ ކުންފުނީގެ ބޭނުމަށް ކުރެވިފައިވާ އެންމެހާ ޕްރޮކިއުމަންޓް މުއާމަލާތްތައް ކުރިއަށް ގެންގޮސްފައި ވާނީ، ކުންފުނީގެ އެތެރޭގައި ހެދިފައިވާ އެންމެހާ އުސޫލުތަކާއި، ޤަވާއިދުތަކުގެ ތެރެއިން ކުންފުނީގެ ބޮޑުން އެކަށައަޅާފައިވާ އިދާރީ އޮނިގަނޑުގެ ތެރެއިން ކަމަށެވެ.

ސައީދު ވިދާޅުވީ ކުންފުނީގެ އިދާރީ އޮނިގަނޑާ ޚިލާފަށް އެއްވެސް ބަޔަކަށް މުދަލެއް، ޚިދުމަތެއް، ކޮންޓްރެކްޓަރެއް، އަދި ޕްރޮޖެކްޓެއް ވެސް ދީފައި ނުވާނެ ކަމުގެ ޔަގީންކަން އަރުވާ ކަމަށެވެ. ހަމަ އެހެންމެ އެ މުއްދަތުގެ ތެރޭގައި އޭނާގެ އަމިއްލަ ބޭނުމަކަށް، ދައުލަތުގެ އެއްވެސް ފައިސާއެއް ބޭނުން ކޮށްފައި ނުވާނެ ކަމަށާއި، ނުހައްގު އެއްވެސް މަންފާއެއް ހޯދާފައި ނުވާނެ ކަމުގެ ފުރިހަމަ ޔަގީންކަން ވެސް އަރުވާ ކަމަށް ސައީދު ވަނީ ވިދާޅުވެފަ އެވެ.

އެކަން ފާހަގަ ކުރައްވައި ސައީދު ވިދާޅުވީ، އެޑިޓް އޮފީހުން އެ ފަދަ ރިޕޯޓެއް ނެރޭއިރު، އެ ކުންފުނިން ލިބެން ހުރި ހަގީގީ މައުލޫމާތު ލިބެން ހުރެމެ، އެ މައުލޫމާތުތައް ނުހޯދައި، އަދި ޚުދު އޭނާގެ ފަރާތުން ވެސް އެކަމުގެ އެއްވެސް މައުލޫމާތެއް ނުހޯދައި، އަވަސް އަރުވާލައިގެން ވަކި މަޤުސަދެއް ހާސިލު ކުރުމަށްޓަކައި ޚިލާފު މައުލޫމާތު ހިމަނައި، ރައްޔިތުންގެ މެދުގައި ނުތަނަވަސްކަން އުފެދޭ ގޮތަށް މި ދަނޑިވަޅުގައި ރިޕޯޓެއް ނެރުމަކީ ވަރަށް ޒިންމާދާރުކަން ކުޑަ ކަމެއް ކަމަށެވެ.

އަދި އެ ފަދަ ކަންކަމަކީ، މުއައްސަސާތަކުގެ މިނިވަންކަމާ މެދު ދިވެހި ރައްޔިތުން ސުވާލު އުފައްދާނެ ކަމެއް ކަމުގައި ނުވާނެ ކަމަށް ސައީދު ވިދާޅުވި އެވެ.

ސައީދުގެ ބަޔާން ނިންމާލަމުން ވިދާޅުވެފައި ވަނީ ޒަމާނުއްސުރެ ރައްޔިތުންނަށް ތަކުލީފަކަށް ވެފައިވާ ގެދަބުޅި އިންޖީނު ގެތަކާއި، ދިގު ގޮނޑީގެ އޮފީސް ތަކާއި، ބޮނބިނަރު ނެޓްވޯކުތައް އެންމެ ޒަމާނީ ފެންވަރަށް ބަދަލުކޮށް، އިރުއިރުކޮޅާ ކެނޑެމުން ދިޔަ ކަރަންޓުގެ ޚިދުމަތް ދެމެހެއްްޓެނިވި ނިޒާމެއްގެ ދަށުން ރައްޔިތުންނަށް ކަށަވަރު ކުރެވުނު ކަމުގެ އުފާ އަދި ވެސް ކުރެވޭ ކަމަށެވެ.

މީގެ އިތުރުން އޮޑިޓަ ޖެނަރަލް ފަދަ މިނިވަން މުއައްސަސާތަކުން ނެރޭ އެފަދަ ރިޕޯޓުތައް ވާން ވާނީ، ސިޔާސީ ނުފޫޒުން އެއްކިބާވެ ތިބެ ނެރެވޭ މިނިވަން ދެށުށް ފެންނަ ރިޕޯޓުތަކެއް ކަމުގައި ވެސް ސައީދު ވަނީ ފާހަގަ ކުރައްވައިފަ އެވެ. އެހެން ނޫން ނަމަ، ދިވެހި ޖުމްހޫރިއްޔާގެ ޤާނޫނު އަސާސީ އިން އުފައްދާފައިވާ އޮޑިޓަ ޖެނަރަލް އޮފީހަށް ދިވެހި ރައްޔިތުން ކުރާ އިތުބާރު ގެއްލިގެން ދިޔުމަކީ އެކަށީގެންވާ ކަމެއް ކަމަށް ސައީދު ފާހަގަ ކުރެއްވި އެވެ.