ހޯމް ސްޓޭ: ރައްޔިތުންނަށް އާމްދަނީ ލިބޭނެ ގޮތަށް މިކަން ފަސޭހައިން ބައްޓަން ކުރަން ރައީސް އަންގަވައިފި
2023 ގެ ނިޔަލަށް މުޅި ރާއްޖެއަށް ފަތުރުވެރިކަން ފުޅާކުރުމަކީ ރައީސްގެ ސިޔާސަތެއް
މ. ދިއްގަރުގައި ހޯމް ސްޓޭ ޓުއަރިޒަމް ފެށުމަށްޓަކައި ބޭއްވި ރަސްމިއްޔާތުގައި ޓޫރިޒަމް މިނިސްޓަރ ޑރ. އަބްދުﷲ މައުސޫމް ވާހަކަ ދައްކަވަނީ
ހޮނިހިރު ދުވަހު މ. ދިއްގަރުގައި ހޯމް ސްޓޭ ޓުއަރިޒަމް ފަށާފައިވާއިރު ރައްޔިތުންނަށް އާމްދަނީ ލިބޭނެ ގޮތަށް މިކަން ބައްޓަންކޮށް. މިކަން ފަސޭހަކުރަން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް އަންގަވާފައިވާ ކަމަށް ޓުއަރިޒަމް މިނިސްޓަރ އަބްދުﷲ މައުސޫމް ވިދާޅުވެއްޖެއެވެ.
މ. ދިއްގަރުގައި ހޯމް ސްޓޭ ޓުއަރިޒަމް ފެށުމަށްޓަކައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ވިދާޅުވީ ހޯމް ސްޓޭ ދިއްގަރަށް ތައާރަފުވެގެން ދިޔައީ ތާރީޚީ ދުވަހެއްގައި ކަމަށެވެ. އަދި 2023 ގެ ނިޔަލަށް މުޅި ރާއްޖެއަށް ފަތުރުވެރިކަން ފުޅާކުރުމަކީ ރައީސްގެ ސިޔާސަތެއް ކަމަށާއި މިއީ އެ ސިޔާސަތުގެ ފެށުން ކަމަށެވެ.
މިކަންތައްތައް ކާމިޔާބު ކުރެއްވުމުގައި އިސްދައުރެއް އަދާކުރެއްވީ ރައީސް ކަމަށް ވެސް މިނިސްޓަރ ވަނީ ވިދާޅުވެފައެވެ.
ޑރ.މައުސޫމް ވިދާޅުވީ ހޯމް ސްޓޭ ޓުއަރިޒަމް ދިއްގަރުގައި ތައާރަފު ކުރުމަށްޓަކައި އެ ރަށުގެ ޒުވާނުން ކުރި މަސައްކަތް ފެނިގެން ހިނގައްޖެ ކަމަށާއި މިކަމުން އިތުރު ހިތްވަރެއް ލިބިގެން ދިޔަ ކަމަށެވެ.
ހޯމް ސްޓޭ ޓުއަރިޒަމް ތައާރަފުވެގެންދާއިރު އެނދުގެ އަދަދު އެބަ އިތުރުކުރަން ޖެހޭ ކަމަށާއި އެންމެ ބޮޑު ގޮންޖެހުމަކަށް އޮތީ ދަތުރުފަތުރުގެ ނިޒާމުގައި ކަމަށް ވެސް މިނިސްޓަރ ފާހަގަކުރެއްވިއެވެ. ސަރުކާރުގެ ސިޔާސަތަކީ މީހުން ދިރިއުޅޭ ކޮންމެ ރަށަކުން 20 މިނެޓުން ދަތުރުކުރެވޭނެ ނިޒާމު ގާއިމުކުރުން ކަމަށާއި މިކަމުގެ ސަބަބުން ހައްލު ލިބިގެންދާނެ ކަމަށް މިނިސްޓަރ ވިދާޅުވިއެވެ.
ދިއްގަރުން ފާހަގަކުރެވުނީ ނަމޫނާ މެހެންމާރީއެއްކަން ފާހަގަކުރައްވާ ޓުއަރިޒަމް މިނިސްޓަރ ވިދާޅުވީ އެއީ ހިތުން އަންނަ ކަމެއް ކަމަށެވެ.
ކުރިއަށް އޮތް ތާނގައި ރާއްޖޭގެ އެހެން ރަށްތަކުގައި ވެސް ހޯމް ސްޓޭ ޓުއަރިޒަމް ތައާރަފުވެގެންދާނެ ކަމަށާއި އުންމީދަކީ މިއީ ރައްޔިތުންނަށް އިތުރު މަންފާތައް ލިބިގެންދާނެ ސިނާއަތަކަށްވުން ކަމަށް މިނިސްޓަރ ވިދާޅުވިއެވެ.
ޖެނުއަރީ އެއްވަނަ ދުވަހު ރާއްޖޭގައި ހޯމް ސްޓޭ އެންމެ ފުރަތަމަ ފަށައިގެންފައިވަނީ މ. ދިއްގަރު މޫރިތި ގެއިންނެވެ.
