މުސްތަގުބަލުގައި ޓޫރިޒަމް އެކި ދާއިރާތަކުގެ މަތީ މަގާމުތަކުގައި ވެރިންނަށް ތިބޭނީ ދިވެހިން: މިނިސްޓަރު މައުސޫމް
ވުއައްޒަފުންނަށް ކުރިއެރުންތަކެއް ހޯދައިދެވިފައިވޭ
ޓޫރިޒަމް މިނިސްޓަރު ޑރ. އަބްދުﷲ މައުސޫމް
މުސްތަގުބަލުގައި ޓޫރިޒަމް އެކި ދާއިރާތަކުގެ މަތީ މަގާމުތަކުގައި ވެރިންނަށް ތިބޭނީ ދިވެހިން ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެޓީވީގެ ފަސްކާފު ޕްރޮގްރާމްގައި މިނިސްޓަރު މައުސޫމް ވިދާޅުވީ, ޓޫރިޒަމް ދާއިރާ ކުރިއެރުވުމަށް ފާއިތުވި އަހަރުތަކުގައި ވަރަށް ގިނަ މަސައްކަތްތައް ކުރެވިފައިވާ ކަމަށެވެ. އެގޮތުން މުވައްޒަފުންނަށް ވެސް ކުރިއެރުންތައް ހޯދައިދެވިފައިވާކަން މިނިސްޓަރު ފާހަގަކުރެއްވިއެވެ.
މިނިސްޓަރު މައުސޫމް ވިދާޅުވީ މިނިމަމްވޭޖް ކަނޑައެޅުމާއި، ޕޮލިސީގެ ދަށުން ދިވެހިން ގެންނަން ކުރާ މަސައްކަތުގެ ނަތީޖާ ފެންނަމުންދާ ކަމަށެވެ. މިހާރު ރާއްޖޭގައި ވެސް ބޮޑެތި ޗެއިންތަކުގައި ކްލަސްޓަރ ޖެނަރަލް މެނޭޖަރުންގެ ގޮތުގައި ގިނަ ދިވެހިން ހަރަކާތްތެރިވަމުންދާ ކަމަށާއި، މުސްތަގުބަލުގައި ދިވެހިންގެ ނަންބަރުތައް އިތުރުވާނެ ކަމަށް މިނިސްޓަރު މައުސޫމް ވިދާޅުވިއެވެ. އަދި ވިދާޅުވީ ކުރިއަށް އޮތްތަނުގައި ޓޫރިޒަމްގެ މަތީ މަގާމުތަކުގައި ވެރިންގެ ގޮތުގައި މުޅިން ވެސް ތިބޭނީ ދިވެހިން ކަމަށެވެ.
ޓޫރިޒަމް ދާއިރާގައި މަސައްކަތްކުރާ އަންހެނުންނަށް އިޝާރަތް ކުރައްވައި މިނިސްޓަރު މައުސޫމް ވިދާޅުވީ ދާއިރާގައި އަންހެނުން މަސައްކަތް ކުރާ މިންވަރު ނިސްބަތުން މަދު ނަމަވެސް މިހާރު އެއަދަދު މަތިވަމުންދާ ކަމަށެވެ. މިއީ އަންހެނުންނަށް ފުރުސަތުތައް އޮތް ދާއިރާއެއް ކަމަށާއި، މި ދާއިރާއަށް އަންހެނުން ނުކުތުމާމެދު މުޖުތަމައުއިން ދެކޭގޮތް ނުރަނގަޅު ގޮތްތައް ބަދަލުވަމުންދާ ކަމަށް މިނިސްޓަރު މައުސޫމް ވިދާޅުވިއެވެ.
މިނިސްޓަރު މައުސޫމް ވިދާޅުވީ ޓޫރިޒަމްގެ އެކި ދާއިރާތަކުގައި އެކި އެލަވްގައި އަންހެނުން މަސައްކަތް ކުރަމުންދާ ކަމަށެވެ. އެގޮތުން މިހާރު ޓްރެވަލް އެޖެންސީތައް ހިންގުމުގައި އަންހެނުންގެ ދައުރުވަރަށް ބޮޑު ކަމަށް މިނިސްޓަރު މައުސޫމް ވިދާޅުވިއެވެ. އަދި ވިދާޅުވީ ރިސޯޓުތަކުގެ މެނޭޖަރުންގެ ލެވަލްގައި އަންހެނުން ހަރަކާތްތެރިވަމުންދާ ކަމަށެވެ.
މިނިސްޓަރު މައުސޫމް ވިދާޅުވީ ރާއްޖޭގެ ޓޫރިޒަމް ދާއިރާ ވަރަށް ކާމިޔާބު ކަމަށާއި، ރަން އަކުރުން ފަވާލެވޭ ކަމަށެވެ. ކުރިއަށް އޮތްތަނުގައި ދިވެހި އުފެއްދުންތައް ދާއިރާއަށް ނެރޭ މިންވަރު އިތުރުކުރާނެ ކަމަށާއި، އުފެންދުންތެރިކަމަށް ވެސް ހެޔޮ ބަދަލުތަކެއް އަންނާނެ ކަމަށް މިނިސްޓަރު މައުސޫމް ވިދާޅުވިއެވެ.
މިނިސްޓަރު މައުސޫމް ވިދާޅުވީ އުންމީދު ކުރަނީ 5 ވަނަ މާސްޓަރ ޕްލޭންއާ އެއްގޮތަށް ޓޫރިޒަމް ކުރިއަށް ގެންދެވި ދުވަހެއް ދުވަހަކަށް ދާއިރާ ކުރިއަރަމުން ގޮސް، ކޮންމެ ދުވަހަކީ ވެސް ރައްޔިތުންނަށް ފައިދާ ލިބޭނެ ދުވަހަކަށްވުން ކަމަށެވެ. އަދި ވިދާޅުވީ ޓޫރިޒަމްގެ ދާއިރާއިން ރައްޔިތުންނާއި ގައުމަށް އުފާވެރިކަން ލިބޭ ކަމަށެވެ.
