ޗެލްސީގެ އެކެޑަމީ ކޮންސަލްޓަންޓަކަށް ޓެރީ

ޗެލްސީގެ އެކެޑަމީ ކޮންސަލްޓަންޓެއްގެ ގޮތުގައި ޗެލްސީގެ ކުރީގެ ކެޕްޓަން ޖޯން ޓެރީ އެ ކްލަބާ އަލުން ގުޅިއްޖެއެވެ.

ކުޅުންތެރިއެއްގެ ގޮތުގައި ޗެލްސީގައި 15 އަހަރު ހޭދަކުރި ޓެރީ ވަނީ އެ ކްލަބާއެކު 15 ތަށި ހޯދާފައެވެ. ކުޅުން ހުއްޓާލުމަށްފަހު ޓެރީ ވަނީ އެސްޓަން ވިލާގައި އެސިސްޓެންޓް ކޯޗެއްގެ ގޮތުގައި 2018 އިން 2021 އަށް މަސައްކަތް ކޮށްފައެވެ.

އަންނަ މަހުން ފެށިގެން ޗެލްސީގެ އެކަޑަމީގައި ޓެރީ މަސައްކަތް ކުރާނެކަން ޗެލްސީން ވަނީ އިއުލާން ކޮށްފައެވެ. އޭގެ އިތުރުން ޓެރީ އޭނާގެ ސޯޝަލް މީޑިއާގައި ބުނީ ފްލެކްސިބަލްކޮށް މަސައްކަތް ކުރުމުގެ ފުރުސަތު ލިބުމަކީ އެންމެ މުހިންމުކަން ކަމަށާއި، ޗެލްސީގެ އެކަޑަމީގައި މަސައްކަތް ކުރަމުން އޭނާއަށް އިތުރުކަންތައްތަކަށް ވެސް ސަމާލުކަން ދެވޭނެ ކަމަށެވެ.

ޗެލްސީގެ ހެޑް އޮފް ޔޫތް ޑިވެލޮޕްމަންޓް ނީލް ބާތު ބުނީ ކުޅުންތެރިއެއްގެ ގޮތުގައި އަދި ކޯޗެއްގެ ގޮތުގައި ޓެރީ ހޯދާފައިވާ ތަޖުރިބާއާ ކާމިޔާބީތައް ޒުވާން ކުޅުންތެރިންނާ ހިއްސާކޮށް އެ ކުޅުންތެރިންގެ މުސަތަގުބަލު ބައްޓަން ކުރަންވީ ގޮތް ކިޔައިދިނުންވާނީ އެކަޑަމީއަށް ލިބިގެންދާނެ ކުރިއެރުމެއް ކަމަށެވެ.