ޕީއެސްޖީ ފަހު ވަގުތު ސަލާމަތްވިއިރު، ރާމޯސްއަށް ރަތެއް

ފްރެންޗް ލީގުގައި ބުދަ ދުވަހުގެރޭ ކުޅުނު މެޗުން ރެލިގޭޝަން ޒޯނުގައި އޮތް ލޯރިއެން އަތުން ފަހު ވަގުތު ޕީއެސްޖީ ސަލާމަތްވެއްޖެއެވެ.

ލޯރިއެންގެ ދަނޑުގައި ކުޅުނު މި މެޗު އެއްވަރުވީ 1-1 ގެ ނަތީޖާއަކުންނެވެ.

ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ މި މެޗުގެ ކުރީކޮޅު ލޯރިއެންގެ ތެރެމް މޮފީއަށް ވަނީ ލަނޑެއް ޖަހަން ހުސް ފުރުސަތެއް ލިބިފައެވެ. އެކަމަކު ހުހަށްހުރެ އޭނާ ފޮނުވާލި ހަމަލާ ޕީއެސްޖީގެ ގޯލްކީޕަރު ކޭލޯ މަވާސް ވަނީ ދިފާއުކޮށްފައެވެ. އެކަމަކު ފުރަތަމަ ހާފު ނިމުމުގެ ކުރިން ލޯރިއެންއިން ލީޑު ނެގިއިރު، މި ހާފު ނިމެން ފަސް މިނެޓަށް ވެފައި ވަނިކޮށް މި ލަނޑު އެ ޓީމަށް ކާމިޔާބުކޮށްދިނި ތޯމަސް މޮންކޯޑިއުންއެވެ.

މި މެޗުގެ ދެވަނަ ހާފުގައިވެސް ދެ ޓީމުން ގިނަ ފުރުސަތުތަކެއް ތަނަވަސްކުރިއިރު، މި ހާފުގައި ލިއޮނެލް މެސީ ތަނަވަސްކޮށްދިން ފުރުސަތަކުން ޕީއެސްޖީގެ އެންހެލް ޑި މާރިއާއަށް ވަނީ ހުރސް ފުރުސަތެއް ލިބިފައެވެ. އެކަމަކު އޭނާ ހުހަށްހުރެ ފޮނުވާލި ހަމަލާ ދިޔައީ ގޯލާ އަމާޒުނުވެއެވެ.

އޭގެ ފަހުން މި މެޗުގައި ޕީއެސްޖީއަށް އިތުރު މައްސަލަތަކެއް ކުރިމަތިވީ ފުރަތަމަ ހާފު ނިމެން ފަސް މިނެޓަށް ވެފައި ވަނިކޮށް ބަދަލު ކުޅުންތެރިއެއްގެ ގޮތުގައި ކުޅެން އެރި ޑިފެންޑަރު ސާޖިއޯ ރާމޯސްއަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ. އެކަމަކު މެޗުގެ އިތުރު ވަގުތުގައި އަޝްރަފް ހަކީމީ ހުރަސްކޮށްދިން ބޯޅައަކުން މައުރޯ އިކާޑީ ވަނީ ލަނޑެއް ޖަހައި، މި މެޗުން ޕީއެސްޖީ ސަލާމަތްކޮށްދީފައެވެ.

މި ނަތީޖާއާއެކުވެސް ތާވަލުގެ އެއްވަނައިގައި ޕީއެސްޖީ އޮތީ 13 ޕޮއިންޓުގެ ލީޑަކާއެކުއެވެ. އެގޮތުން ކުޅުނު 19 މެޗުން ޕީއެސްޖީއަށް 46 ޕޮއިންޓް ލިބިފައިވާއިރު، ދެވަނައިގައި އޮތް ނީސް އާއި ތިންވަނައިގައި އޮތް އޮލިމްޕިކް މާސޭއަށް ވަނީ 33 ޕޮއިންޓް ލިބިފައެވެ. އަދި ޕީއެސްޖީއާ އެއްވަރުކުރި ލޯރިއެން އޮތީ ތާވަލުގެ ފުލުން ދެވަނައިގައި 19 މެޗުން 16 ޕޮއިންޓާއެކުއެވެ.