ދިވެހިރާއްޖޭގެ އެތަކެއް ދޮޅަސް ދިވެހި ސިފައިން ދިވެހިދިދަ ޖަހާފައިވާ ދިވެހި އަސްކަރީ ޔުނިފޯމް ގައި ހަތިޔާރާ އެކު އެތައް ގައުމެއް ގައި އެތައް މަހެއް، އަހަރެއް ވަންދެން އުޅެއެވެ. އުޅެނީ ވެސް އެގައުމުތަކުގެ ސިފައިންގެ މަރުކަޒު ތަކާ އަސްކަރީ ކޭމްޕް ތަކުގައެވެ. ބަނގްލަދޭޝް އާ އެމެރިކާ އާއި އިނގިރޭސި ވިލާތާ ސްރީލަންކާ އެވެ. އަދި އިންޑިއާ ގައިވެސް ދިވެހި ސިފައިން ހަތިޔާރު ހިފައިގެން އުޅެއެވެ. އެގޮތަށް އެކަން ނުހިނގާ ވެރިކަމެއް ވެސް މިރާއްޖެ އަކަށް މިފަހަކުން ނާދެއެވެ.
އެކިބޭނުންތަކުގައި ދިވެހިސިފައިން އެގައުމު ތަކަށް ގޮސްއުޅެ އައިސް ވުމަކުން އެގައުމު ތަކުގެ ޕީޕީއެމުން ދުވަހަކުވެސް މޯލްޑިވްސް މިލިޓަރީ އައުޓްވެގެނެއް ނުދުވެއެވެ. އެގައުމުގައި ތިބި ދިވެހިސިފައިން ބާލަން ރަށުތެރެ ކުޑަކޮށް އެތަނުގައި ތިބި ދިވެހިންނަށް ބިރު ދައްކާ ދިވެހިރާއްޖެ އަށް މަލާމާތާ ފުރައްސާރަ ކުރާކަށް އެއްވެގެނެއް ވެސް ނޫޅެއެވެ. އަދިކިއެއްތަ އެގައުމު ތަކުގައި ތިބި ދިވެހިސިފައިން އަނބުރާ ގެންނާކަށް ވެސް މިއުޅޭ ޕީޕީއެމަކު ދުވަހަކު ވެސް އުޅެފައެއް ނުވެއެވެ. އޭގެ ކުރިންވެސް އޭރުވެސް އަދި މިހާރުވެސް ކަން ހިނގަނީ އެއްގޮތަކަށެވެ. އާކަމަކަށް ވެގެން މިއުޅެނީ އެންމެ ކަމެކެވެ. އުޅެގަތް ގޮތަކުން ރައްޔިތުން ވޯޓުނުދީ ވެރިކަމުން ފަހާލީއެވެ. އިތުރު އެއްކަމެއްވެސް ވީއެއް ނޫނެވެ.
އިންޑިއާ އައުޓް އޭކިޔަނީ މުޅިން އެހެން ވާނެއް ވެގެންކަން ރަނގަޅަށް މިހިރަދަނީ ބޭޒާރުވެ ފަޅާއަރަމުންނެވެ. ހުރިހާ ވެސް މައްސަލަ އަކީ އިންޑިއާ ކަނޑުގެ ސަރަހައްދު ބެލެހެއްޓުމުގައި އިންޑިއާ ސިފައިން ބޭނުންކުރާ ބޮޑެތި މަނަވަރު ފަހަރާ ހަނގުރާމަ މަތީ ޖެޓްތަކާ ރާޑަރު ތަކެވެ. މިރާއްޖެ ވަށާ މިއޮތް އިންޑިއާ ކަނޑުގައި ހިންގާ ބޮޑެތި ޖަރީމާ ތަކަށް އިންޑިއާއާ ހެދި ހުރަސް އެޅެނީ އެވެ. ބަލަގަ އެމީހުން، އެމީހުންގެ ސަރަހައްދު ބަލަހައްޓާ ދިފާއުކުރާނެ އެވެ. އެކަމާ ހެދި އުނދަގޫވާ ބަޔަކަށް ރަނގަޅުވާނީ ދުނިޔޭން ވެސް އިންޑިއާ އައުޓް ކޮށްލެވުނިއްޔާއެވެ. ރާއްޖެއާ ލަންކާއާ އިންޑިއާ މިއީ ޖެހިޖެހިގެން އޮތް ތިންގައުމެވެ. ބާ އަތޮޅުގައި ގޮއިފުޅަފެހެންދޫ ވެސް އެއޮންނަނީ އެވެ. އެނޫންރަށްތަކާ އަތޮޅުތަށް ވެސް މިހުރީ ކައިރި ކައިރީގައި ޖެހިޖެހިގެންނެވެ.
ވަގަށް ނެގިޑޮލަރާ ހަތިޔާރު، ނޫނީ ޑްރަގް ދަބަސް ކޮނޑަށް ލައިގެން ހުރަވީ ބިލްޑިންގ އަށް ނުވަދެވިގެން އުޅެނީ ރައީސް އޮފީހުގެ ގޭޓްގައި ހުރި ސިފައިންގެ މީހާއާހުރެ ކަމަށްވަންޏާ އެމީހާ ދެކެ ލައްކަ ރުޅިއަންނާނެއެވެ. ވަގުކަލޭ އެއިން ބައެއް ދޭން ބުނީމާ ރައީސްއޮފީސް ބަޑިފޯރި އައުޓް ކެމްޕޭން ޖައްސައިދޭންވީތާއެވެ. ބަދުރު ހަނގުރާމައިގާ މަރުވި ކާފަރުންގެ މައްޗަށް ރޮއެދޭން ނުކުތް ޖާހިލިއްޔަ ޒަމާނުގެ މީހުންނެކޭ ޕީޕީއެމެކޭ ތަފާތެއް ނެތެވެ. ޑްރަގް ބޯޓްތައް ހުއްޓުވާ ހިފެހެއްޓި ވަރަކަށް އިންޑިއާ އައުޓްއޭ ގޮވަމުން ނުކުމެ މަގުތަކުގައި އެބައިމީހުންނަށް ރޮއެދެނީއެވެ.
ރާއްޖޭގެ ހުރަހާ ދިގަށް ހިނގާ ނުރައްކާތެރި އުދަބާނީގެ ވާހަކަ މިދާކަށް މަަސްވެރިންގެ ދުވަހު، ރައީސް ޞޯލިޙް ވިދާޅުވެއްޖެއެވެ. ބައިނަލް އަގްވާމީ ޓެރަރިޒަމާ، ހަތިޔާރުގެ ޣައިރުގާނޫނީ މުޢާމަލާތު ތަކާއި ބޮޑެތި ޑްރަގް ނެޓްވޯރކް ތަކުގެ ޖަރީމާ ތަކެވެ.
މިކަންކަން ބިރެއްނެތި މިނިވަންކަމުގައި ނުހިންގެނީ އިންޑިއާގެ އަސްކަރިއްޔާގެ ވަރުގަދަ ކަމުންދެއްތޯއެވެ. ޖަރީމާ ހިންގާނެ މިނިވަންކަން ތިމާމެނަށް ނެތިގެން، ރާއްޖޭގެ މިނިވަންކަމޭ ސިޔާދަތޭ އިސްތިގުލާލޭ ގޮވަން ނެރެފައި ތިއްބަސް ދިވެހިންނަށް ވާނުވާ ވަރަށް ސާފެވެ. ތިޔައިން އެއްވުމެއްގެ ވައިދަށުން ހުރަސްކަނޑާލާ މެހިމާބުރު ވެސް އެތިބެނީ އަނބުރައިގަންނެގެން ވެއްޓޭވަރުވެފައެވެ. ދުވާ ވައްކަމާ ޚިޔާނާތާ ކޮރަޕްޝަނާ މަސްތުވާ ތަކެތީގެ ވަހާ ހުރެއެވެ.
ރާއްޖެ ހިމަނައިގެން ދުނިޔޭގެ ގައުމުތަކާ ޖީލުތައް ހަލާކު ކުރުމަށް ހިންގާ ބައިނަލް އަގްވާމީ ބޮޑެތި ޖަރީމާތަކަށް ވާގިދޭން ނުކުމުގެން އިންޑިއާ އައުޓްއޭ ގޮވަމުން ތިޔަ ކުރާ ކަމަކީ ގާތް ގަނޑަކަށް މިޒަމާނުގައި ދައްޖާލަށް ސައިކުރާ ކައްކައި ދިނުމެވެ.
ކަމެއްވާއިރަށް އަދި ބުނެއެވެ. އެކަން އެކުރީ، ނޫނީ އެހެން އެބުނީ ދިވެހިސަރުކާރަށް އިންޑިއާއިން އަންގައިގެންނޯލައެވެ. މިއިރު އިންޑިއާ އަންގައިގެންނޭ ބުނާށޭ ބުނަން ތިމާމެންނަށް އަންގައިގެން ތިޔައުޅެނީ ދުނިޔޭގައި ޑްރަގް ވިޔަފާރިއާ ޓެރަރިޒަމް ހިންގާ މާސިންގާ ނެޓްވޯރކްތަކުގެ މުޖުރިމުން ކަން ބާކީ ދެންތިބި އެންމެންނަށް އެބައެނގެއެވެ.
ރަނގަޅު ވާހަކައެއް ބުނަން ހެއްޔެވެ. ރައްޔިތުންގެ ހައްގުތަކަށް ހުރުމަތްތެރިކޮށް ހިތާ، ތެދުވެރިކަމާ އަމާނަތްތެރިކަން މަތީ ވެރިކަން ކުރުންމަތީ ދެމިހުރުމަށް ކުރި ހުވަޔާ ޚިލާފަށް ކަންކުރި ގޮތް ސުޕްރީމް ކޯޓުން ވަރަށް ސާފު ބަހުން ލިޔެބަޔާން ކޮށްފައި އެބަވެއެވެ. ތިޔަ އުޅެނީ ޝަރުތުގެއްލި، ހުވަޔާ ޚިލާފްވެ، މަގާމުން ޣައިބުވެ، ލިބާހަށް އައިބުވެފައިހުރި ފިރިހެނަކު ދައްކާ ދަޅައެއްގައި ޖެހިގެންނެވެ އެއީ އަލުން އަނބުރާ ދިވެހި ވެރިކަމާ ކުޑަބޭރު އެރޭނެކަމާމެދު ޝައްކު އުފެދި އަދިވެސް ބޮޑެތި އެތައް ތުހުމަތަކުން ބަނދެވިފައި ހުރި މީހެކެވެ.
ދެންވެސް ކަމެއް ކުރަންޏާ ތިޔަތަނުގެ ތެރޭން ކެންޑިޑޭޓެއް ފެނޭތޯ ބެލިއްޔާ މާރަނގަޅުވާނެއެވެ. ހުކުމް އައި ދުވަހު ވީދެރައިން ރޮވުނު މުއިއްޒާ، ވާހަކަ ދައްކަން ސްޓޭޖަށް އެރިއިރު ވެސް ކޮށްފައި ހުރި އަސަރުން ދެތަލި ތަތްލި ވަހީދު ވެސް އެހުރީއެވެ. ނުވިތާކަށް ޖަމީލު ލައްވަ ތަތްގަދަ ފޮނިއެއްޗަކުން ސަދަގާތް ކުރުވާފައި ބައްޕާފުޅު ލައްވަ ޣައްސާނަށް ދުންބުރުވާފަ ކެންޑިޑޭޓްގެ ބޮލަށް އޮމާން ޓިނުން ހަތްކޮޅު ނަގައިގެން އަންނަ ރިޔާސީ އިންތިޚާބަށް އަދުރޭ ނެރުނަސް ތިޔައުޅޭ ގޮތަށްވުރެ މާރަނގަޅުވާނެއެވެ.
ގޮވާ އެއްޗެއް ތިޔަ ގޮވަނީ އެއް ބައި މަދުންނެވެ. އިންޑިއާ އައުޓް ގޮވާލާފަ އޭގެ ފަހަތުން ޑްރަގްބޯޓް އިން އޭ ވެސް ގޮވިއްޔާ ނޫނީ ތިޔަ ކިޔާ އެތި ފުރިހަމަ އެއް ނުވާނެ އެވެ
