ރޯވިން ހާލަތު ކުރިއަށްވުރެ ރަނގަޅުވަމުން އަންނަ ކަމަށް ކުޅިވަރާ ބެހޭ ވަޒީރު އަޙްމަދު މަޚްލޫފް ވިދާޅުވެއްޖެއެވެ.
ބުދަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބުދެއްވަމުން މަޚްލޫފު ވިދާޅުވީ މީގެ ދެ އަހަރެއްހާ ދުވަސް ކުރިން ރޯވިންގެ ހާލަތު ބައްލަވާލެއްވުމަށް އައްޑުއަށް ކުރި ދަތުރާ އަޅާބަލާއިރު، މިހާރު އެ ކުޅިވަރު ކުރިއަރާފައިވާ މަންޒަރު ފެންނަ ކަމަށާއި، އެގޮތުން މި މަހުވެސް ރޯވިންގެ ބޮޑު މުބާރާތެއް އައްޑޫ ސިޓީގައި ބޭއްވިގެންދިޔަ ކަމަށެވެ.
އެކަމަކު ގައުމީ ހައިސިއްޔަތު ހުރިހާ ކުޅިވަރު އެސޯސިއޭޝަންތަކަށް ދިނުމަކީ ދަތި އުނދަގޫ ކަމެއް ކަމަށާއި، އަދި ރާއްޖޭގެ ފުދުންތެރިކަން ނެތީސް އެސޯސިއޭޝަން ގާއިމުކުރަނީ ކިހިނެއްތޯ އެއީ އުފެދޭ ސުވާލެއް ކަމަށް މަޚްލޫފް ވިދާޅުވިއެވެ. އެހެންކަމުން ކުޅިވަރާ ބެހޭ ވުޒާރާގެ އަމާޒަކީ އެއް ފުރާޅެއްގެ ދަށުގައި މޫދު ކުޅިވަރުތައް ހިމެނުން ކަމަށްވެސް ވިދާޅުވިއެވެ.
މަޚްލޫފް އިތުރަށް ވިދާޅުވީ ރޯވިންއަކީ މާލެއިން ބޭރުގައި ފައްކާވަމުން އަންނަ ފުރަތަމަ ކުޅިވަރު ކަމަށްވުމުން އެ ކުޅިވަރުގެ ތަރައްގީއަށް ކުޅިވަރާ ބެހޭ ވުޒާރާއިން ދެވެން އޮތް އެހީއެއް ވެދެއްވާނެ ކަމަށެވެ.
ރޯވިން އެސޯސިއޭޝަން އޮފް މޯލްޑިވްސްއަކީ މާލެ ފިޔަވައި އަތޮޅުތެރޭގެ ރަށެއްގައި ހިންގާ ހަމައެކަނި ކުޅިވަރު އެސޯސިއޭޝަނެވެ. އެގޮތުން 2009 ވަނަ އަހަރުން ފެށިގެން އެ އެސޯސިއޭޝަނުން އަންނަނީ ފަލިޖެހުމުގެ ރޭސްތަކާއި ތަފާތު މުބާރާތްތައް ބޭއްވުމުގެ އިތުރުން، ބައިނަލްއަގުވާމީ މުބާރާތްތަކުގައިވެސް ރާއްޖެ ތަމްސީލުކޮށް މެޑަލްވެސް ހޯދަމުންނެވެ.
އަދި މި މަހުގެ ތެރޭގައި ރޯވިން އެސޯސިއޭޝަނުން ވަނީ ރާއްޖެއިން ބޭރުގެ ޓީމުތައް ހިމަނައިގެން އައްޑޫގައި "އެމްޑަބްލިއުއެސްސީ އިންޓަ ސްކޫލް ކޯސްޓަލް ރޯވިން ބީޗް ސްޕްރިންޓް 2021" ގެ ނަމުގައި ކާމިޔާބު މުބާރާތެއް ކުރިއަށް ގެންގޮސްފައެވެ. އަދި އެ އެސޯސިއޭޝަނުން އަންނަނީ އަންނަ އަހަރު ރޯވިންގެ ބައިނަލްއަގުވާމީ ބޮޑު މުބާރާތެއް ބޭއްވުމަށްވެސް މަސައްކަތް ކުރަމުންނެވެ.
