އެކައުންޓިންގ ދާއިރާއަށް މީހުން ބިނާކުރުމަށް ސަރުކާރާ ގުޅިގެން އަންނަނީ މަސައްކަތްތަކެއް ކުރެވެމުން: އޮޑިޓަރ ޖެނެރަލް
ޕްރައިވެޓް ސެކްޓަރ ގައި ގާތްގަނޑަކަށް 4500 އެއްހާ ބިދޭސީ އެކައުންޓެންޓުން ހަރަކާތްތެރިވޭ
އޮޑިޓަރ ޖެނެރަލް ހުސައިން ނިޔާޒީ
އެކައުންޓިންގ ދާއިރާއިން ފަންނީ މީހުން އުފެއްދުމަށް އެދާއިރާއިން އިލްމު އުނގެނުމުގެ ފުރުސަތުތައް ފަސޭހައިން ލިބޭނެ އިންތިޒާމު ހަމަޖެއްސުމަށް ސަރުކާރާއި ކަމާބެހޭ އިދާރާތަކާއެކު ގިނަ މަޝްވަރާތަކެއް ކުރެވެމުންދާކަމަށް އޮޑިޓަރ ޖެނެރަލް ހުސައިން ނިޔާޒީ ވިދާޅުވެއްޖެއެވެ.
މޯލްޑިވްސް އެކައުންޓެންޓްސް ފޯރަމް ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން އޮޑިޓަރ ޖެނެރަލް އަދި އިންސްޓިޓިއުޓް އޮފް ޗަރޓަރޑް އެކައުންޓެންޓްސް އޮފް ދަ މޯލްޑިވްސް ގެ ރައީސް ހުސައިން ނިޔާޒީ ވަނީ ރާއްޖޭގައި އެކައުންޓެންޓުން އަދި އޮޑިޓަރުންގ ބިނާކޮށް އެދާއިރާ ޚަރުދަނާކުރުމަށް ކުރަމުން ގެންދާ މަސައްކަތްތަަކަށް އަލިއަޅުވާލާ ވާހަކަފުޅު ދައްކަވާފައެވެ. އެގޮތުން ބޭރުގެ އިދާރާތަކާއި ގުޅިގެންވެސް މިދާއިރާއިން ޕްރޮފެޝަނަލް މީހުން ބިނާކުރުމުގެ މަސައްކަތްކުރަމުންދާކަމަށް ނިޔާޒީ ވިދާޅުވިއެވެ.
މިއަހަރުގެ ފޯރަމް ބޭއްވިގެންދަނީ އިންސްޓިޓިއުޓް އޮފް ޗަރޓަރޑް އެކައުންޓެންޓްސްގެ ފަރާތުންނެވެ. މި އިންސްޓިޓިއުޓް އަކީ 2020 ވަނަ އަހަރު ސެޕްޓެމްބަރ މަހުގެ 8 ވަނަ ދުވަހު ތަސްދީގުކުރެވުނު ރާއްޖޭގެ ޗަރޓަރޑް އެކައުންޓެންޓުގެ ގާނޫނުން ރާއްޖޭގެ އެކައުންޓިން އަދި އޮޑިޓިން ސްޓޭންޑަރޑްތައް ކަނޑައަޅާ އޮޑިޓަރުންނަށް ލައިސަންސް ދިނުމަށާއި ޕްރޮފެޝަން ރެގިޔިލޭޓްކޮށް ކަނޑައަޅާފައިވާ މުސްތަގިއްލު އިންސްޓިޓިއުޓެކެވެ.
ނިޔާޒީ ވިދާޅުވީ މިފަދަ އިންސްޓިޓިއުޓްތަކުން ބިނާކުރެވޭ ޗާޓަރޑް އެކައުންޓެންޓުންގެ ފަރާތުން ލިބޭ ފަންނީ އެހީތެކަމާއެކު އެގައުމުތަކުގެ ވިޔަފާރި އާއި އިގްތިޞާދަށް ވަރަށް ބޮޑު ކުރިއެރުންތަކެއް ހޯދައިދީފައިވާކަމަށެވެ.
ނިޔާޒީ ވިދާޅުވީ އިންސްޓިޓިއުޓުން ކުރި ދިރާސާއަކުން އެނގިފައިވާ ގޮތުގައި ރާއްޖޭގެ ޕްރައިވެޓް ސެކްޓަރ ގައި ގާތްގަނޑަކަށް 4500 އެއްހާ ބިދޭސީ އެކައުންޓެންޓުން ހަރަކާތްތެރިވާކަމަށެވެ.
ނިޔާޒީ ވިދާޅުވީ ރަސްމީ ސިފައެއްގައި އޮޑިޓަރުންނަށް ލައިސަންސް ދޭންފެށީ 1994 ގައި އޮޑިޓް އޮފީހުންކަމަށެވެ. އޭގެ 26 އަހަރުފަހުން ދުނިޔޭގެ ގިނަ ގައުމުތަކުގައިވެސް އެކަން ކުރާ އުސޫލުން ގާނޫނީ ވަކި މުސްތަގިއްލު އިންސްޓިޓިއުޓަކުން ރާއްޖޭގައި އެކައުންޓިންގ ދާއިރާ ރެގިޔުލޭޓްކުރުމަށް 2020 ވަނަ އަހަރު ވަނީ އިންސްޓިޓިއުޓް ގާއިމުކުރެވިފައިކަމަށް ނިޔާޒީ ވިދާޅުވިއެވެ.
އެކައުންޓިންގ ދާއިރާގައި މަސައްކަތްކުރި އިސް ފަރާތްތަކުން ގިނަ އަހަރުތަކެއް ވަނދެން ވަރުބަލިކަމެއް ނެތި ކުރި މަސައްކަތާއި އެމަސައްކަތަށް އޮޑިޓް އޮފީހުން ރަސްމީ ސަޕޯޓް ލިބިގެން ޗަރޓަޑް އެކައުންޓެންސީ އިންސްޓިޓިއުޓެއް އުފެއްދުމަށް ހުށަހެޅި ޕްރޮޕޯސަލް އަށް ވަރަށް އަވަސް އިޖާބައެއް ދެއްވީ މިސަރުކާރުން ރައީސް ޞާލިހުގެ ސަރުކާރުން ކަމަށް ނިޔާޒީ ވިދާޅުވިއެވެ.
އިންސްޓިޓިއުޓުން ކުޑަ ދުވަސްކޮޅެއްގެ ތެރޭގައި ގިނަ މަސައްކަތްތަކެއް ކޮށްފައިވާކަމަށްވެސް ނިޔާޒީ ވިދާޅުވިއެވެ. އޭގެތެރޭގައި އިންސްޓިޓިއުޓްގެ މެމްބަރުންގެ ގޮތުގައި ރަޖިސްޓްރީ ކުރެވޭނެ ފަރާތްތަކުގެ ޝަރުތުތަކާއި މެމްބަރުން ރަޖިސްޓްރީކުރުމުގައި އިންސްޓިޓިއުޓުން ގަބޫލުކުރާ އެކައުންޓިންގ ކޮލިފިކޭޝަންތައް ކަނޑައަޅާ އޮޑިޓަރުންނަށް ލައިސަންސް ދިނުމާއި ބެހޭ އައު ސިޔާސަތު ގެ ދަށުން އޮޑިޓް ލައިސަންސް ދޫކުރުމާއި ބައެއް މުހިންމު ޓްރެއިނިންގ ޕްރޮގްރާމްތައް ހިންގާފައިވާކަމަށް ނިޔާޒީ ވިދާޅުވިއެވެ.
ނިޔާޒީ ވިދާޅުވީ މޯލްޑިވްސް އެކައުންޓެންޓްސް ފޯރަމީ 2017 ވަނަ އަހަރުން ފެށިގެން ކުރީގެ އޮޑިޓަރ ޖެނެރަލް ހަސަން ޒިޔަތުގެ މޭސްތިރިކަމުގެ ދަށުން ކޮންމެ އަހަރަކުވެސް ސިލްސިލާކޮށް ބާއްވަމުންދިޔަ މަހާސިންތާއެއްކަމަށެވެ. ކޮވިޑާއި ގުޅިގެން އޮންލައިންކޮށް ވެބިނަރ ތަކެއްގެ ގޮތުން ސެޝަންތަކެއް ކުރިޔަށްގެންދިޔަ ކަމަށް ނިޔާޒީ ވިދާޅުވިއެވެ.
