ސަރުކާރު ހިއްސާވާ ކުންފުނިތަކުގެ އައު ފައިނޭންޝަލް ސްޓޭޓްމެންޓް އޮޑިޓް ސްޓްރެޓެޖީއަށް އަމަލުކުރަން ފަށައިފިއެވެ.

ސަރުކާރު ހިއްސާވާ ކުންފުނިތަކުގެ އައު ފައިނޭންޝަލް ސްޓޭޓްމަންޓް އޮޑިޓް ސްޓްރެޓަޖީއަށް އަމަލުކުރަން ފެށުމުގެ ގޮތުން "ރެގިއުލޭޝަން އޮން ދި އޮޑިޓް އެންޑް އެކައުންޓެބިލިޓީ އޮފް ސްޓޭޓް އޯންޑް އެންޓަރޕްރައިސަސް"ގެ ނަމުގައި އޮޑިޓަރ ޖެނެރަލްގެ އޮފީހުން ވަނީ ގަވައިދެއް އާންމުކޮށްފައެވެ. މިކަމަށްޓައި އަންގާރަ ދުވަހު އޮޑިޓަރ ޖެނެރަލް އޮފީހުގައި ބޭއްވި ޚާއްސަ ހަފްލާއެއްގައި އެ ގަވައިދު ނެރުއްވީ މިނިސްޓަރ އޮފް ފިނޭންސް އޮނަރަބަލް އިބްރާހީމް އަމީރުއެވެ. މި ގަވާއިދަށް އަމަލުކުރަންޖެހޭނީ ސަރުކާރުގެ އަޣުލަބިއްޔަތު ހިއްސާ އޮންނަ ކުންފުނިތަކުންނެވެ. ނަމަވެސް ސަރުކާރުގެ ހިއްސާ އޮންނަ މާލީ އިދާރާތަކާއި، ޕަބްލިކް ލިސްޓެޑް ކުންފުނިތައް އެ ގަވާއިދުން އިސްތިސްނާ ވާނެއެވެ.

މި ގަވާއިދުގެ ދަށުން ކުންފުނިތަކުގެ މާލީ ބަޔާންތައް އޮޑިޓް ކުރުމަށް އޮޑިޓަރުން އައްޔަން ކުރާނީ އެ ކުންފުނިތަކުގެ ބޯޑުންނެވެ. އަދި މާލީ ބަޔާންތަކުގެ އޮޑިޓް ރިޕޯޓްތަކުގައި ސޮއި ކުރާނީވެސް ކުންފުނިތަކުގެ ބޯޑުން އައްޔަންކުރާ އޮޑިޓަރުންނެވެ. މި ގަވާއިދާ ގުޅިގެން އޮޑިޓަރ ޖެނެރަލްގެ އޮފީހުން އަދާކުރާ މައިގަނޑު ދައުރަކީ މިގަވާއިދުގެ ދަށުން ކުރާ އޮޑިޓްތަކާއި އެ އޮޑިޓްތަކާ ގުޅިގެން އޮޑިޓަރުން ތައްޔާރުކުރާ ރިޕޯޓުތައް ރިވިއުކުރުމެވެ. އަދި އޮޑިޓްތަކުގެ ފެންވަރު، ހަރުދަނާ އުސޫލުތަކާ އެއްގޮތަށް ހިފަހައްޓާފައިނުވާކަން ފާހަގަކުރެވިއްޖެނަމަ، އޮޑިޓަރުންނާ މެދު ފިޔަވަޅު އެޅުމުގެ ކަންކަން އިންސްޓިޓިއުޓް އޮފް ޗާރޓަޑް އެކައުންޓެންޓްސް އޮފް ދަ މޯލްޑިވްސް މެދުވެރިކޮށް ކުރިއަށް ގެންދިއުމެވެ. އަދި މި ގަވާއިދުގެ ދަށުން, އޮޑިޓަރުންނާއި ކުންފުނިތަކުން އަދާކުރަންޖެހޭ ޒިންމާތައް އެ ފަރާތްތަކުން އަދާ ނުކޮށްފިނަމަ، އޮޑިޓަރ ޖެނެރަލްގެ އޮފީހުން އެ ފަރާތްތަކާމެދު އަޅާނެ ފިޔަވަޅުތައްވެސް ގަވާއިދުގައި ބަޔާންކޮށްފައިވެއެވެ.

މި ގަވާއިދަށް އަމަލު ކުރަން ފެށުމާއެކު ފައިނޭންޝިއަލް ސްޓޭޓްމަންޓް ތަކުގެ އޮޑިޓް ރިޕޯޓް ހުށަހެޅުމުގެ އިތުރުން އޮޑިޓަރ ޖެނެރަލްއަށް ވަކި ރިޕޯޓެއް ކުންފުނިތަކުގެ ޕްރައިވެޓް ސެކްޓަރ އޮޑިޓަރުން ހުށަހަޅަންޖެހޭނެއެވެ. މި ރިޕޯޓްގައި ހިމަނަންޖެހޭ ބައިތަކުގެ ތެރޭގައި އިންޓަރނަލް ކޮންޓްރޯލްސް އޯވަރ ފައިނޭންޝަލް ރިޕޯޓިންގ، ފްރޯޑް ރިސްކް، ޕްރައިވަޓައިޒޭޝަން އެންޑް ކޯޕަރޭޓައިޒޭޝަން ބޯޑް (ޕީސީބީ)އިން އެކުލަވާލައިފައިވާ ޕްރޮކިއުމަންޓް އުސޫލާއި ކޯޕަރޭޓް ގަވަރނަންސް ކޯޑަށް އަމަލު ކުރެވިފައިވާ މިންވަރާއި ޕީސީބީގެ އެންގުންތަކަށް އަމަލު ކޮށްފައިވާ މިންވަރު ހިމެނެއެވެ. އެހެންކަމުން، މިއަދު ނެރެވުނު މި އާ ސްޓްރެޓެޖީގެ ދަށުން ސަރުކާރުގެ އަޣުލަބިއްޔަތު ހިއްސާ އޮންނަ ކުންފުނިތަކުގެ ހިންގުން ހަރުދަނާވެ, ޖަވާބުދާރީވުން އިތުރުވެ, އަދި އެ ތަންތަން ދެފުށްފެންނަ އުސޫލުތަކެއްގެ މަތިން ހިންގުމަށް ބާރު އެޅިގެންދާނެއެވެ.  

މީގެ އިތުރުން މިހަފުލާގައި ވަނީ, އިންސްޓްޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސްގެ ފަރާތުން "ރެގިއުލޭޝަން ފޮރ ރެޖިސްޓްރޭޝަން އޮފް ޕަބްލިކް އިންޓަރެސްޓް އެންޓިޓީ އޮޑިޓަރސް"ގެ ނަމުގައި ގަވާއިދެއް އާންމުކޮށްފައެވެ. މި ގަވާއިދުގެ ދަށުން ފައިނޭންޝަލް އިންސްޓްޓިއުޝަންތަކާއި ލިސްޓެޑް ކުންފުނިތަކުގެ އިތުރުން, ގާނޫނަކުން އުފައްދާފައިވާ ރެގިއުލޭޓަރީ ބޮޑީސްތައް އޮޑިޓް ކުރުމަށްޓަކައި އިންސްޓްޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސްއިން ދޫކޮށްފައިވާ އޮޑިޓް ލައިސެންސް އޮންނަ ފަރާތްތަކުގެ ތެރެއިން, ވަކި ޝަރުތުތަކެއް ފުރިހަމަވާ ފަރާތްތައް ޕަބްލިކް އިންޓަރެސްޓް އެންޓިޓީ އޮޑިޓަރުންގެ ގޮތުގައި ރަޖިސްޓަރީ ކުރެވިގެންދާނެއެވެ.

މި ހަފްލާގައި ވާހަކަދައްކަވަމުން ފިނޭންސް މިނިސްޓަރ އަމީރު ވިދާޅުވީ, ސަރުކާރު ހިއްސާވާ ކުންފުނިތަކުން ސަރުކާރުގެ ގިނަ ޕްރޮޖެކްޓްތަކެއް ކުރިއަށް ގެންދާއިރު އެ ކުންފުނިތަކުގެ މާލީ ހާލަތު ރަނގަޅަށް ދެނެގަނެވިފައި އޮންނަން ޖެހޭ ކަމަށާއި, މި ގާނޫނުގެ ދަށުން ސަރުކާރު ހިއްސާވާ ކުންފުނިތަކުގެ އޮޑިޓްތައް އަވަސްވެ ކުންފުނިތައް ޒިންމާދާރު ކުރުމަށް ފަސޭހަވެގެން ދާނެކަމަށެވެ. އަދި ސަރުކާރުގެ ގިނަ ޕްރޮޖެކްޓްތަކެއް ސަރުކާރު ހިއްސާވާ ކުންފުނިތައް މެދުވެރިކޮށް ހިންގާއިރު، އެ ކުންފުނިތައް އެފިޝެންޓްކޮށް ހިންގުމަކީ, ޕްރޮޖެކްޓްތައް ހިންގުމަށް ދައުލަތުން ކުރަންޖެހޭ ޚަރަދުތައްވެސް މުސްތަގުބަލުގައި ކުޑަ ކުރެވިގެންދާނެ ކަމެއް ކަމަށްވެސް ވިދާޅުވިއެވެ. 

މި ގަވާއިދުގެ މަގުސަދަކީ ޕަބްލިކް އިންޓަރެސްޓް އެންޓިޓީތަކުގެ ގޮތުގައި ބަޔާންކޮށްފައިވާ ތަންތަން އޮޑިޓްކުރުގެ ގާބިލުކަން ހުރި ފަރާތްތަކުން އެ ތަންތަން އޮޑިޓް ކުރުމުގެ މަގު ތަނަވަސްކުރުމެވެ. އަދި ވިޔަފާރިއާއި އެކިއެކި ސިނާއަތްތަކުގެ ބައިވެރިންގެ ފަރާތުން އޮޑިޓް ޕްރޮފެޝަނަށް އޮންނަ އިތުބާރާއި ޔަގީންކަން ދަމަހައްޓައި, ޕަބްލިކް އިންޓަރެސްޓް އެންޓިޓީތަކުގެ އޮޑިޓްގެ ކޮލިޓީ އިތުރުކުރުމެވެ.