އަލަށް ދޫކުރާ ރަށްރަށުގައި އިޔާދަކުރަނިވި ހަކަތަ ބޭނުންކުރުމަށް ބާރުއަޅަން: ޑރ. މަޢުޞޫމް
ކުރިއަށްއޮތްތަނުގައި ރިސޯޓުތަކުން ދާނީ އިއާދަކުރަނިވި ހަކަތައާ ދިމާލަށް
މިނިސްޓަރ މަޢުޞޫމް ރާއްޖެޓީވީގެ ފަލަސުރުޚީ ޕްރޮގްރާމުގައި
ފަތުރުވެރިކަމުގެ ބޭނުމަށް އަލަށް ދޫކުރާ ރަށްތައް ދޫކުރުމުގައި, އެތަންތަނުގައި އިއާދަކުރަނިވި ހަކަތަ ބޭނުންކުރާ މިންވަރަށް ބަލާނެ ކަމަށް ޓުއަރިޒަމް މިނިސްޓަރ ޑރ. ޢަބްދުﷲ މަޢުޞޫމް ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުންނެވެ. މިނިސްޓަަރ މަޢުޞޫމް ވިދާޅުވީ, ކުރިއަށްއޮތްތަނުގައި ރިސޯޓުތަކުން ދާނީ އިއާދަކުރަނިވި ހަކަތައާ ދިމާލަށް ކަމަށެވެ.
އެހެންކަމުން މިހާރުން ފެށިގެން މިކަމަށް ތައްޔާރުވުމަށާއި, އަލަށް ރިސޯޓު ތަރައްގީކުރަން ހުޅުވާލާފައިވާ 18 ރަށް ބަޔަކަށް ދޭއިރު އެ ރަށެއްގައި އިއާދަކުރަނިވި ހަކަތަ ބޭނުންކުރާ މިންވަރަށް ބަލާނެ ކަމަށް މިނިސްޓަރ ވިދާޅުވިއެވެ. މި ރަށްތަކުގެ މާކްސްތައް ބެހިފައި އޮތް ގޮތް ކިޔައިދެއްވަމުން މިނިސްޓަރ ވިދާޅުވީ, 60 އިންސައްތަ މާކްސް އޮންނާނީ އެންމެ މަތިން ބިޑްކުރާ ބަޔަކަށް ކަމަށެވެ. އަދި 40 އިންސައްތަ މާކްސް އޮންނާނީ ތިމާވެށި ހިމާޔަތްކުރުމަށާއި، މީހުން ބިނާކުރުމަށް ކަމަށެވެ. މީގެ ތެރެއިންވެސް 10 އިންސައްތަ ޚާއްސަ ކުރެވެނީ އެ ރިސޯޓެއްގައި އިއާދަކުރަނިވި ހަކަތަ ބޭނުންކުރާ މިންވަރަށް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އިއާދަކުރަނިވި ހަކަތަ އުފެއްދުމަށް ހުށަހަޅައި, އެކަން އެގޮތަށް ނުކޮށްފިނަމަ ދައުލަތަށް ބޮޑު އަދަދަކުން ފައިސާ ދައްކަންޖެހޭނެ ކަމަށެވެ.
މިނިސްޓަރ ވިދާޅުވީ ޓުއަރިސްޓު ރަށްތަކުގައި އިއާދަކުރަނިވި ހަކަތަ ގާއިމުކުރުމަށް މިހާރުން ފެށިގެންވެސް ކުރަމުންދާ މަސައްކަތްތަކުން ދައްކުވައިދެނީ, މި ސިނާއަތުގެ ތެރެއިންވެސް ތިމާވެށި ހިމާޔަތްކުރުމަށް ދޭ އަހައްމިއްޔަތުކަން ކަމަށެވެ.
މިނިސްޓަރ ވިދާޅުވީ އަލަށް ދޫކުރާ ރަށްތައް އިޔާދަކުރަނިވި ހަކަތައަށް ބަދަލުކުރުމަށް މަސައްކަތްކުރިނަމަވެސް, މިއީ ވަރަށް ބޮޑު އިންވެސްޓްމެންޓެއް ކުރަންޖެހޭނެ ކަމެއް ކަމަށެވެ. ރަށެއް އެއްކޮށް އިއާދަކުރަނިވި ހަކަތައަށް ބަދަލުކުރުމަށް އަށެއްކަ މިލިއަން ޑޮލަރު ޚަރަދުވާނެ ކަމަށް މިނިސްޓަރ ވިދާޅުވިއެވެ.
