ސިއްހީ ގޮތުން އެންމެ ރައްކާތެރި މަންޒިލަކީ ރާއްޖެ!

ރާއްޖެއަކީ ސިއްހީ ގޮތުން އެންމެ ރައްކާތެރި ގައުމުކަމަށް, ރާއްޖެއިން ލުބްނާނަށް ކަނޑައަޅާފައި ހުންނަވާ އޮނަރަރީ ކޮންސުލް ޖެނެރަލް، ހިޒް އެކްސެލެންސީ މިސްޓަރ މުޙައްމަދު ފާކިޙު ވިދާޅުވެއްޖެއެވެ.

ފަތުވެރިކަމުގެ ދުވަހާ ގުޅިގެން ޓޫރިޒަމް މިނިސްޓަރު ޑރ. ޢަބްދުﷲ މަޢުޞޫމް ކުރައްވާފައިވާ ޓްވީޓަކަށް ޖަވާބު ދެއްވައި ފާކިޙު ވިދާޅުވީ, ރާއްޖޭގެ ފަތުރުވެރިކަމުގެ ޞިނާޢަތް ވަރަށް ބޮޑަށް ކުރިއަރައިގެންދާ ކަމަށާއި، ސިއްހީ ގޮތުން އެންމެ ރައްކާތެރި މަންޒިލަކަށް ރާއްޖެ ވެފައިވާ ކަމަށެވެ. ފަތުރުވެރިކަމުގެ ޞިނާޢަތް ކުރިއެރުވުމަށް ކުރަމުންދާ މަސައްކަތްތަކާއި ހާސިލްކޮށްފައިވާ ކާމިޔާބީތައް ފާކިޙު ފާހަގަކުރައްވާފައިވެއެވެ.

މީގެ އިތުރުން އޭނާ ވަނީ ދުނިޔޭގެ ފަތުރުވެރިކަމުގެ ދުވަހުގެ ތަހުނިހާ ވެސް ވިދާޅުވެފައެވެ.

ފަތުރުވެރިކަމުގެ ދުވަހާ ގުޅިގެން މިނިސްޓަރ ވިދާޅުވީ, ކާމިޔާބު ފަތުރުވެރިކަމެއްގެ އެެންމެ މުހިއްމު އެއް އަސާސަކީ ދާއިރާގައި މަސައްކަތްކުރާ މުވައްޒަފުންގެ ހައްގުތައް ކަށަވަރުކޮށް ދިނުން ކަމަށެވެ. ކޮވިޑް-19އާ ގުޅިގެން ދުވަސްތަކެއް ވަންދެން އާއިލާއާ ދުރުގައި ވަރަށް ބޮޑެތި ގުރުބާނީތަކެއް މުއައްޒަފުން ވެފައިވާކަން މިނިސްޓަރު ފާހަގަކުރެއްވިއެވެ.

ރާއްޖެއަށް ޒިޔާރަތް ކުރާ ފަތުރުވެރިންގެ އަދަދު ގިނަވެފައިވާއިރު، 869 ޓޫރިސްޓު އެކޮމޮޑޭޝަން ފެސިލިޓީއެއް މިވަގުތު ޚިދުމަތަށް ހުޅުވާލާފައިވާލާފައިވެއެވެ. އަދި ޖުމްލަ 50،684 އެނދު ގެންދަނީ އޮޕަރޭޓްކުރަމުންނެވެ. އެގޮތުން 155 ރިސޯޓެއްގައި 36،832 އެނދު އޮޕަރޭޓްކުރަމުންދާއިރު، 570 ހޮޓެލް އަދި ގެސްޓްހައުސްތަކުގައި 11،006 އެނދު ގެންދަނީ އޮޕަރޭޓްކުރަމުންނެވެ. މީގެ އިތުރުން 144 ސަފާރީއެއްގައި 2،846 އެނދު އޮޕަރޭޓްކުރަމުން ގެންދާ ކަމަށް ޓޫރިޒަމް މިނިސްޓްރީން ވަނީ ހާމަކޮށްފައެވެ.

މިއަހަރު ނިމުމުގެ ކުރިން ރާއްޖޭގެ ފަތުރުވެރިކަން ރަނގަޅުވެ، އިޤްތިޞާދު ކޮޅަށް ޖެހޭނެ ކަމަށް މާހިރުން ލަފާކުރެއެވެ. އަދި ރާއްޖޭގެ އިޤްތިޞާދު ނުހުއްޓި ކުރިއަށްދާނަމަ ސަރުކާރުގެ އަމާޒާ އެއްގޮތަށް މިއަހަރު ނިމުމުގެ ކުރިން 1.5 މިލިއަނަށްވުރެ ގިނަ ފަތުރުވެރިން ރާއްޖެ ގެނެވޭނެކަމަށް ސަރުކާރުން ބުނެއެވެ.