ރައީސް ސާލިހު ދެއްވި ތަގުރީރު ވަނީ މުޅި ދުނިޔޭގެ ވައިގައި ހިފާފައި: މިނިސްޓަރު މައުސޫމް
ރައީސް ސާލިހުގެ ތަގުރީރުގެ އަޑު ފަނޑުކުރަން ވެސް ބަޔަކު މީހުން ވަރަށް މަސައްކަތްކުރި
ރައީސް ސޯލިހު އަދި ޓޫރިޒަމް މިނިސްޓަރ ޑރ. އަބްދުﷲ މައުސޫމް
އދ.ގެ އާންމު މަޖިލީހުގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ދެއްވި ތަގުރީރު މުޅި ދުނިޔޭގެ ވައިގައި ހިފައިފައިވާ ކަމަށް ޓުއަރިޒަމް މިނިސްޓަރު ޑރ. އަބްދު ﷲ މައުސޫމް ވިދާޅުވެއްޖެއެވެ.
މިނިސްޓަރު މައުސޫމް ވިދާޅުވީ އދ. އާންމު މަޖިލީހުގައި ރައީސް ސާލިހުގެ ތަގުރީރުގެ އަޑު ފަނޑުކުރަން ބަޔަކު މީހުން ވަރަށް މަސައްކަތް ކުރި ކަމަށެވެ. އެގޮތުން ނޫސްވެރިންގެ ބައްދަލުވުންތައް ބާއްވާ ހަގީގަތާއި ޚިލާފު އެތައް ވާހަކަތަކެއް ފަތުރާފައިވާ ކަމަށް މިނިސްޓަރު މައުސޫމް ވިދާޅުވިއެވެ.
އދ.ގެ އާންމު މަޖިލީހުގައި ރައީސް ސާލިހު ދެއްވި ތަގުރީރު މުޅި ދުނިޔޭގެ ވައިގައި ހިފައިފައިވާ ކަމަށް މިނިސްޓަރު މައުސޫމް ވިދާޅުވެފައިވާއިރު، އެމަނިކުފާނުގެ ތަގުރީރަށް އެމްޑީޕީން ވެސް ވަނީ ތައުރީފު ކޮށްފައެވެ.
މިމަހުގެ 21 ވީ އަންގާރަ ދުވަހުގެރޭ ރައީސް ސާލިހު އދގެ އާއްމު މަޖިލީހުގެ 76ވަނަ ސެޝަންގައި ދެއްވި ތަގުރީރަކީ ހުރިހާ ގޮތަކުންވެސް ދިވެހިންނަށް ޚާއްސަ ތަގުރީރެކެވެ. އެ ތަގުރީރަށް އެތައް ބައެއްގެ ތައުރީފު އަންނަނީ އޮހެމުންނެވެ. ރައިސް ސާލިހު ވެގެން ގޮސްފައި ވަނީ ދިވެހިންގެ މާދަރީ ބަހުން އާއްމު މަޖިލީހުގައި މުޅި ތަގުރީރު ދެއްވި ރާއްޖޭގެ ފުރަތަމަ ރައީސަށެވެ.
ރައީސް ސާލިހު ދިވެހި ބަހުން ދެއްވި މި ތަގުރީރަށް ދުނިޔޭގެ ގައުމުތަކުން ތައުރީފް ކުރަމުން އަންނައިރު ދިވެހިންނަށް މި ތަގުރީރު ޚާއްސަ ވަނީ ދިވެހި ބަހުން ތަގުރީރު ކުރެއްވުމުންނެވެ. އަދި އުންމީދުކޮށްގެން ތިބި އެތައް ވާހަކަތަކެއްވެސް އަޑުއިވުމުންނެވެ. އަދި ރައީސް ތަގުރީރު ދެއްވިއިރު އާއްމު މަޖިލީހުގެ ރިޔާސަތު ބަލަހައްޓަވަން ރާއްޖޭގެ ފޮރިން މިނިސްޓަރ އިންނެވުމުންނެވެ.
ރައީސްގެ ތަގުރީރުގައި މުހިއްމު އެތައް ކަމަކަށް އަލި އަޅުއްވާލެއްވިއެވެ. މުސުމާބެހޭ މައްސަލަތަކާއި، ޓެރަރިޒަމާ ދެކޮޅަށް ވިދާޅުވި ބަސްފުޅުތަކަކީ މަޖިލީހުގައި ގިނަ ގައުމުތަކުން ދައްކަން ފަސްޖެހުނު ވާހަކަތަކެވެ.
މީގެ އިތުރުން ފަލަސްތީނަކީ މިނިވަން ދައުލަތެއް ކަމަށް ވަކާލާތުކުރުމުގައި ދިވެހިން އަބަދުވެސް ދެމިތިބޭނެކަމުގެ ޔަގީންކަން އެމަނިކުފާނު ދެއްވިއެވެ. މި ތަގުރީރަށް ގިނަ ބައެއްގެ ސަމާލުކަން ލިބިގެން ދިޔައީ މި ސަބަބާހުރެއެވެ.
