ކޮވިޑްގެ އަސްލު ޗައިނާއިން ސިއްރުކުރޭ - ބައިޑެން
ކޮވިޑްގެ އަސްލު ހޯދުމަށް އެމެރިކާއިން ކުރާ މަސައްކަތުގައި ޗައިނާއިން އެއްބާރުލުން ދޭން ޖެހޭ
އެމެރިކާގެ ރައީސް ޖޯ ބައިޑަން
ކޮވިޑްގެ އަސްލު ޗައިނާއިން ސިއްރުކުރާކަން އެމެރިކާގެ ޖާސޫސީ ރިޕޯޓްތަކުން އެނގޭކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެއެވެ.
މީޑިއާތަކަށް ދިން ބަސްދީގަތުމެއްގައި އެމެރިކާގެ ރައީސް ޖޯ ބައިޑެން ވިދާޅުވީ ކޮވިޑްގެ އަސްލު ހޯދުމަށް އެމެރިކާއަށް ކުރެވެންހުރި ހުރިހާ މަސައްކަތެއް ކުރާނެ ކަމަށެވެ. އަދި އެމެރިކާއިން ކުރަމުން އަންނަ މަސައްކަތުގައި ޗައިނާއިން އެއްބާރުލުން ނުދޭ ކަމަށާއި، ކޮވިޑްގެ އަސްލު ދެނެގަތުމުގައި ޗައިނާގެ އެއްބާރުލުން ބޭނުންވާ ކަމަށެވެ.
ބައިޑެން ވިދާޅުވީ ކޮވިޑްގެ އަސްލާ ބެހޭ ގިނަ ކަންކަން ޗައިނާއިން ސިއްރުކޮށްފައިވާ ކަމަށެވެ. އެކަމަކު ޗައިނާއިން ކޮވިޑްގެ އަސްލު ހޯދުމާ ގުޅޭގޮތުން އެއްބާރުލުން ނުދޭނަމަ އެމެރިކާއިން އަޅާނެ ފިޔަވަޅެއް ބައިޑެން ދެއްވާފައެއް ނުވެއެވެ.
އެމެރިކާގެ ޖާސޫސީ އިދާރާތަކުން ތުހުމަތު ކުރާ ގޮތުގައި ކޮވިޑަކީ ޗައިނާގެ ވޫހާން ސިޓީގެ ވައިރިލޮޖިކަލް ރިސާޗާ ބެހޭ ލެބޯޓްރީއަކުން ލީކުވެގެން ފެތުރުނު ވައިރަހެއް ކަމަށާއި، އަދި ޗައިނާއިން އުޅެނީ އެކަން ސިއްރުކޮށްގެން ކަމަށެވެ.
މީގެ ކުރިން އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ވެރިކަމުގައި ވެސް އެމަނިކުފާނު ވަނީ ކޮވިޑަކީ ޗައިނާގެ ލެބަކުން ފެތުރުނު ވައިރަހެއް ކަމަށް ވިދާޅުވެ އެކަމުގެ ޒިންމާ ޗައިނާއިން ނަގަން ޖެހޭނެ ކަމުގައި ވިދާޅުވެފައެވެ.
