އެމެރިކާގެ ނަން ނުބައިކޮށް ވިދާޅުވެވި، ބައިޑަން އަށް ބޮޑު ލަދުވެތި ކަމެއް

އެމެރިކާގެ ނަން ވިދާޅުވުމުގައި ބޮޑު ގޯހެއް ހެއްދެވި، ބޮޑު ލަދުވެތިކަމަކާ ކުރިމަތިލައްވަން އެ ޤައުމުގެ ކުރީގެ ރައީސް ޖޯ ބައިޑަން އަށް ޖެހިވަޑައިގެންފި އެވެ.

ހުކުރު ދުވަހު އެމެރިކާގެ ވެރި ރަށް ވޮޝިންޓަންގައި ކުރިއަށް ދިޔަ ފޯރަމެއްގައި ވާހަކަ ދައްކަވަމުން ގެންދަވަނިކޮށް، ބައިޑަން އަށް ވަނީ އެމެރިކާގެ ނަން ނުބައިކޮށް ވިދާޅުވެވިފަ އެވެ.

އުމުރުފުޅުން 83 އަހަރުގެ ބައިޑަން ދައްކަވަމުން ދިޔަ ވާހަކައިގައި ވަނީ، އެމެރިކާގެ މިހާރުގެ ރައީސް ޑޮނަލްޑް ޓްރަމްޕް އަށް ވެސް ފާޑު ވިދާޅުވެފަ އެވެ. އެ ވާހަކައިގެ ތެރެއިން ޖޯޝުގައި ވާހަކަ ދައްކަވަމުން ދަނިކޮށް، ބައިޑަން އަށް ވަނީ އެމެރިކާގެ ނަން ނުބައިކޮށް ވިދާޅުވެވިފަ އެވެ.

ގާތް ގަނޑަކަށް 20 މިނެޓުގެ އެ ވާހަކަފުޅުގައި ބައިޑަން ވިދާޅުވީ، މިހާރުގެ ސަރުކާރުން އެމެރިކާ އަށް އެތައް ދަތި ކަމެއް ކުރިމަތި ކޮށްފައިވާ ކަމަށް ޤަބޫލު ކުރައްވާ ކަމަށެވެ. އެހެން ނަމަވެސް، އެ ޙާލަތުން އެމެރިކާ އަރައިގަނެ، ކުރިއަށް ދާނެ ކަމަށާއި، އެކަމުގައި ރައްޔިތުން ތެދުވާން ޖެހޭ ކަމަށް ބައިޑަން ވަނީ ވިދާޅުވެފަ އެވެ.

މީގެ އިތުރުން ބައިޑަން ވިދާޅުވެފައި ވަނީ، އެމެރިކާ ރައްޔިތުން އިމާންތެރިކަމާއި، އުންމީދާ އެކު ތެދުވެ ބަޔަކަށް އެކަން ހަނދާން ކޮށްދީފި ނަމަ، އެކަންކަން ކުރެވޭނެ ކަމަށެވެ. އެއަށް ފަހު، އަހަރަމެންނަކީ ޔުނައިޓެޑް ސްޓޭޓްސް އޮފް އެމެރިކާ ކަމަށް ބައިޑަން ވިދާޅުވާން އުޅުއްވި ނަަމަވެސް، ވިދާޅުވެވުނީ ޔުނައިޓެޑް ސްޓޭޓްސް އޮފް އެމެރިގޮޓިޓް އެވެ. އެއާ އެކު ވާހަކަފުޅު ކުރިއަށް ގެންދަވައި ދެން ބައިޑަން ވިދާޅުވީ، އަހަރަމެންނަކީ ޔޫއެސް ކަމަށެވެ.

އެ ފޯރަމްގެ ވާހަކައިގެ ތެރެއިން ބައިޑަން އަށް އެމެރިކާގެ ނަން ނުބައިކޮށް ވިދާޅުވެވިފައިވާއިރު، އެމެރިކާގެ ރައީސް ކަމުގައި ބައިޑަން ހުންނެވިއިރު ވެސް މި ކަހަލަ ކަންކަން ވަނީ ހިނގައިފަ އެވެ. ޚާއްސަކޮށް ރިޔާސީ ފަހު އަހަރުގެ ތެރޭގައި، އުމުރުން ދުވަސް ވުމުގެ ސަބަބުން ބައިޑަން އަށް ވަނީ އެތައް ގޮންޖެހުންތަކާ ކުރިމަތިލާން ޖެހިވަޑައިގެންފަ އެވެ.

ޚާއްސަކޮށް 2024 ވަނަ އަހަރުގެ ރިޔާސީ އިންތިޚާބުގެ ކުރިން، ޓްރަމްޕް އާއެކު އޮތް ރިޔާސީ ބަހުސްގައި ބައިޑަންގެ ފަރާތުން ވަނީ ދަށް ޕާފޮމަންސްއެއް ފެނިފަ އެވެ. ވާހަކަ ދެއްކެވުމުގައި އިންތިހާ އަށް އުނދަގޫ ތަކެއް ކުރިމަތިވެ ވަޑައިގެންނެވިއިރު، ބައިޑަން ވިދާޅުވާ ވާހަކަ ސާފު ނުވާ ވަގުތުތައް ވެސް ބަހުސްގެ ތެރެއިން ދިޔަ އެވެ. އެކަމުގެ ސަބަބުން، ބަހުސްގައި ޓްރަމްޕް ގެންދެވީ އެކަމަށް ވަރަށް ބޮޑަށް ފާޑު ވިދާޅުވަމުންނެވެ.

އޭގެ ފަހުން ބައިޑަން އަށް އެތައް ޕްރެޝަރެއް ކުރިމަތިވެ ވަޑައިގެންނެވިއިރު، އެންމެ ފަހުން ބައިޑަން ނިންމެވީ އެމެރިކާގެ ރިޔާސީ ރޭހުން ވަކިވެ ވަޑައިގަތުމަށެވެ. ރިޔާސީ ޓިކެޓު ލިބިވަޑައިގެންނެވުމުގެ ކުރިން ވެސް، ބައިޑަންގެ ޞިއްޙީ ޙާލު ކޮޅާ ގުޅޭ ގޮތުން ސުވާލު ތަކެއް އުފެދިފައި ވަނިކޮށް، ބައިޑަންގެ ޑޮކްޓަރު ވަނީ އޭނާ ހުންނެވީ ޞިއްޙީ ގޮތުން ރަނގަޅު ޙާލަތެއްގައި ކަަމަށް ހާމަ ކޮށްފަ އެވެ.

ބައިޑަންގެ ރިޔާސީ ދައުރު ނިމުނު ފަހުން، މިއަހަރުގެ މެއި މަހުގެ ތެރޭގައި ވަނީ ބައިޑަން އަށް ޕްރޮސްޓޭޓް ކެންސަރު ޖެހިފައިވާކަން ދެނެގަނެވިފަ އެވެ. އަދި ބައިޑަން ވަނީ ކެންސަރަށް ފަރުވާ ހޯއްދަވަން ވެސް ފައްޓަވައިފަ އެވެ.