އެޕްސްޓީން އާއި ރައީސް ޓްރަމްޕް ގެ ގާތް ގުޅުން ހާމަވާ އިތުރު ފޮޓޯ ތަކެއް ރިލީޒްކޮށްފި

އެމެރިކާގެ ގާނޫނު ހަދާ މަޖިލީހުގެ ޑިމޮކްރެޓިކް ޕާޓީ އަށް ނިސްބަތްވާ މެންބަރުން ޖެފްރީ އެޕްސްޓީން އާ ގުޅުން ހުރި ދެ އާ ބެޗެއްގެ ފޮޓޯތައް ރިލީޒްކޮށްފި އެވެ.

މި އައު ފޮޓޯ ތަކާ އެކު، ކުޑަކުދިންނަށް ޖިންސީ ގޯނާ ކުރުމުގެ ކުށް ސާބިތުވި އެޕްސްޓީން އާއި ބާރުގަދަ މީހުންނާ އޮތް ގުޅުމުގެ ތަފްސީލްތައް އިތުރަށް ވަނީ ހާމަވެފައެވެ.

އެމެރިކާގެ ރައީސް ޑޮނަލްޑް ޓްރަމްޕް، ކުރީގެ ޕްރިންސް އެންޑްރޫ އަދި ކުރީގެ ޓްރަމްޕްގެ މުޝީރު ސްޓީވް ބެނަން  ފޮޓޯތަކުގައި ފެންނަ މަޝްހޫރު ފަރާތްތަކުގެ ތެރޭގައި ހިމެނެ އެވެ. 

ހައުސް އޯވަސައިޓް ކޮމިޓީގެ މެންބަރުން ހުކުރު ދުވަހު ރިލީޒްކުރި 100 އެއްހާ ފޮޓޯ އަކީ އަމުރެއް ނެރެގެން ހޯދި 95،000 އަށްވުރެ ގިނަ ފޮޓޯތަކުގެ ތެރެއިން ބައެއް ކަމަށް ޑިމޮކްރެޓުން ބުނެފައިވެއެވެ.

އަނެއްކޮޅުން ގާނޫނު ހަދާ މަޖިލީހުން ފާސް ކުރި ބިލަކާ ގުޅިގެން ޖަސްޓިސް ޑިޕާޓްމަންޓުން އެޕްސްޓީން އާ ގުޅުންހުރި ހުރިހާ ލިޔުންތައް އާންމު ކުރުމަށް ދީފައިވާ ސުންގަޑި އަންނަ ހަފްތާ އަށް ހަމަވާނެ އެވެ.

ގާނޫނު ހަދާ މެންބަރުން ހުކުރު ދުވަހު ރިލީޒްކުރި ފުރަތަމަ ބެޗުގެ ފޮޓޯތަކުގައި އެޕްސްޓީން ގިނަ މަޝްހޫރު ފަރާތްތަކަކާ އެކު ފެންނަކަން ފާހަގަ ކުރެވޭއިރު، އޭގެ ތެރެއިން އަދި އެއްވެސް ފަރާތަކުން އަދި ފޮޓޯ ތަކާ ބެހޭ ގޮތުން ކޮމެންޓެއް ނުކުރެ އެވެ. އޭގެ ތެރެއިން ގިނަ ފަރާތަކަކުން އެޕްސްޓީން އާ ގުޅިގެން އެއްވެސް ކުށެއް ކޮށްފައިނުވާ ކަމަށް މީގެ ކުރިން ބުނެފައިވެ އެވެ.

ހުކުރު ދުވަހު ރިލީޒްކުރި ފޮޓޯތަކުގެ ތެރެއިން ތިން ފޮޓޯއެއްގައި އެމެރިކާގެ ރައީސް ޓްރަމްޕް ފެނިފައިވެ އެވެ. އެއް ފޮޓޯއެއްގައި މޫނު ނުފެންނަ ގޮތައް ހުރި އަންހެނަކާ އެކު ހުއްޓައި ހުރި މަންޒަރު ފެނިފައިވެ އެވެ.

އަނެއް ފޮޓޯއެއް ގައި ޓްރަމްޕް އެޕްސްޓީން އާ އެކު 1997 ވަނަ އަހަރު ނިއު ޔޯކްގައި ބޭއްވި ވިކްޓޯރިއާސް ސީކްރެޓް ޕާޓީއެއް ގައި މޮޑެލް އިންގްރިޑް ސެއިންހޭވް އާ ވާހަކަދައްކަން ހުރި މަންޒަރު ފެނިފައިވެއެވެ - މިއީ ކުރިންވެސް އާންމުވެފައިވާ ފޮޓޯއެކެވެ.

ތިން ވަނަ ފޮޓޯއެއް ގައި ޓްރަމްޕް ގިނަ އަންހެނުންތަކަކާ އެކު ހިނިތުންވެ ހުރި މަންޒަރު ފެނިފައިވާއިރު، އެ އަންހެނުންގެ މޫނުތައް ވެސް ވަނީ ފޮރުވާފަ އެވެ.

އިތުރު ފޮޓޯއެއް ގައި "ޓްރަމްޕް ކޮންޑަމް" ލިޔެފައިވާ ރަތް ޕެކެޓްތަކެއްގައި ރައީސް ގެ ފޮޓޯ ޖަހާފައި ހުއްޓާ ފެނެ އެވެ.

ވައިޓް ހައުސް އިން މިއީ، "ޑިމޮކްރެޓުންގެ ހޯކްސް" އެއް ކަމަށާއި މިއީ ރައީސް "ތަކުރާރުކޮށް ދޮގުކޮށްފައިވާ" ކަމެއް ކަމަށް ބުނެފައިވެ އެވެ. ޓްރަމްޕް އެތައް ފަހަރަކު ވިދާޅުވެފައި ވަނީ އެޕްސްޓީން ގެ މައްސަލަ އަކީ އޭނާގެ ވެރިކަމުގެ ކާމިޔާބީތަކުގެ ސަމާލުކަން އެހެން ދިމާއަކަށް އަނބުރާލުމަށް އޭނާ އާ ދެކޮޅު ފަރާތްތަކުން ރާވާފައިވާ ރޭވުމ

ހުކުރު ދުވަހުގެ ފައިލްތަކުގައި އެޕްސްޓީން ގެ ޕްރައިވެޓް ފޮޓޯތައް ވެސް ހިމެނޭއިރު، އޭގެ ތެރޭގައި އޭނާ ބާތުޓަބެއް ގައި އޮތް ފޮޓޯ އެއް ހިމެނެއެވެ. އަދި އެ ފޮޓޯތަކުގައި އޭނާ އެހެން ގިނަ މަޝްހޫރު މީހުންނާ އެކު ހުރި މަންޒަރުތައް ވެސް ފެނިފައިވާ އިރު، އޭގެ ތެރޭގައި ކުރީގެ ރައީސް ބިލް ކްލިންޓަން އަދި ޓެކްނޮލޮޖީ ބިލިއަނަރ ބިލް ގޭޓްސް ހިމެނެއެވެ.

ކްލިންޓަން ވަނީ އެޕްސްޓީން އާ ގުޅިގެން އެއްވެސް ކުށެއް ކޮށްފައިނުވާނެ ކަމަށް ވިދާޅުވެފަ އެވެ. 2019 ވަނަ އަހަރު ކްލިންޓަން ގެ ތަރުޖަމާނަކު ބުނެފައިވަނީ އެޕްސްޓީން ގެ "ނުބައި ކުށްތަކާ ބެހޭ ގޮތުން އޭނާ އަށް އެއްވެސް އެއްޗެއް ނޭނގޭ" ކަމަށެވެ.