އިޤްތިޞާދީ "ބޫމްް" އަކަށް ވައުދުވެ ވަޑައިގެންނެވުމާ އެކު، ޓްރަމްޕްގެ ފާޑު ކިޔުން ބައިޑަން އަށް

އެމެރިކާ އާއި އެ ޤައުމުގެ ރައްޔިތުންނަށް އިޤްތިޞާދީ ގޮތުން "ބޫމް"އެއް އަންނާނެ ކަމަށް ވައުދުވެ ވަޑައިގެންނެވުމާ އެކު، އެމެރިކާގެ ރައީސް ޑޮނަލްޑް ޓްރަމްޕް، އެ ޤައުމުގެ ކުރީގެ ރައީސް ޖޯ ބައިޑަން އަށް ވަރަށް ބޮޑަށް ފާޑު ވިދާޅުވެއްޖެ އެވެ. 

އެމެރިކާގެ ރިޔާސީ ގަނޑުވަރު ވައިޓް ހައުސްގައި ޤައުމާ މުޚާތަބު ކުރައްވައި ވާހަކަ ދައްކަވަމުން ޓްރަމްޕް ވިދާޅުވެފައި ވަނީ އިޤްތިޞާދީ ބޫމްއެއް އެ ޤައުމަށް އަންނާނެ ކަމަށެވެ. އަދި މިހާރު ކުރިމަތިލާން ޖެހިފައިވާ އެންމެހާ ދަތި ތަކަކީ، ކުރީގެ ރައީސް ބައިޑަންގެ ވެރިކަމުގައި ކުރިމަތި ކޮށްފައިވާ ޙާލަތެއް ކަމަށް ޓްރަމްޕް ވިދާޅުވި އެވެ. 

އެއާ އެކު ޓްރަމްޕް ވިދާޅުވީ، މީގެ އެގާރަ މަަސް ދުވަސް ކުރިން އޭނާ ހަވާލުވީ ބޮޑު "ހަޑި ގަނޑެއްގެ" ތެރޭގައި އޮތް ޤައުމަކާ ކަމަށާއި، ނަމަވެސް މިހާރު އެ ހަޑިތައް ސާފު ކޮށްފައިވާ ކަމަށެވެ. މިއީ ޓްރަމްޕްގެ ރިޔާސީ ދެ ވަނަ ދައުރުގެ ފުރަތަމަ އަހަރު ނިމެން ކައިރިވެފައި ވަނިކޮށް އޭނާ ދެއްކެވި ވާހަކަ އެކެވެ. 

ޓްރަމްޕްގެ ވާހަކަފުޅުގައި އޭނާ ވިދާޅުވީ ކާބޯ ތަަކެތީގެ އަގުތައް އަދި ގޭހުގެ އަގުތައް ވަރަށް ބާރަށް ދަށަށް ދާން ފަށާފައިވާ ކަމަށާއި، އެކަން މުޅިން އަދި ނުނިމޭ ކަމަށެވެ. އެހެން ނަމަވެސް، މިހާރު ވެސް އެކަމުގައި ވަރަށް ބޮޑު ކުރިއެރުން ތަކެއް ފެންނަމުން އަންނަ ކަމަށް ޓްރަމްޕް ވިދާޅުވެފައިވެ އެވެ. އެމެރިކާގައި ތަކެތީގެ އަގު ބޮޑުވުމާއި، ރައްޔިތުންގެ އާންމު ދިރިއުޅުމުގެ ޙާލަތު ގޯސްވެފައި ވުމުގެ ސަބަބުން، އެ ޤައުމުގެ ރައްޔިތުންގެ މެދުގައި ވަނީ ނުތަނަވަސްކަން ބޮޑުވެފަ އެވެ. 

މީގެ އިތުރުން ޓްރަމްޕް ވަނީ ހައިރާން ކުރުވަނިވި ނިންމުމެއް ވެސް އިއުލާން ކުރައްބައިފަ އެވެ. އެގޮތުން ޓްރަމްޕް ވިދާޅުވީ ކްރިސްމަސްގެ ކުރިން، އެމެރިކާގެ 1.45 ސިފައިންނަށް ވޯރިއާ ޑިވިޑެންޓްގެ ގޮތުގައި 1776 އެމެރިކާ ޑޮލަރުގެ ބޯނަސް ޗެކެއް ދެއްވާނެ ކަމަށެވެ. މި ފައިސާ އަކީ އެމެރިކާ އިން ތައާރަފު ކޮށްފައިވާ ޓެރިފް އިން ލިބޭ އާމްދަނީ އިން ޚަރަދު ކުރާ ފައިސާ ކަމަށް ހާމަ ކޮށްފައިވެ އެވެ. 

އެމެރިކާގެ އިޤްތިޞާދު ކުރިއެރުވުމަށް ކުރައްވަމުން ގެންދަވާ މަސައްކަތް ތަކަށް އިޝާރާތް ކުރައްވައި ޓްރަމްޕް ވިދާޅުވެފައި ވަނީ، ކުރިއަށް އޮތް 2026 ވަނަ އަހަރު، މުޅި ދުނިޔެ ނުދެކޭ ފަދަ އިޤްތިޞާދީ ކުރިއެރުމެއް އެމެރިކާ އަށް ލިބޭނެ ކަމަށެވެ. ޓްރަމްޕް މިހެން ވިދާޅުވެފައިވާއިރު، އަންނަ އަހަރަކީ އެމެރިކާ އާއި މެކްސިކޯ އަދި ކެނެޑާ ގުޅިގެން ފީފާ ވަރލްޑް ކަޕް ފުޓުބޯޅަ މުބާރާތް ބޭއްވުމަށް ހަމަޖެހިފައިވާ އަހަރެވެ. 

އެމެރިކާގެ ރިޔާސީ ގަނޑުވަރު ވައިޓް ހައުސް އިން ޓްރަމްޕްގެ މި ވާހަކަފުޅު ސިފަ ކުރައްވާފައި ވަނީ، އިޤްތިޞާދީ އެޖެންޑާ އާއި، އެޖެންޑާގެ ކަންކަން ހިއްސާ ކުރުމުގެ ފުރުސަތުގެ ގޮތުގަ އެވެ. ނަމަވެސް، ޓްރަމްޕްގެ ވާހަކަފުޅުގެ ބޮޑު ބައެއް ހޭދަ ކުރައްވާފައި ވަނީ ކުރީގެ ރައީސް ބައިޑަން، އަދި އިދިކޮޅު ޑިމޮކްރަޓިކް ޕާޓީ އަށް ފާޑު ވިދާޅުވުމަށެވެ. ޓްރަމްޕް ވިދާޅުވީ ވަކި ބަޔަކު އެމެރިކާގެ ވަޒީފާ ތަކުން ވައްކަން ކޮށްފައިވާ ކަމަށެވެ. 

ޑިމޮކްރަޓިކް ޕާޓީގެ ސެނެޓަރު ޗަކް ޝުމާ ވިދާޅުވެފައި ވަނީ، ޓްރަމްޕްގެ ވާހަކަ އިން ސިފަ ވެގެން ދިޔައީ، އޭނާ އުޅުއްވަނީ އެހެން ޚިޔާލެއްގެ ތެރޭގައި ކަމަށެވެ. އެގޮތުން އެމެރިކާގެ ރައްޔިތުން ކޮންމެ ދުވަހަކު ތަހަންމަލު ކުރަމުން އަންނަ ދަތިކަން، ރައީސް ޓްރަމްޕް އަށް އިޙުސާސް ނުކުރެވޭ ކަމަށް ޝުމާ ވަނީ ވިދާޅުވެފަ އެވެ. އޭނާ ވިދާޅުވީ ހަގީގަތަކީ ތަކެތީގެ އަގުތައް އުފުލެމުން އައުން ކަމަށާއި، މަސައްކަތް ނެތި ތިބެން ޖެހޭ ތިބުން ވެސް އިތުރުވެފައިވާ ކަމަށެވެ. 

އެމެރިކާގައި ނަގަމުން އަންނަ ޕޯލް ތަކުން ދައްކާ ގޮތުގައި ރައްޔިތުން އެންމެ ބޮޑަށް ކަންބޮޑުވަނީ ތަކެތީގެ އަގު ބޮޑުވުމުގެ މައްސަލައިގަ އެވެ. މާހިރުން ބުނާ ގޮތުގައި މިއީ، ވިޔަފާރި ކުރާ ޤައުމުތަކާ ދެކޮޅަށް ރައީސް ޓްރަމްޕް އަޅުއްވާފައިވާ ޓެރިފް ތަކުގެ ސަބަބުން ކުރިމަތިވެފައިވާ މައްސަލަ އެކެވެ. ބުދަ އާންމު ކޮށްފައިވާ ޕީބީއެސް ނިއުސްގެ ސާވޭ އިން ދައްކާ ގޮތުގައި، ޓްރަމްޕްގެ އިޤްތިޞާދީ ފިޔަވަޅުތަކާ މެދު އެމެރިކާގެ 57 އިންސައްތަ ރައްޔިތުން ނުރުހެ އެވެ. 

މީގެ އިތުރުން ޔޫވޮގްް އިން އަންގާރަ ދުވަހު އާންމު ކޮށްފައިވާ ސާވޭ އަކުން ދައްކާ ގޮތުގައި، ޓްރަމްޕްގެ ދައުރުގައި އެމެރިކާގެ އިޤްތިޞާދު ގޯސްވަމުން އަންނަ ކަމަށް 52 އިންސައްތަ ރައްޔިތުން ޤަބޫލު ކުރެ އެވެ. މިއީ އަންނަ އަހަރު އޮންނަ މިޑް ޓަރމް އިންތިޚާބަށް ބަލާއިރު، ވެރިކަން ކުރާ ރިޕަބްލިކަން ޕާޓީ އަށް އޮތް ވަރަށް ބޮޑު ކަންބޮޑުވުމަކަށް ވާނެ ކަމަށް މާހިރުން ލަފާ ކޮށްފައިވެ އެވެ.