އަފްޣާނިސްތާނުގައި އެމެރިކާއަށް ލިބުނު ނާކާމިޔާބީއާއެކު ބައިޑަންގެ ތާއީދު ދުވަހަކުވެސް ނުދާހާ މިންވަރަށް ދަށަށް

އަފްޣާނިސްތާނުގެ ކޮންޓްރޯލް ތާލިބާނުން ނެގުމާއެކު އެގައުމުގައި އަސްކަރީ ހަރަކާތްތައް 20 އަހަރު ވަންދެން ކުރިޔަށް ގެންދިޔަ އެމެރިކާ އަށް ކުރިމަތިވި ބޮޑު ނާކާމިޔާބީގެ ސަބަބުން އެމެރިކާގެ ރައީސް ޖޯ ބައިޑަންގެ ތާއީދު މިއިން ދުވަހަކު ދަށަށް ނުދާހާ މިންވަރަށް ދަށަށް ސޮއްސާލައިފިއެވެ.

އަފްޣާނިސްތާނުގެ ކޮންޓްރޯލް ތާލިބާނުން ނެގުމާއެކު އެގައުމުގައި ތިބި އެމެރިކާގެ ސިފައިންނާއި އާންމުން އަނބުރާ އެމެރިކާއަށް ގެނައުމުގެ މަސައްކަތް އަންނަނީ ކުރަމުންނެވެ. އެމެރިކާއަށް ކުރިމަތިވި ނާކާމިޔާބީ އާއެކު އެގައުމުގައި ނެގެމުންދާ ޚިޔާލު ހޯދުންތަކުން ދައްކާގޮތުގައި ބައިޑަންގެ ތާއީދު ވަނީ ވަރަށް ބޮޑަށް ދަށަށް ގޮސްފައެވެ. އެގޮތުން އޮގަސްޓް މަހުގެ 18ން 19ށް ކުރިޔަށް ގެންދިޔަ ނޭޝަނަލް އޮޕީނިއަން ޕޯލަކުން ދައްކާގޮތުގައި ބޮޑެތި މީހުންގެ ތެރެއިން ބައިޑަން އަށް މިހާރު ތާއީދުކުރަނީ 46 އިންސައްތަ މީހުންނެވެ. އަދި ބައިޑަންގެ ސިޔާސަތުތަކަށް 49 އިންސައްތަ މީހުން ވަނީ ނޫނެކޭ ބުނެފައެވެ. ދެން ބާކީ ތިބި މީހުން ވަކި އެއްޗެއް ބުނާކަށް ބޭނުމެއް ނުވެއެވެ.

ބައިޑަންގެ ސިޔާސަތުތަކަށް ތާއީދުކުރި މީހުންގެ އަދަދު މިދިޔަ ހަފުތާގައި މައްޗަށް ގޮސްފައިވަނީ އެންމެ 5 އިންސައްތައެވެ. ބައިޑަންގެ ސިޔާސަތުތަކަށް ތާއީދުނުކުރާ މީހުންގެ އިންސައްތަ ވަނީ 6 އިންސައްތަ އޭގެ ކުރީ ހަފުތާ އާ އަޅާބަލާއިރު މައްޗަށް ގޮސްފައެވެ.

ޕޯލުގެ ނަތީޖާއިން ދައްކާގޮތުގައި ބައިޑަންގެ މަގްބޫލުކަން ޑިމޮކްރެޓުންނާއި ރިޕަބްލިކަނުން އަދި އެއްވެސް ފިކުރަކަށް ތާއީދުނުކުރާ މީހުންގެ މެދުގައިވެސް ވަނީ ދަށްވެފައެވެ.

އެގޮތުން ރިޕަބްލިކަނުންގެ ކޮންމެ 10 މީހަކުން 9 މީހެއް، ޑިމޮކްރަޓުންގެ ކޮންމެ 10 މީހަކުން 2 މީހެއް އަދި މިނިވަން ޚިޔާލުގެ ކޮންމެ 10 މީހަކުން 5 މީހަކު ބުނެފައިވަނީ ބައިޑަންގެ ސިޔާސަތުތައް ކަމުނުދާކަމަށެވެ.

ރޮއިޓަރސް އިން ކުރިޔަށް ގެންގޮސްފައިވާ މިޕޯލަކީ އޮންލައިންކޮށް ކުރިޔަށް ގެންގޮސްފައިވާ ޕޯލެކެވެ. މިޕޯލުގައި 1002 މީހުން ބައިވެރިވެފައިވާއިރު 429 މީހުންނަކީ ޑިމޮކްރަޓުންނެވެ. އަދި 365 މީހުންނަކީ ރިޕަބްލިކަނުންނެވެ.