ބިމުގެ އަޑީގައިވާ އީރާންގެ ނިއުކްލިޔަރ މަރުކަޒުތައް ނައްތާލަން އެމެރިކާއާއި އިސްރާއީލުން ތައްޔާރުވަނީ!
22 އޮކްޓޯބަރު 2026 | ބުރާސްފަތި 02:51އީރާނުގެ ނިއުކްލިޔަރ މަރުކަޒުތަކާއި ހަކަތައިގެ ވަސީލަތްތަކަށް އަމާޒުކޮށް ވަރުގަދަ ހަމަލާތަކެއް ދިނުމަށް އެމެރިކާއާއި އިސްރާއީލުން އަންނަނީ ތައްޔާރުވަމުން. މި ހަމަލާތަކާ ގުޅޭގޮތުން ދެ ޤައުމުގެ ދިފާޢީ އިސްވެރިން މަޝްވަރާކުރައްވާފައިވީ ނަމަވެސް، މިއީ އީރާނުން ނިއުކްލިޔަރ ހަތިޔާރު އުފެއްދުން ހުއްޓުވުމަށް ގެންގުޅޭ އިޚުތިޔާރެއް ކަމަށް ވައިޓް ހައުސްއިން ބުނޭ. ނަމަވެސް، ސަރަހައްދީ ހަމަޖެހުމަށް ބުރޫއަރާފާނެތީ މި ފަދަ ހަމަލާއަކަށް ޓްރަމްޕް ހުއްދަ ދެއްވުމަކީ ދުރުކަމެއް ކަމަށް ރިޕޯޓުތައް ބުނޭ
އެމެރިކާގެ މެރިން ސިފައިންނާއި އެމްފިބިޔަސް ރެޕިޑް ޑިޕްލޯއިމެންޓް ބްރިގޭޑުގެ ސިފައިން އަސްކަރީ ތަމްރީނުތަކެއްގެ ތެރެއިން އޮސްޕްރޭ މަރުކާގެ ހެލިކޮޕްޓަރަކަށް އަރަން ހިނގަނީ | ޔޫއެސް މެރިން ކޯޕްސް
އެމެރިކާގެ މިޑްޓަރމް އިންތިޚާބަށް ފަހު އީރާނަށް އަމާޒުކޮށް އަލުން ހަމަލާތަކެއް ދިނުމުގެ ޕްލޭންތަކެއް އެމެރިކާއާއި އިސްރާއީލުގެ އަސްކަރިއްޔާއިން އެކުލަވާލައި، ކުރު ނަމަވެސް ވަރުގަދަ އަސްކަރީ ކެމްޕޭނަކަށް ވާންޖެހޭ ތައްޔާރީތައް ވަމުން އަންނަކަމަށް ދި ނިއު ޔޯކް ޓައިމްސްއިން ބުދަ ދުވަހު ރިޕޯޓުކޮށްފި އެވެ. ދެ ޤައުމުގެ އަސްކަރިއްޔާއިން ތަމްރީނުތައް އިތުރުކޮށްފައިވާ ކަމަށާއި، އޭގެ ތެރޭގައި ހަމަލާދޭނެ އުކުޅުތައް ފަރިތަކުރުމަށް އިރާޤުގެ ވައިގެ ސަރަހައްދުގައި ކުރިއަށްގެންދާ ފަރިތަކުރުންތައް ހިމެނޭ ކަމަށް، އެމެރިކާގެ އޮފިޝަލުންނާއި އެ މަޝްވަރާތަކުގެ މަޢުލޫމާތު ލިބިފައިވާ ފަރާތްތަކާ ހަވާލާދީ އެ ނޫހުން ރިޕޯޓުކޮށްފައިވެ އެވެ.
ހަމަލާ އަމާޒުކުރެވިދާނެ ތަންތަނުގެ ތެރޭގައި އީރާނުގެ ނިއުކްލިޔަރ މަރުކަޒުތަކާއި، މިސައިލާއި ޑްރޯން ކާރުޚާނާތަކުގެ އިތުރުން ހަކަތައިގެ އުމްރާނީ ވަސީލަތްތައް ހިމެނިދާނެ ކަމަށް އެ ރިޕޯޓުގައި ބަޔާންކޮށްފައިވެ އެވެ. މިއާއެކު، އަލުން ދީފާނެ ހަމަލާތަކާ ގުޅޭގޮތުން މަޝްވަރާކުރެއްވުމަށް، އެމެރިކާގެ ދިފާޢީ ވަޒީރު ޕީޓް ހެގްސެތު މި ހަފުތާގައި އިސްރާއީލުގައި އެ ޤައުމުގެ ބޮޑުވަޒީރު ބެންޖަމިން ނަތަންޔާހޫއާ ބައްދަލުކުރެއްވި ކަމަށް އެ ނޫހުން ރިޕޯޓުކުރި އެވެ. އަދި، އީރާނުގެ ނިއުކްލިޔަރ ޕްރޮގްރާމަށް އަމާޒުކުރުމަށް ރާވާފައިވާ ޕްލޭންތަކުގެ ތެރޭގައި، 'ޕިކްއެކްސް' ފަރުބަދައިގެ އަޑީގައި ގާއިމުކޮށްފައިވާ ނިއުކްލިޔަރ މަރުކަޒަށް ހަމަލާދިނުން ހިމެނިދާނެ ކަމަށް ދި ޓައިމްސްއިން ރިޕޯޓުކޮށްފައިވެ އެވެ.
މި އަހަރު ބޮޑު ހަނގުރާމައަކަށް އަލުން ރުޖޫއަވުމަށް ހުށަހެޅުނު ޕްލޭންތަކަށް ޓްރަމްޕް ތަކުރާރުކޮށް ދެކޮޅުހައްދަވާފައިވާކަން ފާހަގަކޮށް، މި ހަމަލާތަކަށް ޓްރަމްޕް ހުއްދަ ދެއްވާނެކަން ކަށަވަރުވުމާ އަދި ވަރަށް ދުރު ކަމަށް އެ ރިޕޯޓުގައި ބަޔާންކޮށްފައިވެ އެވެ. މިޑްޓަރމް އިންތިޚާބުގެ ކުރިން އެމެރިކާއިން އީރާނަށް ހަމަލާ ނުދޭނެ ކަމަށް ބަޔާންކުރައްވައި، ދެ ފަރާތުގެ ދެމެދުގައި ކުރިއަށްދަނީ "ބިނާކުރަނިވި މަޝްވަރާތަކެއް" ކަމަށް މި މަހުގެ ކުރީކޮޅު ޓްރަމްޕް ވިދާޅުވި އެވެ. އީރާނަށް ނިއުކްލިޔަރ ހަތިޔާރު ހޯދިޔަނުދިނުމަށް ޓަކައި ޓްރަމްޕް ހުރިހާ އިޚުތިޔާރެއް ވެސް މޭޒުމަތީގައި ބަހައްޓަވާފައިވާ ކަމަށް ވިދާޅުވެ، އަސްކަރީ ޕްލޭންތަކާ ގުޅޭގޮތުން ސަރުކާރުން ވަކި އެއްޗެއް ހާމަނުކުރަނީ އެއީ "ވުޖޫދުގައި އޮވެދާނެ ނުވަތަ ނެތިދާނެ" ކަންކަން ކަމަށް ވާތީ ކަމަށް، ވައިޓް ހައުސްގެ އޮފިޝަލަކު ވިދާޅުވި އެވެ.
އެމެރިކާއާއި އިސްރާއީލުން ފެބުރުވަރީ 28 ގައި އީރާނާ ދެކޮޅަށް ޣައިރުގާނޫނީ ހަނގުރާމައެއް ފެށުމާ ގުޅިގެން، ތެހެރާނުން ވަނީ ސަރަހައްދުގައިވާ އެމެރިކާގެ އަސްކަރީ މަރުކަޒުތަކަށް މިސައިލާއި ޑްރޯން ހަމަލާތަކުން ރައްދުދީ، ދުނިޔޭގެ ހަކަތައިގެ މައި މަގެއް ކަމަށްވާ ހުރްމުޒް ކަނޑުއޮޅި ބަންދުކޮށްފަ އެވެ. އަދި، ޕާކިސްތާނާއި ޤަތަރު މެދުވެރިވެގެން އެމެރިކާއާއި އީރާނާ ދެމެދު ޖޫން މަހު ސޮއިކުރެވުނު ފަހުމުނާމާގެ އަމަލީ މަސައްކަތްތައް، ހުރްމުޒް ކަނޑުއޮޅީގައި ދަތުރުފަތުރުކުރުމުގެ ކަންކަން ހިމެނޭހެން އުފެދުނު ޚިޔާލުތަފާތުވުންތަކާ ހެދި މިހާރު ވަނީ ހުއްޓުމަކަށް އައިސްފަ އެވެ.
މަސްދަރު: އަނަދޮލު އޭޖެންސީ
