މުސްލިމުންނަށް އެމެރިކާއަށް ވަދެވޭގޮތް ހަދައިފި

މުސްލިމުންނަށް އެމެރިކާއަށް ވަދެވޭ ގޮތް ހަދައިފި އެވެ.

އެމެރިކާގެ ރައީސް ޑޮނަލްޑް ޓްރަމްޕް ނެރުއްވި ރިޔާސީ ގަރާރުގައިވާ ފަދައިން އިސްލާމީ ބައެއް ގައުމުތަކަށް އެމެރިކާއަށް ނުވަދެވޭނެ ގޮތަށް ވަނީ ހަމަޖައްސާފައެވެ. އެހެން ނަމަވެސް އެ ނިންމެވުމަށް ތަބާނުވުމަށް އެމެރިކާގެ ކުރީގެ ރައީސް ޖޯޖް ޑަބްލިއު ބުޝް ވެރިކަމުގައި ފަނޑިޔާރުކަމަށް އައްޔަންކުރި ޖޭމްސް ރޮބަޓް ވަނީ އަމުރެއް ނެރެފައެވެ.

އޭނާ އެ އަމަރު ނެރެފައިވަނީ ވޮޝިންޓަނާއި މިނެސޯޓާގެ އެޓާނީ ޖެނެރަލުން ކޯޓަށް ހުށަހެޅި މައްސަލައަކާ ގުޅިގެންނެވެ. އެގޮތުން އެމެރިކާގެ ހޯމްލޭންޑް ސެކިއުރިޓީ ޑިޕާޓްމެންޓުން ވަނީ ކޯޓުން އެ އަމުރު ނެރުނުތާ 24 ގަޑިއިރުވެސް ނުވަނީސް އެ އަމުރު ތަންފީޒުކުރަން ފަށާފައެވެ.

ޖޭމްސް ނެރުއްވި ބަޔާނުގައި ބުނީ ޓްރަމްޕްގެ ރިޔާސީ ގަރާރުގެ ސަބަބުން ގާނޫނު އަސާސީ އިން ލިބިދީފައިވާ ތައުލީމް ހާސިލް ކުރުމުގެ ހައްގާއި ވަޒީފާ އަދާކުރުމުގެ ހައްގުގެ އިތުރުން ދަތުރުފަތުރުކުރުމުގެ ހައްގަށްވެސް އަރައިގަނެވޭ ކަމަށެވެ.

އެމެރިކާއަށް އެރުން މަނާ ގައުމުތަކުގެ ލިސްޓުގައި ހިމެނީ އީރާން، އިރާގް، ލީބިޔާ، ސޫދާން، ޔަމަން،ސީރިޔާ އަދި ސޯމާލިޔާއެވެ. އެހެންކަމުން އެއްވެސް ހުރަހެއް ނެތި އިސްލާމީ ގައުމުތަކުގެ މީހުންނަށް އެމެރިކާއަށް މިހާރު ދަތުރުކުރެވޭނެއެވެ.

މީގެއިތުރުން އެމެރިކާއަށް އައުމަށް ކުރިން ދޫކޮށްފައިވާ 60،000 ވިސާ ކެންސަލްކޮށްފައިވީ ނަމަވެސް އެ ހުރިހާ ފަރާތަށްވެސް އެ ގައުމަށް ދަތުރުކުރެވޭނެއެވެ.

ފަނޑިއާރުގެ ނިންމުމަށް ފާޑުވިދާޅުވަމުން ޓްރަމްޕް ވަނީ ހޮނިހިރު ދުވަހު ޓުވީޓްވެސް ކުރައްވާފައެވެ. އެގޮތުން އެ މަނިކުފާނު ވިދާޅުވީ ކޯޓުން ކުރި އަމުރުގެ ސަބަބުން ގާނޫނު ތަންފީޒުކުރުމަށް ގޮންޖެހުންތަކާ ކުރިމަތިލާންޖެހިއްޖެ ކަމަށެވެ.