އެމެރިކާގެ ރައީސް ޑޮނަލްޑް ޓްރަމްޕް އިއުލާންކޮށްފައިވާ އެމެރިކާއަށް އެރުން މަނާ މުސްލިމް ޤައުމުތަކުގެ ލިސްޓަށް ޕާކިސްތާން އިތުރުވެދާނެ ކަމަށް ބެލެވެން ފަށައިފިއެވެ.
އެލިސްޓަށް ޕާކިސްތާން އިތުރުވެދާނެކަމުގެ އިޝާރާތެއް ދެއްވީ ވައިޓް ހައުސްގެ ޗީފް އޮފް ސްޓާފް ރެއިންސް ޕްރައިބަސްއެވެ.
އެމެރިކާއަށް އެރުން މަނާ މުސްލިމް ޤައުމުތަކުގެ ލިސްޓުގައި މިވަގުތު އޮތީ އީރާން، އިރާގް، ލީބިޔާ، ސޫދާން، ޔަމަން،ސީރިޔާ އަދި ސޯމާލިޔާއެވެ.
ވައިޓްހައުސްގެ ޗީފް އޮފް ސްޓާފް ރެއިންސް ޕްރައިބަސް ވިދާޅުވެފއަިވާ ގޮތުގައި އެޤައުމުތަކަކީ އެންމެ ނުރައްކާތެރި ޓެރަރިސްޓް ހަރަކާތްތައް އެޤައުމުތަކުގައިވެސް ހިންގާ ޤައުމުތަކުގެ ގޮތުގައި ކޮންގްރެސް ތެރޭގައާއި އަދި ރައީސް އޮބާމާގެ ސަރުކާރުންވެސް ފާހަގަ ކޮށްފައިވާ ޤައުމުތައް ކަމަށެވެ. އެފަދަ އެހެން ޤައުމުތަކަށް ބަލާއިރު ޕާކިސްތާނަކީ އެގޮތުން ފާހަގަ ކޮށްލެވޭ ޤައުމެއްކަމަށް އޭނާ ވިދާޅުވިއެވެ.
މިއީ ޓްރަމްޕް ސަރުކާރުން ޕާކިސްތާނާމެދު އެގޮތައް ދެކޭކަން ހާމަކުރި ފުރަތަމަ ފަހަރެވެ.
