ރަސްމާލެ މަޝްރޫއުގެ ހަގީގީ ނުރައްކަލަކީ އެތަނުގައި ރިސޯޓު އުސޫލުތައް ހުއްދަކުރުން ކަމަށް ވަޒީރު ވިދާޅުވި ވިދާޅުވުން ކަމަށް އިލްމުވެރިންގެ ގުޅުމުން ބުނެފި

ރަސްމާލޭގައި އީގަލް ހިލްސްއިން ތަރައްގީކުރާ ސަރަހައްދާ ގުޅިގެން އޮތް އެންމެ ބޮޑު ދީނީ ކަންބޮޑުވުމަކީ، ހައުސިންގ މިނިސްޓަރު މަނާކުރައްވާނެ ކަމަށް ވިދާޅުވި ފައްޅިއެއް ނުވަތަ ފެސްޓިވަލެއްގެ މައްސަލަ ނޫން ކަމަށާއި، ހަގީގީ ނުރައްކަލަކީ ދިވެހީން ދާއިމީކޮށް ދިރިއުޅޭ މާހައުލެއްގައި ޓޫރިސްޓް ރިސޯޓުތަކުގެ އުސޫލުތައް ހުއްދަކުރުން ކަމަށް އިލްމުވެރިންގެ ގުޅުމުން ބުނެފި އެވެ.

އިލްމުވެރިންގެ ގުޅުމުން ސަރުކާރަށް ހުށަހެޅި ރިޕޯޓުގައި، އެންމެ ބޮޑު ކަންބޮޑުވުމެއްގެ ގޮތުގައި ފާހަގަކޮށްފައިވަނީ، ރަސްމާލޭގައި ގާއިމުކުރާ ބޭރު މީހުންގެ ސަރަހައްދުގައި ރާއްޖޭގެ ރިސޯޓުތަކުގައި އަމަލުކުރާ އުސޫލުތައް ހިނގާނެ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެފައިވާ ވިދާޅުވުމެވެ. އޭގެ މާނައަކީ މާލެއާ މިހާ ކައިރީގައި މީހުން ދިރިއުޅޭ ސަރަހައްދެއްގައި ރާލާ އޫރުމަސް ވިއްކުމާއި، އިސްލާމީ އަހުލާގީ މިންގަނޑުތަކާ ހިލާފު ކަންކަމަށް ދޮރު ހުޅުވިގެންދިއުން ކަމަށް ރިޕޯޓުގައިވެ އެވެ. 

Advertisement

އިލްމުވެރިންގެ ގުޅުމުން ފާހަގަކުރި ގޮތުގައި، ވެރިރަށް މާލެއާ އިންވެގެން އޮތް، އަދި ދިވެހި ރައްޔިތުންނަށް ފަސޭހަކަމާއެކު ވަދެ ނިކުމެ އުޅެވޭ ގޮތަށް އޮތް 30،000 މީހުންގެ ބޮޑު އާބާދީއެއް ދިރިއުޅޭނެ މިފަދަ ދާއިމީ ސަރަހައްދެއްގައި ރިސޯޓުތަކުގެ އުސޫލުތައް ހިންގުމަކީ ބަލައިގަނެވޭނެ ކަމެއް ނޫނެވެ.

އަބޫދާބީގެ އީގަލް ހިލްސް ކުންފުންޏާއެކު ސަރުކާރުން ސޮއިކޮށްފައިވާ އެއްބަސްވުމުގެ ދަށުން ދިވެހިރާއްޖޭގެ އިސްތިގުލާލަށާއި ދީނީ އެއްބައިވަންތަކަމަށް ނުރައްކާވާ ފަދަ ކަންތައްތަކެއް ހިމެނޭ ކަމަށް އިލްމުވެރިންގެ ގުޅުމުން ބުނެފައިވާއިރު، ގާތްގަނޑަކަށް 20 ބިލިއަން ޑޮލަރުގެ މި ބިޔަ މަޝްރޫއުގެ ސަބަބުން، ވެރިރަށް މާލެ ސަރަހައްދުގެ މުހިންމު ބިންތަކެއް ބޭރުގެ އެންމެ ކުންފުންޏެއްގެ ބާރުގެ ދަށަށް ދާނެ ކަމުގެ އިންޒާރުވެސް އިލްމުވެރިންގެ ގުޅުމުގެ ރިޕޯޓުގައި ދީފައިވެ އެވެ.

ގާނޫނީ ގޮތުންނާއި އާބާދީގެ ގޮތުން އަތުވެދާނެ ލޮޅުންތަކަށް އިޝާރަތްކޮށް އެ ރިޕޯޓުގައި ބުނެފައިވަނީ، މި މަޝްރޫއުގެ ދަށުން ބޭރު މީހުންނަށް 99 އަހަރަށް ބިން ކުއްޔަށް ދޫކުރާއިރު، ކޮންމެ ފަހަރަކު މިލްކުވެރިކަން ބަދަލުވާ ހިނދު އެ މުއްދަތު އަލުން ގުނަން ފަށާ ގޮތަށް އޮތުމަކީ ބިން ދާއިމީކޮށް ބޭރު މީހުންނަށް ދިނުން ފަދަ ކަމެއް ކަމަށެވެ. މިއީ ގާނޫނުއަސާސީގެ 251 ވަނަ މާއްދާއާ ސީދާ ހިލާފު ކަމެއް ކަމަށް ބުނެ، މި މައްސަލަ މިހާރު ސުޕްރީމް ކޯޓަށް ހުށަހެޅިފައިވާކަންވެސް ވަނީ ފާހަގަކޮށްފަ އެވެ. އަދި 250،000 ޑޮލަރު އިންވެސްޓްކުރާ ފަރާތްތަކަށް ފަސް އަހަރުގެ ރެސިޑެންޓް ވިސާ ދިނުމަކީ ރާއްޖޭގެ އާބާދީގެ ނިސްބަތަށް ނޭދެވޭ ބޮޑު ބަދަލެއް އައިސް، އިޖުތިމާއީ ގިނަ ގޮންޖެހުންތަކެއް ކުރިމަތިވާނެ ކަމެއް ކަމަށް އިލްމުވެރިން ދެކެއެވެ.

އިގުތިސާދީ ގޮތުން ބަލާއިރުވެސް ސަރުކާރުގެ ހިސާބުތަކުގައި ބޮޑެތި ފުށުއެރުންތަކެއް ހުރި ކަމަށް އިލްމުވެރިންގެ ރިޕޯޓުގައި ފާހަގަކޮށްފައިވެ އެވެ. ސަރުކާރުން މި މަޝްރޫއުން 11 ބިލިއަން ޑޮލަރުގެ އާމްދަނީ އެއް ލިބޭނެ ކަމަށް ބުނި ނަމަވެސް، ދިރާސާތަކުން ދައްކަނީ 10 އަހަރު ދުވަހުގެ ތެރޭގައި ލިބޭނީ 5.7 އާއި 7.3 ބިލިއަން ޑޮލަރާ ދެމެދުގެ އާމްދަނީ އެއް ކަމަށެވެ. މީގެއިތުރުން، ރާއްޖޭގެ ޖީޑީޕީގެ 1.6 އިން ފެށިގެން 4.0 ގުނަ ބޮޑު އިގުތިސާދީ ބާރެއް އެންމެ ކުންފުންޏެއްގެ މައްޗަށް ދޫކޮށްލުމަކީ ގައުމުގެ އިގުތިސާދީ މިނިވަންކަން ގެއްލިގެންދާނެ ކަމެއް ކަމަށް ރިޕޯޓުގައި އިންޒާރު ދީފައިވެ އެވެ.

މި ކަންބޮޑުވުންތަކާ ގުޅިގެން އިލްމުވެރިންގެ ގުޅުމުން ވަނީ ސަރުކާރަށް 22 ހުށަހެޅުމެއް ހުށަހަޅާފަ އެވެ. އޭގެ ތެރޭގައި، މިހާތަނަށް ސޮއިކޮށްފައިވަނީ ހަމައެކަނި ލެޓަރ އޮފް އިންޓެންޓެއްގައި ކަމަށްވާތީ، މަޝްރޫއު ވަގުތުން ހުއްޓާލައި އަލުން މުރާޖައާ ކުރުމަށް ވަނީ ގޮވާލާފަ އެވެ. އަދި ބޭރު މީހުންނަށް ބޯހިޔާވަހިކަން ވިއްކުމުގެ ބަދަލުގައި، އިސްލާމީ ފައިނޭންސްގެ އުސޫލުތައް ބޭނުންކޮށްގެން ދިވެހި ރައްޔިތުންނަށް ބޯހިޔާވަހިކަން ފޯރުކޮށްދިނުމަށާއި، ރަސްމާލެއަކީ ހަމައެކަނި ދިވެހީން ދިރިއުޅޭ، އިސްލާމީ އުސޫލުތަކާއި އަހުލާގީ މިންގަނޑުތައް ފުރިހަމައަށް ހިނގާ ތަނެއްގެ ގޮތުގައި ބޭއްވުމަށް އިލްމުވެރިންގެ ރިޕޯޓުގައި ސަރުކާރަށް ވަނީ ގޮވާލާފަ އެވެ.

ރަސްމާލޭގެ ބޮޑު ސަރަހައްދެއް އީގަލް ހިލްސް އަށް 99 އަހަރަށް ދިން މައްސަލާގައި ދީނީ އިލްމުވެރިން ދަނީ ކަންބޮޑުވުން ފާޅު ކުރަމުންނެވެ.