މަހުލޫފުގެ ސިޓީއެއް ރައީސަށް، ރައީސް ވިދާޅުވީ ޕީޖީން ގޮތެއް ނިންމަވަން ޖެހޭކަމަށް

އެމްއެމްޕީއާރްސީ ޚިޔާނާތުގެ ތަހުގީގާއި ގުޅިގެން ޔޫތު މިނިސްޓަރ އަހުމަދު މަހުލޫފުގެ މައްޗަށް ތުހުމަތު ކުރެވޭ މައްސަލައިގައި ޕްރޮސެކިއުޓަރ ޖެނެރަލް (ޕީޖީ) އޮފީހުން އަވަހަށް ގޮތެއް ނިންމަވަން ޖެހޭކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.

ބުދަ ދުވަހު އޮތް ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ރައީސް ސާލިހު ވިދާޅުވީ، މަހުލޫފުގެ މައްސަލަ ދިގުލައިގެން ދިއުމަކީ އެމަނިކުފާނު ކަންބޮޑުވެވަޑައިގަންނަވާ ކަމެއް ކަމަށެވެ. ރައީސް ވިދާޅުވީ، މި މައްސަލައިގައި ޕީޖީ އޮފީހުން އަވަހަށް ގޮތެއް ނިންމަވަންޖެހޭކަމަށް ގަބޫލުފުޅު ކުރައްވާ ކަމަށެވެ.

ރައީސް ވިދާޅުވީ، މި މައްސަލައިގައި މިނިސްޓަރ މަހުލޫފުގެ ސިޓީއެއް ލިބިވަޑައިގެންފައިވާ ކަމަށެވެ. އެގޮތުން ސިޓީގައި މި މައްސަލައިގެ ތަހުގީގާ ގުޅޭ ގިނަ މައްސަލަތަކެއް ފާހަގަ ކުރައްވާފައިވާކަމަށް ރައީސް ވިދާޅުވިއެވެ. އެގޮތުން އެސްއޯއެފްގެ އެކައުންޓެންޓުގެ ބަޔާން ނެގުމުގައި ގޯސްތަކެއް ހަދާފައިވާކަން ބަޔާން ކުރައްވާފައިވާކަމަށް ރައީސް ވިދާޅުވިއެވެ. އޭނާއަކީ ލަންކާއަށް ނިސްބަތްވާ މީހެކެވެ.

ރައީސް އެހެން ވިދާޅުވެފައިވާއިރު، މި މައްސަލައާ ގުޅިގެން ލަންކާގެ ރައްޔިތެއްގެ ބަޔާން ކަނޑައެޅިގެން ރާއްޖޭގެ ގާނޫނުތަކާއި އަދި ލަންކާ ގާނޫނުތަކާއި ޚިލާފަށް ނެގި މައްސަލައެއް ފެންމަތިވެ ލަންކާގެ ކަމާގުޅޭ އިދާރާއަކުން އެ މައްސަލަ ބަލަމުންދާ ކަމަށް މިނިސްޓަރ މަހުލޫފުވެސް ދާދި ފަހުން ވަނީ މީސްމީޑިއާ މެދުވެރިކޮށް ވިދާޅުވެފައެވެ. އަދި އެމައްސަލަ ފޮރިން މިނިސްޓްރީންވެސް ތަހުގީގު ކުރަމުންދާކަން ފާހަގަ ކުރައްވައި މަހުލޫފު ވަނީ ޖިނާއީ ތަހުގީގު ޒޫމް މެދުވެރިކޮށް ހިންގިއިރު ލަންކާގައި ހުންނަވާ ރާއްޖޭގެ ސަފީރުވެސް އިންނެވިކަމަށް ތުހުމަތު ކުރައްވާފައެވެ.

ރައީސް އިތުރަށް ވިދާޅުވީ، އެ ޝަކުވާ ލިބިވަޑައިގަތުމާއެކު، އެކަން ހިނގާ ދިޔަ ގޮތް ފޮރިން މިނިސްޓްރީ މެދުވެރިކޮށް ބައްލަވަމުން ގެންދަވާ ކަމަށެވެ. އަދި އެއަށްފަހު މައްސަލައެއް އުޅޭނަމަ އެކަން ހާމަ ކުރައްވާނެކަން ފާހަގަ ކުރައްވައި ރައީސް ވަނީ ޕީޖީ އޮފީހުން އަވަހަށް ނިންމެވުމަކީ އެންމެ ރަނގަޅު ގޮތްކަމަށް ވިދާޅުވެފައެވެ. އަދި މި މައްސަލައިގައި ޕީޖީ އޮފީހުން ގޮތެއް ނިންމަވާނީ އެންމެ ރަނގަޅަށް ވިސްނަވާފައިކަމަށް ގަބޫލުފުޅު ކުރެވޭކަމަށްވެސް ރައީސް ވިދާޅުވިއެވެ.

މި މައްސަލައިގައި ފެށުނީއްސުރެ އެކި ދިމަދިމާލުން ސިޔާސީ ނުފޫޒު ވަދެފައިވާކަމަށް މިނިސްޓަރ މަހުލޫފު ތުހުމަތު ކުރައްވައެވެ. މަހުލޫފު ވިދާޅުވީ، ކުރިން ނިންމަވައިގެން ހުންނެވީ ޕީޖީ އޮފީހުން ގޮތެއް ނިންމުމުން އިސްތިއުފާ ދެއްވުމަށް ކަމަށެވެ. ނަމަވެސް ކަންކަން މިހާ ގޯސްކޮށް ދާތީ ދައުވާ ކުރިޔަސް ދެން އިސްތިއުފާ ދެއްވުމާމެދު ވިސްނަވާނެކަމަށް މަހުލޫފު ވިދާޅުވިއެވެ. އަދި އެކަން ރައީސަށް ވެސް ރަސްމީކޮށް ދަންނަވާނެކަން ފާހަގަ ކުރައްވައި މަހުލޫފު ވިދާޅުވީ، މަގާމުން ވަކިކުރުމަކީ ރައީސުލްޖުހޫރިއްޔާއަށް ގާނޫނު އަސާސީން މަތިކޮށްފައިވާ ބާރެއް ކަމުން، ގޮތެއް ނިންމަވާނީ ރައީސް ކަމަށެވެ.