އޭޑީކޭގައި އެނދުމަތިކޮށްފައިވާ ބަލިމީހުންނަށް ޒިޔާރަތްކުރުން މަނާކޮށްފި

ރާއްޖޭގައި ކޮވިޑް-19ގެ ކޭސްތައް އިތުރުވުމާއި ގުޅިގެން ރައްކާތެރި ފިޔަވަޅެއްގެ ގޮތުން އޭޑީކޭ ހޮސްޕިޓަލްގައި އެނދުމަތިކޮށްފައިވާ ބަލިމީހުންނަށް ޒިޔާރަތްކުރުން އެހޮސްޕިޓަލުން މަނާކޮށްފިއެވެ.

އޭޑީކޭ އިން ކޮށްފައިވާ އިއުލާނެއްގައި ވަނީ ކޮވިޑް-19 ބަލިމަޑުކަމާ ގުޅިގެން، އާންމުންގެ ރައްކާތެރިކަމަށާއި އަދި ސިއްހީ ޚިދުމަތްދޭ ފަރާތްތަކުގެ ރައްކަލަށް ޓަކައި، ބަލިމަޑުކަން ފެތުރެމުންދާ ނިސްބަތަށް ބަލާ ތަފާތު ފިޔަވަޅުތައް އަޅަމުން ގެންދާކަމަށެވެ. އަދި ކޮވިޑް-19ގެ ޙަލާތު އިތުރަށް ގޯސްވަމުން ދިއުމާއެކު، ހޮސްޕިޓަލުގައި އެނދުމަތިކޮށްގެން ފަރުވާދޭ ބަލިމީހުން ކައިރިޔަށް ޒިޔާރަތް ކުރުން މަނާކޮށްފައިވާ ކަމަށެވެ. އެނދުމަތިކޮށްގެން ފަރުވާދޭ މީހުންގެ އެހީތެރިއެއްގެ ގޮތުގައި މަޑުކުރެވޭނީ އެންމެ ފަރާތަކަށް ކަަމަށާއި އެމީހަކީ ކޮވިޑްގެ އަލާމާތެއް ހުރި މީހަކަށް ވެގެންނުވާނެ ކަމަށް ހޮސްޕިޓަލުން ބުނެއެވެ.

ބަލިމީހުންނާ ސިއްހީ ޚިދުމަތްތެރިންގެ ސަލާމަތާ ރައްކާތެރިކަމަށް ޓަކައި، މިކަމުގައި ޢާންމުންގެ އެއްބާރުލުން ބޭނުންވާ ކަމަށާއި ބަލިމީހުން ކައިރީ ތިބުމަށް ހޮސްޕިޓަލުން ހުއްދަ ދީފައިވާ ފަރާތްތައް ފިޔަވައި އެހެން ފަރާތްތައް ހޮސްޕިޓަލަށް ނުދިއުމަށް ވަނީ އެދިފައެވެ.