ރާއްޖޭގެ ކުރީގެ ޤައުމީ ގޯލްކީޕަރު އިފްރާހު ނިޔާވެއްޖެ

ރާއްޖޭގެ ތަޖުރިބާކާރު ގޯލު ކީޕަރު އިބްރާހީމް އިފްރާހު އަރީފް (އިފުރާ) ބުރާސްފަތި ދުވަހުގެ ރޭ ނިޔާވެއްޖެ އެވެ. އުމުރުން 36 އަހަރުގައި އިފްރާހު ނިޔާވީ އޭޑީކޭ ހޮސްޕިޓަލުގައި ފަރުވާ ދެމުން ދަނިކޮށެވެ.

މިދިޔަ ހޯމަ ދުވަހު ހެމޮރެޖިކް ސްޓްރޯކެއް ޖެހި ހާލު ސީރިއަސްވުމާ ގުޅިގެން އިފްރާހު އަށް ވަނީ އޭޑީކޭ ހޮސްޕިޓަލުގައި ފަރުވާދޭން ފަށާފައެވެ. އިފްރާހުގެ އާއިލާގެ ފަރާތުން މައުލޫމާތު ދީފައިވާ ގޮތުގައި ސްޓްރޯކުގެ ސަބަބުން ސިކުނޑިއަށް ލޭ އެޅުމާ ގުޅިގެން ހޯމަ ދުވަހުގެ ހަވީރު ސާޖަރީއެއް ހަދާފައިވެއެވެ. ނަމަވެސް ސިކުނޑިން ލޭތައް އެއްކޮށް ސާފުނުކުރެވުމާއެކު، ސިކުނޑީގެ ދުޅަ ތިރިކުރުމަށްޓަކައި އޭގެ ފަހުން އޭނާ އޮތީ ކޯމާއެއްގައި ބޭއްވިފައެވެ.

ރާއްޖޭގެ ފުޓްބޯޅައިގެ ތާރީޚުގައި އުފެދުނު އެންމެ ޤާބިލު ގޯލްކީޕަރުންގެ ތެރޭގައި ހިމެނޭ އިފްރާހު އަކީ ގައުމީ ޓީމަށާއި ރާއްޖޭގެ އެކި ކުލަބުތަކަށް ކުޅެ، ގިނަ ކާމިޔާބީތަކެއް ހޯދާފައިވާ ކުޅުންތެރިއެކެވެ. އޭނާގެ ކުލަބު ކެރިއަރުގައި ވެލެންސިއާ، މާޒިޔާ ސްޕޯޓްސް އެންޑް ރެކްރިއޭޝަން، ނިއު ރޭޑިއަންޓް ސްޕޯޓްސް ކުލަބު، ވިކްޓްރީ، ޓީސީ ސްޕޯޓްސް ކުލަބު އަދި ބީޖީ ސްޕޯޓްސް ކުލަބަށް ކުޅެފައިވެއެވެ.

އިފްރާހުގެ ކެރިއަރުގެ އެންމެ ފާހަގަކޮށްލެވޭ އެއް ކާމިޔާބީއަކީ 2008 ވަނަ އަހަރު ރާއްޖެއިން ސާފް ޗެމްޕިއަންޝިޕް ކާމިޔާބުކުރި ޤައުމީ ޓީމުގައި ހިމެނުމެވެ. އޭނާގެ ހުނަރުވެރި ކުޅުމާއި ފުޓުބޯޅައަށް ކޮށްދީފައިވާ އަގުހުރި ޚިދުމަތްތަކަކީ ރާއްޖޭގެ ފުޓްބޯޅައިގެ ތާރީޚުގައި ފާހަގަކޮށްލެވޭ ކަންކަމެވެ.

އިފްރާހު ނިޔާވުމާ ގުޅިގެން ރާއްޖޭގެ ކުޅިވަރުގެ ދާއިރާގެ ގިނަ ފަރާތްތަކުން ވަނީ އޭނާގެ ޢާއިލާއަށް ތަޢުޒިޔާ ފާޅުކޮށްފައެވެ. އަދި އޭނާގެ ކުޅިވަރު ދާއިރާއަށް ކޮށްދީފައިވާ އަގުހުރި ޚިދުމަތްތައް ފާހަގަކޮށް، އެކަމަށް ޝުކުރުވެރިވެފައިވެއެވެ.