އޭޑީކޭއިން ޚިދުމަތްތަކުގެ އަގު ބޮޑުކުރަން ނިންމައިފި
ޚިދުމަތްތަކުގެ އަގު ބޮޑު ކުރަނީ ބުރާސްފަތި ދުވަހުން ފެށިގެން
އޭޑީކޭ
އޭޑީކޭ ހޮސްޕިޓަލުން ދެމުން އަންނަ ޚިދުމަތްތަކުގެ އަގު ބޮޑު ކުރަން އެ ހޮސްޕިޓަލުން ނިންމައިފިއެވެ.
މިކަން ހާމަކޮށް އަންގާރަ ދުވަހުގެ ރޭ އެ ހޮސްޕިޓަލުން ކުރި އިއުލާނެއްގައި ބުނީ 2020 ވަނަ އަހަރުން ފެށިގެން ދުނިޔޭގެ އިގްތިސާދަށް ކުރިމަތިވި ހީނަރުކަމާ ގުޅިގެން އިންފްލޭޝަން ރޭޓު މަތިވެ، މުދަލާއި ޚިދުމަތުގެ އަގުތައް ބޮޑުވެފައިވާ ކަމަށެވެ. އެއާ އެކު، އޭޑީކޭ ހޮސްޕިޓަލުގެ ހިންގުމުގެ ޚަރަދުތައް އެތައް ގުނައަކުން ބޮޑުވެފައިވާ ކަމަށާއި އަގު ބޮޑުކުރަން ނިންމީ އެ ސަބަބާ ހުރެ ކަމަށެވެ.
އޭޑީކޭ އިން ބުނެފައިވަނީ އަގުތައް ބޮޑުކުރަނީ، ދެމެހެއްޓެނިވި ގޮތެއްގައި ޚިދުމަތް ފޯރުކޮށްދިނުމަށް ކަމަށެވެ. އަދި މި ބަދަލާ އެއްގޮތަށް ޚިދުމަތްތަކުގެ އަގު ބޮޑުކުރަން ފަށާނީ އަންނަ ބުރާސްފަތި ދުވަހުން ފެށިގެން ކަމަށެވެ.
ޚިދުމަތްތަކުގެ އަގު ބޮޑުކުރަން ނިންމާފައިވީ ނަމަވެސް ޚިދުމަތްތަކުން ބޮޑުކުރަން ނިންމާފައިވަނީ ކިހާ ވަރެއް ކަމެއް އަދި އޭޑީކޭއިން އިއުލާނުކޮށްފައެއް ނުވެއެވެ. ނަމަވެސް އަގުތަކަށް ބަދަލު ގެންނަން ނިންމާފައިވަނީ ކުރިއަށް އޮތް ދުވަސްތަކުގައި ބައިބަޔަށް ބަހާލައިގެން ކަމަށް އެ ހޮސްޕިޓަލުން މައުލޫމާތުދެއެވެ. އަދި އަގުތަކަށް އަންނަ ބަދަލުތައް އެ ހޮސްޕިޓަލުގެ ކައުންޓަރުން ބަލާލެވޭނެ ކަމަށް ވެސް ވަނީ ބުނެފައެވެ.
