ތައިރޮއިޑަށް ބޭނުންކުރާ ބޭހެއް އާސަންދައިން ނުލިބުނު، ގަންނަން ލިބުނީ ބޮޑު އަގުގައި
އާސަންދަ ކުންފުނިން ބުނީ ތައިރަނޯމް 25 މައިކްރޯގްރާމް އަކީ އާސަންދަ ސްކީމްގެ ތެރެއިން ފޯރުކޮށްދެވެމުންދާ ބޭހެއްކަން
ތައިރޮއިޑަށް ބޭނުންކުރާ ތައިރޯނޮމްގެ 25 މިލިގްރާމް ބޭސް
ތައިރޮއިޑަށް ބޭނުންކުރާ ބޭހެއް އާސަންދައިން ނުލިބި، އާންމު އަގަށްވުރެ މާ ބޮޑު އަގެއްގައި ގަންނަން ޖެހުނު މައްސަލައެއް ފެންމަތިވެއްޖެއެވެ.
މި މައްސަލަ ފާހަގަކޮށްފައިވަނީ މެޑިކަލް އޮފިސަރެއް ކަމުގައިވާ ޑރ. އަބްދުލްއަޒީޒް ހަމީދެވެ. ޑރ. އަބްދުލް އަޒީޒް ފޭސްބުކުގައި ލިޔުއްވި ޕޯސްޓެއްގައި ވިދާޅުވީ އޭނާގެ 6 އަހަރުގެ ދަރިފުޅަކީ ޑައުންސިންޑްރޯމް، އޯޓިޒަމް އަދި ހައިޕޯތައިރޮއިޑިޒަމްގެ ޙާލަތު ހުރި ކުއްޖެއް ކަމަށާއި، ތައިރޮކްސިން ސޯޑިއަމް ޓެބްލެޓް (ތައިރޮނޯރމް) އެސްޓީއޯ ހެންވޭރު ފާމަސީގައި މި ބޭސް ނެތުމުން، އޭޑީކޭ ހޮސްޕިޓަލް ސަރަޙައްދުން ދެތިން ތަނެއް ބެލުމަށްފަހު، ފުރަތަމަ ފެނުނު ތަނުން 90 ރުފިޔާއަށް ގަންނަން ޖެހުނު ކަމަށެވެ. އެހެންނަމަވެސް އެއް ފުޅި އެއީ 3 މަސްދުވަހަށް ފުދޭ މިންވަރު ނޫންކަމުން އިތުރު ތަންތަން ބަލަން ޖެހުނެވެ.
އިތުރަށް ބެލި ދެ ތަނުންވެސް މި ބޭސް އާސަންދައިން ކަވަރު ނުކުރާ ކަމަށް ބުނެފައިވެއެވެ. 120 ގުޅަ ހިމެނޭ ފުޅިއެއްގެ އަގު އެއް ތަނުން ޖަހާފައިވަނީ 195 ރުފިޔާ އަށެވެ. އަނެއް ތަނުން އަގު ޖަހާފައިވަނީ 240 ރުފިޔާއަށެވެ. އޭނާ ވިދާޅުވީ މިއީ ވަރަށް ދެރަވަރު ކަންކަން ކަމަށެވެ.
މިއީ މިބޭސް އާސަންދައިން ނުލިބިގެން އާންމުންގެ މީހަކު ޝަކުވާކުރި ފުރަތަމަ ފަހަރެއް ނޫނެވެ.
މި މައްސަލައާ ގުޅޭގޮތުން އާސަންދަ ކުންފުނިން ބުނެފައިވަނީ "ތައިރަނޯމް 25 މައިކްރޯގްރާމް" އަކީ އާސަންދަ ސްކީމްގެ ތެރެއިން ފޯރުކޮށްދެވެމުންދާ ބޭހެއް ކަމަށެވެ.
މިބޭހަކީ މިއަދުވެސް ސްކީމްގެ ތެރެއިން ގިނަ ބޭސްފިހާރަތަކަކުން ދޫކުރެވިފައިވާ ބޭހެއް ކަމަށާއި، އާސަންދަ ސްކީމްގެ ތެރެއިން ފޯރުކޮށްދެވޭ މިފަދަ ބޭސް ސްކީމްގެ ތެރެއިން ބޭސްފިހާރައިން ފޯރުކޮށްނުދޭނަމަ، އެކަން "ޝިކާވަތި" އަށް ބޭސްފިހާރައިގެ މަޢުލޫމާތާއި އެއްކޮށް ރިޕޯޓްކޮށްދެއްވުން އެދެމެވެ.
އާސަންދައިގެ ޕޯސްޓުގައި ޑރ. އަޒީޒު ބޭސް ގަތް ތަންތަނުން އާސަންދައިން ބޭސް ލިބޭތޯ ނުވަތަ ނުލިބޭތޯ އާސަންދައިން ޔަގީންކޮށްފައިވާކަން މި ޕޯސްޓުން ސާފެއް ނުވެއެވެ.
މި ބޭހުގެ 25 މިލިގްރާމްގެ ބާވަތް ގިނަ ފަހަރު އެސްޓީއޯ ފާމަސީތަކުން ހުސްވެފައި ހުންނަކަން ފާހަގަކުރެވެއެވެ. މީގެ ކުރިންވެސް އާސަންދައިގައި ދިމާވި މައްސަލައަކާ ގުޅިގެން، އެސްޓީއޯއިން މި ބޭސް އާސަންދައިގެ ބޭރުން ވިއްކާފައިވާކަން ފާހަގަކުރެވެއެވެ. އަދި ފާމަސީތަކުންވެސް މި ބޭހަށް އާސަންދަ ނުލިބޭކަމަށް ބުނެފައިވާކަން ފާހަގަކުރެވެއެވެ. ގިނަ އަދަދެއްގެ ބަޔަކު ބޭނުންކުރާ މި ބޭހަށް އާސަންދަ ނުލިބުމުގެ މައްސަލައަކީ މިއަދު އަލަށް ކުރިމަތިވެފައިވާ މައްސަލައެއް ނޫންކަން ފާހަގަކުރެވެއެވެ.
