ހެލްތު ދާއިރާގެ ދަރިވަރުން ތަމްރީނު ކުރުމަށް އޭޑީކޭއާއި އެމްއެންޔޫއާ ދެމެދު ފަހުމުނާމާއެއް
މިއީ ތައުލީމީ ދެ މުއައްސަސާއެއްގެ ގުޅުން
އޭޑީކޭއާއި އެމްއެންޔޫއާއެކު ފަހުމުނާމާއެއްގައި ސޮއިކުރުން
ހެލްތު ދާއިރާގެ ދަރިވަރުން ތަމްރީނު ކުރުމަށް އޭޑީކޭއާއި ޤައުމީ ޔުނިވަރސިޓީ (އެމްއެންޔޫ) އާ ދެމެދު ފަހުމުނާމާއެއްގައި ސޮއިކޮށްފިއެވެ.
މި ފަހުމުނާމާގައި ސޮއިކޮށްފައިވަނީ އަންގާރަ ދުވަހު އެކަމަށްޓަކައި ބޭއްވި ޚާއްސަ ރަސްމިއްޔާތެއްގައެވެ.
މި ފަހުމުނާމާއަކީ އެމްއެންޔޫގައި ތަމްރީނުވާ ހެލްތު ދާއިރާގެ ދަރިވަރުން ތަމްރީނު ކުރުމުގެ ޕްރޮގްރާމްތައް ހިންގުމަށް އެ ހޮސްޕިޓަލާއެކު ވެވިފައިވާ ފަހުމުނާމާއެކެވެ. އެގޮތުން މީގެ ކުރިންވެސް އެމްއެންޔޫއިން ގެންދިޔައީ އޭޑީކޭ ހޮސްޕިޓަލުގައި ނަރުހުންނާއި މެޑިކަލް ސުކޫލުގެ ދަރިވަރުން ތަމްރީނު ކުރަމުންނެވެ.
އެމްއެންޔޫއިން ވަނީ އޭޑީކޭ ހޮސްޕިޓަލުން ވެދޭ އެއްބާރުލުން ފާހަގަ ކުރައްވައި އެކަމަށް ޝުކުރު އަދާކޮށްފައެވެ.
މި ރަސްމިއްޔާތަށްފަހު ނޫސްވެރިންނާ ވާހަކަ ދައްކަވަމުން އޭޑީކޭގެ މެނޭޖިންގ ޑިރެކްޓަރ އަހްމަދު އައްފާލު ވިދާޅުވީ، އޭޑީކޭއާއި އެމްއެންޔޫއިން އަބަދުވެސް ގެންދަނީ ގާތުން މަސައްކަތް ކުރަމުން ކަމަށެވެ. އެގޮތުން ފެންވަރު ރަަނގަޅު ޤާބިލު ބަޔަކު ނެރުމަށްޓަކައި ގިނަ މަސައްކަތްތަކެއް ކުރަންޖެހޭކަން އައްފާލު ފާހަގަ ކުރެއްވިއެވެ.
އައްފާލު އިތުރަށް ވިދާޅުވީ، މި ފަހުމުނާމާގެ ދަށުން، ދަރިވަރުން ތަމްރީނު ކުރުމުގެ މަސައްކަތް ކުރިއަށްވުރެ ބޮޑަށް ފުޅާވެ، ފުރިހަމަވެގެންދާނެ ކަމަށެވެ. އެގޮތުން ދަރިވަރުންގެ ހުނަރުތައް ތަރައްޤީކޮށް ކުރިއެރުވުމަށްވެސް މަގުފަހިވެގެންދާނެކަން އައްފާލު ފާހަގަ ކުރެއްވިއެވެ.
އައްފާލު އިތުރަށް ވިދާޅުވީ، އޭޭޑީކޭއާއެކު މި ފަހުމުނާމާގައި ސޮއި ކުރެވިގެން ދިޔަ ނަމަވެސް، މިއީ ތައުލީމީ ދެ މުއައްސަސާއެއްގެ ގުޅުން ކަމަށެވެ. އެގޮތުން އޭޑީކޭއިން ތައުލީމު ކުރިއެރުވުމަށް ކުރާ މަސައްކަތް އެމްއެންޔޫއާއި ގުޅުވާލެވިގެން ދިއުމަކީ ކުރިއެރުމެއްގެ ގޮތުގައި އައްފާލު ސިފަ ކުރެއްވިއެވެ.
އައްފާލުވެސް ވަނީ އެމްއެންޔޫއާއެކު އޮންނަ ގުޅުން ފާހަގަ ކުރައްވައި އެކަމަށްޓަކައި ޔުނިވަރސިޓީގެ ހުރިހާ ބޭފުޅުންނަށް ޝުކުރު ދަންނަވާފައެވެ.
