ފުވައްމުލަކުގައި ހިނގި އެކްސިޑެންޓް: މާލެ ގެނެސް ފަރުވާދެމުންދަނިކޮށް އެ މީހާ މަރުވެއްޖެ
މަރުވެފައިވަނީ އުމުރުން 30 އަހަރުގެ ދިވެހި ފިރިހެނެއް
އޭޑީކޭ ހޮސްޕިޓަލް
ފުވައްމުލަކުގައި ހިނގި އެކްސިޑެންޓެއްގައި ލިބުނު އަނިޔާތަކަށް ފަރުވާދެމުންދަނިކޮށް މީހަކު މަރުވެއްޖެއެވެ.
މަރުވެފައިވަނީ އުމުރުން 30 އަހަރުގެ ދިވެހި ފިރިހެނެކެވެ. އޭނާ އަކީ ސައިކަލު ދުއްވުމުގެ ލައިސަންސް އޮންނަ މީހެއް ކަމަށް ފުލުހުން ބުނެއެވެ.
ފުލުހުން ބުނީ ޏ. ފުވައްމުލަކުގެ ނައިބުތުއްތު މަގުން ބާރު ސްޕީޑުގައި ދުއްވާފައި ދިޔަ ސައިކަލެއް ބަންޕަރަކަށް އަރާ ވެއްޓި ހާދިސާއެއް ހިނގާފައިވާ ކަމަށް ސެޕްޓެމްބަރު 9 ވަނަ ދުވަހުގެ ރޭ 22:55 ހާއިރު ފުލުހުންނަށް ރިޕޯޓްކުރި ކަމަށެވެ.
މި ހާދިސާގައި ސައިކަލް ދުއްވަން އިން އެ މީހާއަށް އަނިޔާވެގެން ފުވައްމުލަކު ހޮސްޕިޓަލުގައި ފަރުވާދިނުމަށްފަހު އިތުރު ފަރުވާއަށް ސެޕްޓެމްބަރު 10 ވަނަ ދުވަހު މާލެ ގެނެސް އޭޑީކޭ ހޮސްޕިޓަލުގައި ފަރުވާދެމުންދަނިކޮށް އޭނާ މިއަދު މަރުވެފައިވާ ކަމަށް އޭޑީކޭ އިން މައުލޫމާތު ދީފައިވާ ކަމަށް ފުލުހުން ބުނެއެވެ.
މި ހާދިސާއާ ގުޅިގެން ބަލަން ޖެހޭ ކަންކަން ބަލަމުންދާ ކަމަށް ފުލުހުން ބުނެއެވެ.
