ހުޅުމާލެ މެޑިކަލް ފެސިލިޓީ އާއި އައިޖީއެމްއެޗް ހޮސްޕިޓަލުގައި ކޮވިޑު ބަލިމީހުންނަށް ފަރުވާދެނީ އެއް ބަޔެއް:ޑރ. އެލީނާ
ޑޮކްޓަރުންނާއި ނަރުހުން ވަރަށް ދަތި
ޑރ. އައިޝަތު އެލީނާ ނޫސްވެރިންގެ ބައްދަލުވުމުގައި ވާހަކަ ދައްކަވަނީ
ހުޅުމާލެ މެޑިކަލް ފެސިލިޓީ އާއި އައިޖީއެމްއެޗް ހޮސްޕިޓަލުގައި ކޮވިޑު ބަލިމީހުންނަށް ފަރުވާދެނީ އެއްބަޔެއް ކަމަށް އައިޖީއެމްއެޗްގެ ކުޑަކުދިންގެ ހިތުގެ ބަލިތަކުގެ ޚާއްސަ ޑޮކްޓަރ، ޑރ. އައިޝަތު އެލީނާ ވިދާޅުވެއްޖެއެވެ.
ބުދަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. އެލީނާ ވިދާޅުވީ ޑޮކްޓަރުންނާއި ނަރުހުން ވަރަށް ދަތި ކަމަށެވެ. އެހެންކަމުން ހުރިހާ ފަރާތްތަކުން ވެސް ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އެޅުމަށް އިލްތިމާސް ކުރާ ކަމަށެވެ. އަދި އައިޖީއެމްއެޗްގެ އެމަރޖެންސީ ރޫމްއަށް ދައްކާ ވަރަށް ގިނަ އަދަދެއްގެ އާންމުން ކޮވިޑަށް ޕޮޒޓިވްވާ ކަމަށާއި މާ ލަސްވަންދެން މަޑުކުރެވޭ ތަން އެބަ ފެންނަ ކަމަށެވެ.
ޑރ. އެލީނާ ވިދާޅުވީ ކޮވިޑަށް ޕޮޒިޓިވްވާ މާބަނޑު އަންހެނުންގެ އަދަދު އިތުރުވަމުން އަންނަ ކަމަށާއި އެހެންނަމަވެސް އެއްވެސް މީހަކު ވެސް ކުޑަކުއްޖަކު ވެސް ސީރިއަސް ހާލަތުގައި ނެތް ކަމަށެވެ.
ރާއްޖޭގައި ފެންނަ ކޮވިޑުގެ ކޭސްތަކުގެ އަދަދު އިންތިހާއަށް އިތުރުވެފައިވާއިރު ބުދަ ދުވަހު 700ށް ވުރެ ގިނަ މީހުން ވަނީ ކޮވިޑަށް ޕޮޒިޓިވްވެފައެވެ. އެޗްއީއޯސީން ނެރުނު ތަފާސްހިސާބުތައް ދައްކާގޮތުން ޓެސްޓުކުރި 4،787 ސާމްޕަލްގެ ތެރެއިން 734 މީހުން ވަނީ ޕޮޒިޓިވްވެފައެވެ. އޭގެ ތެރެއިން މާލެއިން 540 މީހުން ވަނީ ޕޮޒިޓިވްވެފައެވެ. އަދި އަތޮޅުތެރެއިން 186 ކޭސް ރިޕޯޓުކޮށްފައިވާއިރު، އިންޑަސްޓްރިއަލް ރަށްތަކުން އެއް ކޭސް ވަނީ ރިޕޯޓުކޮށްފައެވެ.
މިއާއެކު 7،109 އެކްޓިވްކޭސް މިހާރު ތިބި އިރު ޕޮޒިޓިވް ކޭސްތަކުގެ ޖުމްލަ އަދަދު ވަނީ 32،665ށް އަރާފައެވެ. އޭގެ ތެރެއިން 25،437 މީހުން ވަނީ ބަލިން ރަނގަޅުވެފައެވެ. ބައްޔަށް ފަރުވާ ހޯދަމުންދާ މީހުންގެ ތެރެއިން 198 މީހުން އެޑްމިޓްކޮށްފައިވާއިރު، 75 މީހުން ވަނީ މި ބަލީގައި ނިޔާވެފައެވެ.
ބުދަ ދުވަހު ފެނުނު ކޮވިޑް-19 ކޭސްތަކުގެ ޖުމްލަ އަކީ މިހާތަނަށް ރާއްޖެއިން ކޮވިޑް-19 ކޭސްތައް އެންމެ ގިނައިން ރިޕޯޓުކުރި އަދަދެވެ. ފާއިތުވެ ދިޔަ ހަފްތާތަކުގައި ކޮންމެ ދުވަހަކު ވެސް ކޮވިޑް-19ގެ ކޭސްތަކުގެ އަދަދުތަކުގެ އައު ރިކޯޑުތައް ހަދަމުން އަންނައިރު ކޭސްތައް 400ން މައްޗަށް އަރަން ފަށާފައި ވަނީ މިދިޔަ ހަފްތާގައެވެ.
ރާއްޖޭގެ ކޭސްތަކުގެ އަދަދު މިހާ މައްޗަށް ގޮސްފައިވާއިރު، ރާއްޖޭގައި އިންޑިއާގައި ފެތުރެމުންދާ ކޮވިޑް-19 ވޭރިއަންޓް އުޅުން އެކަށީގެންވާ ކަމަށް އެޗްޕީއޭއިން ބުނެފައިވެއެވެ. އޭގެ ސަބަބުން ރާއްޖެ އަންނަ އެންމެން ވެސް ވަކި ފިޔަވަޅުތަކެއްގެ ތެރެއިން ރާއްޖެ އެތެރެވެވޭ ގޮތަށް ހަރުކަށި ފިޔަވަޅުތަކެއް އަޅާފައިވާއިރު، އެއް ރަށުން އަނެއް ރަށަށް ދަތުރުކުރުން ވެސް ވަނީ މަނާކޮށްފައެވެ.
