މިނިސްޓަރު އިރުތިޝާމް އާއި މެންބަރު ޝާޑު ކައިވެނި ކުރައްވަނީ!
ކައިވެނި ކުރައްވަނީ އަންނަ މަހުގެ 17 ވަނަ ދުވަހު
މެންބަރު ޝާހިދުއާއި މިނިސްޓަރު އިރުތިޝާމް: މިއީ ޝާހިދުގެ ތިން ވަނަ ކައިވެނި
ޔޫތު މިނިސްޓަރު އިރުތިޝާމް އާދަމާއި ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު މުހައްމަދު ޝާހިދު (ޝާޑު) ކައިވެނި ކުރައްވަން ތައްޔާރުވަމުންދާކަން ރާއްޖެއެމްވީ އަށް އެނގިއްޖެއެވެ.
އިތުބާރު ހުރި މަސްދަރަކުން ރާއްޖެއެމްވީ އަށް މައުލޫމާތު ލިބިފައިވާ ގޮތުގައި މިނިސްޓަރު އިރުތިޝާމާއި މެންބަރު ޝާހިދު ލޯބީގެ ގޮތުން ގުޅިވަޑައިގެން އުޅުއްވާތާ ގިނަ ދުވަސްތަކެއް ވެއްޖެއެވެ. ދެ ބޭފުޅުން އެއްކޮށް ނަގާފައިވާ ސެލްފީތަކާއި ފޮޓޯތައް ސޯޝަލް މީޑިއާގައި ދަނީ ދައުރުވަމުންނެވެ.
އެ ދެ ބޭފުޅުން ކައިވެނި ކުރައްވަން އުޅުއްވާ ވާހަކަ އެންމެ ފުރަތަމަ ފަތުރާފައި ވަނީ ޝާހިދުގެ ދަރިކަނބަލުންގެ ނަމުގައި ހަދާފައިވާ ޓްވިޓާ އެކައުންޓަކުންނެވެ. ނަމަވެސް، އެ އެކައުންޓަކީ ފޭކު އެކައުންޓެއް ކަމަށް ގިނަ ބަޔަކު ދިޔައީ ބުނަމުންނެވެ.
ނަމަވެސް، އެކަމާ ގުޅޭ ގޮތުން މިނިސްޓަރު އިރުތިޝާމާއި ޝާހިދު ވެސް އެއްވެސް އެއްޗެއް ވިދާޅުވެފައެއް ނުވެ އެވެ.
އެ ދެ ބޭފުޅުން ކައިވެނި ކުރައްވާކަން ކަށަވަރުވީ، ޔޫތު މިނިސްޓްރީގެ ވައިބާ ގްރޫޕުގައި މިނިސްޓަރު އިރުތިޝާމް އެ ވާހަކަ ދެއްކެވުމުންނެވެ. ޔޫތު މިނިސްޓްރީގެ ވައިބާ ގްރޫޕަށް އާދިއްތަ ދުވަހު ފޮނުއްވި މެސެޖެއްގައި އިރުތިޝާމް ވަނީ އަންނަ ފެބްރުއަރީ 17 ވަނަ ދުވަހު މެންބަރު ޝާހިދުއާ ކައިވެނި ކުރައްވަން އުޅުއްވާ ކަމަށް ވިދާޅުވެފަ އެވެ.
މިނިސްޓްރީގެ ވައިބާ ގްރޫޕުގައި މިނިސްޓަރު އިރުތިޝާމް ދެއްކެވި ވާހަކަތަކުގެ ސްކްރީން ޝޮޓެއް ސޯޝަލް މީޑިއާގައި އަންނަނީ ދައުރުވަމުންނެވެ. އެ ސްކްރީންޝޮޓަކީ އަސްލެއްކަން ރާއްޖެއެމްވީ އަށް ވަނީ ކަށަވަރުކުރެވިފަ އެވެ.
މިކަމާ ގުޅޭ ގޮތުން ރާއްޖެއެމްވީން ސުވާލުކުރުމުން، ހިނިފުޅުވަޑުވާލެއްވުމަށް ފަހު މެންބަރު ޝާހިދު ވިދާޅުވީ އެއީ ދޮގު ވާހަކައެއް ކަމަށެވެ. ރާއްޖެއެމްވީން ޝާހިދު އަށް ފޯނުކޮށްގެން އުޅެނިކޮށް، މިނިސްޓަރު އިރުތިޝާމް ވަނީ ޝާހިދުގެ ފޯނުން ރާއްޖެއެމްވީ އަށް ޖަވާބުދާރީވެވަޑައިގެންފަ އެވެ.
އިރުތިޝާމް ވިދާޅުވީ ކެބިނެޓް މިނިސްޓަރަކަށް ވިޔަސް އެފަދަ ކަންކަމަކީ އަމިއްލަފުޅު ކަންތައްތައް ކަމަށެވެ. އަދި އެފަދަ ކަންކަމާ ގުޅޭ މައުލޫމާތު ނުދެއްވޭނެ ކަމަށާއި މިނިސްޓްރީއާ ގުޅޭ މައުލޫމާތު ދެވިދާނެ ކަމަށް އިރުތިޝާމް ވިދާޅުވި އެވެ.
މައުލޫމާތު ލިބިފައިވާ ގޮތުގައި ޝާހިދު ކައިވެނި ކުރައްވައިގެން އުޅުއްވި ނަސޫހާ ސަލީމް މިހާރު ވަނީ ވަރިކޮށްފަ އެވެ. އަދި މިދިޔަ ބުދަ ދުވަހު ވަރި ސާބިތުކޮށްފައިވާ ކަމަށް ވެސް މައުލޫމާތު ލިބިފައި ވެއެވެ. ޝާހިދުގެ ތިން ކުދިން ތިބެ އެވެ.
