ޔޫވީން ފަސޭހަކަމާއެކު ސަސް ބަލިކޮށްފި

ދިރާގު ދިވެހި ޕްރިމިއާ ލީގުގައި ހޮނިހިރު ދުވަހުގެރޭ ޔުނައިޓެޑް ވިކްޓަރީ (ޔޫވީ) އިން ފަސޭހަކަމާއެކު ސުޕަ ޔުނައިޓެޑް ސްޕޯޓްސް (ސަސް) ބަލިކޮށްފިއެވެ.

ޤައުމީ ފުޓުބޯޅަ ދަނޑުގައި ކުޅުނު މެޗުން ޔޫވީ މޮޅުވީ 5-1 ނަތީޖާއަކުންނެވެ. މި މޮޅާއެކު ލީގުގައި އެންމެ ފަހުން ކުޅުނު ދެ މެޗުންވެސް ޔޫވީ ވަނީ މޮޅުވެފައެވެ.

މި މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ 27 ވަނަ މިނެޓުގައި ޔޫވީން ވަނީ ލީޑު ނަގާފައެވެ. މުޙައްމަދު އާރިފް (ބަކާ) ގެ އެހީތެރިކަމާއެކު މި ލަނޑު އެޓީމަށް ކާމިޔާބުކޮށްދިނީ ބިދޭސީ ފޯވާޑް ކީރްލޯ ސިލިޗެވެ. އަދި އޭގެ ތިން މިނެޓު ފަހުން ޔޫވީން ވަނީ ލީޑު ފުޅާކޮށްފައެވެ. އިސްމާޢީލް އީސަ (މެސީ) ނަގައިދިން ކޯނަރަކުން މި ލަނޑު އެޓީމަށް ކާމިޔާބުކޮށްދިނީ އަޙްމަދު ރަޝީދު (އައްމަޑޭ) އެވެ.

އެކަމަކު އޭގެ ދެ މިނެޓު ފަހުން ސަސްއިން ވަނީ ލަނޑެއް ޖަހައި ފަރަގު ކުޑަކޮށްފައެވެ. ބިދޭސީ މިޑްފީލްޑަރު އެއިސޫކޭ މޯރީ އެހީތެރިކަމާއެކު މި ލަނޑު އެޓީމަށް ކާމިޔާބުކޮށްދިނީ އަޙްމަދު ހަމީދު (އައްމަޑޭ) އެވެ. ނަމަވެސް ފުރަތަމަ ހާފު ނިމުމުގެ ކުރިން ޔޫވީން ވަނީ އަނެއްކާވެސް ލީޑު ފުޅާކޮށްފައެވެ. އެގޮތުން މެޗުގެ 38 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ މެސީއެވެ.

މި މެޗުގެ ދެވަނަ ހާފުގައިވެސް ދެ ޓީމަށް ގިނަ ފުރުޞަތުތަކެއް ލިބިގެންދިޔައިރު، މެޗުގެ ފަހުކޮޅު ޔޫވީން ވަނީ ދެ ލަނޑު ޖަހާފައެވެ. އެގޮތުން މެޗު ނިމެން ނުވަ މިނެޓަށް ވެފައި ވަނިކޮށް ޔޫވީގެ ހަތަރުވަނަ ލަނޑު ކާމިޔާބުކޮށްދިނީ އަލީ ހައިސަމް (ޗުމްޕު) އެވެ. އަދި އޭގެ ތިން މިނެޓު ފަހުން ލިބުނު ޕެނަލްޓީއަކުން ޔޫވީގެ ފަސްވަނަ ލަނޑު ޖަހައިދިނީ މެޗުގައި މޮޅު ކުޅުމެއް ދެއްކި މެސީއެވެ. މިއީ އޭރިއާ ތެރެއިން ޔޫވީގެ އަޙްމަދު ބައްސާމް މުޙައްމަދު ނައީމަށް ސަސްގެ އެއިސޫކޭ ކުރި ފައުލަކަށް ރެފުރީ ދިން ޕެނަލްޓީއެކެވެ.

މި މެޗަށްފަހު ވާހަކަދައްކަމުން ޔޫވީގެ ކޯޗު އިހުސާން އަބްދުލް ޣަނީ (ސާންތި) ބުނީ މެޗުން މޮޅުވީ ކުޅުންތެރިން ދެއްކި ހިތްވަރުން ކަމަށާއި، ކުރިއަށް އޮތް ތަނުގައި ޔޫވީން މަސައްކަތް ކުރާނީ ރެލިގޭޝަން ޒޯނުން ސަލާމަތްވުމަށް ކަމަށެވެ. އަދި އެ ފުރުޞަތު މިހާރު އެބައޮތް ކަމަށާއި، ދެން ފޯކަސް ހުރީ ކުރިއަށް އޮތް ވެލެންސިއާ މެޗަށް ކަމަށްވެސް ސާންތި ބުންޏެވެ.

ސަސްގެ ކޯޗު މުޙައްމަދު ޝިޔާޒް (މޯހަން) ބުނީ މެޗުގެ ނަތީޖާއާ މެދު ހިތްހަމަނުޖެހޭ ކަމަށެވެ. އަދި މެޗު ފަށައިގެން ސަސްގެ ފަރާތުން ރަނގަޅު ކުޅުމެއް ފެނިގެންދިޔަ ނަމަވެސް، އެ ޓީމު ކޮޅަށް ދެ ލަނޑު ވަނުމާއެކު ކުޅުންތެރިންގެ ފަރާތުން މެޗުން މޮޅުވާން ކުރަން ޖެހޭ މަސައްކަތް ފެނިގެންގޮސްފައިނުވާ ކަމަށްވެސް މޯހަން ބުންޏެވެ.

މި މޮޅާއެކު ތާވަލުގެ ފުލުގައި ޔޫވީ އޮތީ ކުޅުނު 13 މެޗުން ލިބުނު ނުވަ ޕޮއިންޓާއެކުއެވެ. އަދި ފުލުން ދެވަނައިގައި އޮތް ސަސްއަށް 13 މެޗުން ލިބިފައިވަނީ 12 ޕޮއިންޓެވެ.