ވިކްޓަރީ ބަލިކޮށް މާޒިޔާ އިން ރެކޯޑް ދަމަހައްޓައިފި
މާޒިޔާ އިން ވިކްޓްރީ 3-0 އިން ބަލިކޮށް ލީގުގައި އަށް މެޗުން ވެސް މޮޅުވެ 24 ޕޮއިންޓާ އެކު އެއް ވަނައިގައި ހަތް ޕޮއިންޓުގެ ލީޑެއް ނަގާފަ. މެޗުގައި މާޒިޔާ ގެ ގޯލު ތައް ޖަހައިދިނީ ސާޖިއޯ މެންޑީ، އަހުމަދު އައިހަމް އަދި ހައިޝަމް ހަސަން.
މާޒިޔާ އިން ވިކްޓްރީ 3-0 އިން ބަލިކޮށް ލީގުގައި އަށް މެޗުން ވެސް މޮޅުވެ 24 ޕޮއިންޓާ އެކު އެއް ވަނައިގައި ހަތް ޕޮއިންޓުގެ ލީޑެއް ނެގި
ދިރާގު ދިވެހި ޕްރިމިއަރ ލީގުގެ މެޗަކުން މޮޅުވުމަށްފަހު މާޒިޔާ ގެ ކުޅުންތެރިން އުފާ ފާޅުކުރަނީ
ދިރާގު ދިވެހި ޕްރިމިއާ ލީގު ގައި ވިކްޓަރީ ސްޕޯޓްސް ކްލަބް 3-0 އިން ބަލިކޮށް މާޒިޔާ ސްޕޯޓްސް އެންޑް ރެކްރިއޭޝަނުން މޮޅުވުމުގެ ރެކޯޑް ދަމަހައްޓައިފި އެވެ.
ހޮނިހިރު ދުވަހު ހަވީރު ކުޅުނު މި މެޗުން މާޒިޔާ އިން ވަނީ ވަރުގަދަ ކުޅުމެއް ދައްކައި، ލީގުގައި އަށް މެޗުން ވެސް މޮޅުވުމުގެ ރަނގަޅު ރެކޯޑެއް ގާއިމުކޮށް ލީގު ޓޭބަލް އެއް ވަނައިގައި ލީޑު ފުޅާކޮށްފަ އެވެ.
ފުރަތަމަ ހާފުގައި މާޒިޔާ އިން ލީޑުނެގީ ކޯނަރެއްގައި އޭރިއާތެރެއަށް ހުރަސްކޮށްލި ބޯޅައެއް ބޮލުން ގޯލަށް ފޮނުވާލައިގެންނެވެ. މި ލަނޑު ޖެހީ ސްޕެއިންގެ ފޯވާޑް ސާޖިއޯ މެންޑީ އެވެ. ލީގުގެ އެންމެ ގިނަ ގޯލު ޖެހި މެންޑީ ވަނީ ވިކްޓަރީ ކީޕަރު، ސީރިއާގެ މަހުމޫދު އަލް ޔޫސުފް އަށް ލިބުމުގެ ކުރިން ގޯލަށް ބޯޅަ ވައްދާލާފަ އެވެ.
ދެ ވަނަ ހާފުގައި ވެސް މާޒިޔާ އިން ދިޔައީ ވިކްޓަރީ ގޯލަށް ޕްރެޝަރު ކުރަމުންނެވެ. މާޒިޔާ އިން ފަހު ދެ ލަނޑު ޖެހީ މެޗުގެ ފަހުކޮޅުގަ އެވެ. މެޗުގެ 84 ވަނަ މިނިޓްގައި، ނާއިޒު ހަސަން (ދާދު) ދިން ބޯޅައަކުން އަހުމަދު އައިހަމް (ފަތޯ) ވަނީ އޭރިއާތެރެއިން ގޯލުގެ ތެރެއަށް ބޯޅަ ފޮނުވާލައި މާޒިޔާގެ ލީޑުފުޅާކޮށްފަ އެވެ.
މެޗުގެ އިތުރު ވަގުތުގެ ގޮތުގައި ދެއްކި ފަސް މިނިޓްގެ ތެރެއިން ފުރަތަމަ މިނިޓްގައި، ހައިޝަމް ހަސަން (ބިޑި) ވަނީ ދާދު ދިން ބޯޅައެއް ގޯލަށް ވައްދާލައި، މާޒިޔާ އަށް ތިން ޕޮއިންޓް ޔަގީންކޮށްދީފަ އެވެ.
މި މޮޅާ އެކު ލީގުގެ އެއް ވަނައިގައި މާޒިޔާ އިން މި ވަނީ ހަތް ޕޮއިންޓުގެ ބޮޑު ލީޑެއް ނަގާފަ އެވެ. އެއް ވަނައިގައި އޮތް މާޒިޔާ އަށް ވަނީ އަށް މެޗުން ވެސް މޮޅުވެ، 24 ޕޮއިންޓް ލިބިފަ އެވެ. ދެ ވަނައިގައި އޮތް ނިއު ރޭޑިއަންޓް ސްޕޯޓްސް ކްލަބަށް ހަތް މެޗުން 17 ޕޮއިންޓް ލިބިފައިވާއިރު، ތިން ވަނައިގައި އޮތް އޮޑި ސްޕޯޓްސް ކްލަބަށް ވަނީ ހަތް މެޗުން 16 ޕޮއިންޓް ލިބިފަ އެވެ.
