މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ޔުނައިޓެޑު ވިކްޓްރީ (ޔޫވީ)އާ ދެކޮޅަށް ކުޅުނު މެޗުން މޮޅުވެ، ބުރު ސްޕޯޓްސް ކުލަބުން ލީގު ތާވަލްގެ ފަސް ވަނަ މަގާމަށް ޖެހިލައިފި އެވެ.

ހޯމަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ބުރުން ކާމިޔާބު ކުރީ 2-0 އިންނެވެ. މެޗުގައި ބުރުން އެ ޓީމުގެ ދެ ލަނޑު ވެސް ޖަހާފައި ވަނީ މެޗުގެ ފުރަތަމަ ހާފުގަ އެވެ.

އެގޮތުން މެޗުގެ ފުރަތަމަ ހާފުގެ 35 ވަނަ މިނެޓުގައި ބުރަށް ލަނޑު ޖަހައި ލީޑު ނަގައިދިނީ އަރީން ޢަބްދުﷲ އިބްރާހީމް އެވެ. އޭގެ ފަހުން ފުރަތަމަ ހާފުގެ ފަހު ވަގުތުގައި ބުރުން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެ ލަނޑު ބުރަށް ޖަހައިދިނީ އެ ޓީމުގެ ބިދޭސީ ކުޅުންތެރިޔާ ހުޑްސަން ޑިއާޒް އެވެ.

ލީގުގައި މިހާތަނަށް ކުޅެފައިވާ އަށް މެޗުން ބުރަށް ލިބެނީ 11 ޕޮއިންޓެވެ. އެ ޓީމު އޮތީ ލީގު ތާވަލްގެ ފަސް ވަނަ މަގާމުގަ އެވެ. ބުރު އަތުން ބަލިވި ޔޫވީ އޮތީ އަށް މެޗުން ހަތަރު ޕޮއިންޓާ އެކު ލީގު ތާވަލްގެ އެންމެ ފުލުގަ އެވެ.

ލީގުގައި މިހާތަނަށް ކޮންމެ ޓީމެއް ވެސް އަށް މެޗު ކުޅެފައިވާއިރު، އެއް ވަަނައިގައި އޮތީ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އެވެ. އެއް ވަނައިގައި އެ ޓީމު އޮތީ އަށް މެޗުން ވެސް މޮޅުވެ 24 ޕޮއިންޓާ އެކު އެވެ.

ހަމަ އެ އަދަދަށް މެޗު ކުޅެގެން ދެ ވަނައިގައި އޮތް އޮޑި ސްޕޯޓްސް ކުލަބަށް ލިބެނީ 19 ޕޮއިންޓެވެ. ތިން ވަަނައިގައި ނިއު ރޭޑިއަންޓްސް ސްޕޯޓްސް ކުލަބު އޮތްއިރު، އެ ޓީމަށް ލިބެނީ 17 ޕޮއިންޓެވެ. ލީގު ތާވަލްގެ ހަތަރު ވަަނައިގައި ކުލަބު އީގަލްސް އޮތީ 12 ޕޮއިންޓާ އެކު އެވެ.